1 जूनपासून ड्रायव्हिंग लायसन्स, ट्रॅफिक संबंधित नियमात मोठे बदल; मोफत आधार कार्ड अपडेट होणार - Rules Changes From 1 June 2024

Rules Changes From 1 June 2024 : नवीन महिना अर्थात 1 जूनपासून ड्रायव्हिंग लायसन्स, आधार कार्ड, ट्रॅफिकशी संबंधित नियम बदलणार आहेत. अशा परिस्थितीत, तुम्ही संबंधित नियमांबद्दल अपडेट राहणं खूप महत्त्वाचं आहे. तसंच ज्या व्यक्तींनी दहा वर्षापासून आधार कार्ड अपडेट केलं नसेल, त्यांना मोफत आधार कार्ड अपडेट करून मिळणार आहे. जाणून घ्या, 1 जूनपासून काय बदल होणार...

नवी दिल्ली Rules Changes From 1 June 2024 : जून महिना सुरू होताच अनेक प्रकारचे नियम बदलणार आहेत. नियमांमधील बदलांचा थेट परिणाम तुमच्या दैनंदिन जीवनावर होणार आहे. लोकसभा निवडणुकीच्या शेवटच्या टप्प्याचं मतदानही १ जून रोजी संपत आहे. अशा परिस्थितीत कोणते नियम बदलणार आहेत हे जाणून घेणं तुमच्यासाठी खूप महत्त्वाचं आहे. त्यासाठी संपूर्ण बातमी वाचा....

ड्रायव्हिंग लायसन्स : जर तुम्ही दिल्ली एनसीआरमध्ये राहत असाल, तर तुमच्यासाठी ड्रायव्हिंग लायसन्सशी संबंधित नियमांबद्दल अपडेट राहणे खूप महत्त्वाचं आहे. नवीन वाहतुकीचे नियम 1 जूनपासून लागू होणार आहेत. १ जूनपासून नवीन ड्रायव्हिंग लायसन्स काढण्यासाठी 'आरटीओ'मध्ये चाचणी देणं बंधनकारक असणार नाही. सरकारनं मान्यता दिलेल्या कोणत्याही खासगी संस्थेत तुम्ही ड्रायव्हिंग टेस्ट देऊ शकता. 'आरटीओ'ला वारंवार भेट देण्याची गरज आता संपुष्टात येणार आहे.

वाहतूक नियम : रस्ते अपघात टाळण्यासाठी वाहतूक नियमात बदल केले जात आहेत. अल्पवयीन मुलांनी वाहन चालवल्यानं रस्त्यावर अपघात वारंवार घडत आहेत. नवीन वाहतूक नियमांनुसार 18 वर्षांपेक्षा कमी वयाच्या व्यक्तीनं वाहन चालवल्यास 25 हजार रुपयांचा दंड आकारला जाणार आहे. तसंच संबंधित व्यक्ती 25 वर्षांची होईपर्यंत नवीन परवाना जारी केला जाणार नाही. अशा परिस्थितीत जर तुमच्या घरात दुचाकी किंवा चारचाकी वाहन असेल तर अल्पवयीन व्यक्तीला वाहन चालवण्यापासून तुम्ही दूर ठेवायलं हवं.

14 जूनपर्यंत मोफत आधार अपडेट : जर तुम्ही 10 वर्षांपासून तुमचं आधार कार्ड अपडेट केलं नसेल, तर तुम्ही 14 जूनपर्यंत तुमचं आधार कार्ड मोफत अपडेट करू शकता. युनिक आयडेंटिफिकेशन ऑथॉरिटी ऑफ इंडियाच्या म्हणण्यानुसार, 14 जूनपर्यंत आधार अपडेट करण्यासाठी कोणत्याही प्रकारचं शुल्क आकारलं जाणार नाही.

जूनमध्ये बँक बंद : जून महिन्यात बँकेशी संबंधित काम असेल, तर बँकेच्या सुट्ट्यांची यादी नक्की पाहा. रिझर्व्ह बँक ऑफ इंडियाच्या अधिकृत वेबसाइटवर दिलेल्या माहितीनुसार, जूनमध्ये एकूण 12 दिवस बँका बंद राहतील.

एलपीजी सिलिंडर : प्रत्येक महिन्याच्या पहिल्या दिवशी पेट्रोलियम कंपन्या घरगुती, व्यावसायिक, एलपीजी सिलिंडरच्या किमती बदलतात. 1 जून 2024 रोजी पेट्रोलियम कंपन्यांकडून एलपीजी सिलिंडरच्या नवीन किमती जाहीर केल्या जातील. अशा परिस्थितीत एलपीजी सिलिंडरच्या किमती वाढतात, की कमी किमतीमुळं सर्वसामान्यांना दिलासा मिळतो, हे पाहायचं आहे.

हे वाचलंत का :