ആത്മീയതയുടെ മറവിൽ പീഡനം, പാസ്റ്റർ അറസ്റ്റിൽ

ഇടുക്കി: ചികിത്സയിൽ കഴിഞ്ഞിരുന്ന യുവതിയെ ആത്മീയതയുടെ മറവിൽ ആശുപത്രിയിൽ വെച്ച് ബലാത്സംഗം ചെയ്‌ത പാസ്റ്ററെ ഇടുക്കി വനിതാ പൊലീസ് അറസ്റ്റ് ചെയ്‌തു. പാറത്തോട് മാങ്കുഴിയിൽ കുഞ്ഞുമോൻ പാസ്റ്ററാണ് അറസ്റ്റിലായത്. ഒരു മാസമായി പൊലീസ് ഇയാളെ നിരീക്ഷിച്ച്‌ വരികയായിരുന്നു. യുവതിയെ രോഗശാന്തി ശുശ്രൂഷ നൽകാമെന്ന് വിശ്വസിപ്പിച്ച് ആശുപത്രിയിലെ റൂമിലെത്തി പ്രാർത്ഥനക്കിടയിൽ ശാരീരിക പീഡനത്തിന് ഇരയാക്കുകയായിരുന്നു. ഇയാൾക്കെതിരെ നിരവധി സ്ത്രീകൾ സമാനമായ ആരോപണം ഉന്നയിക്കുന്നുണ്ട്. എന്നാൽ പൊലീസിൽ ഈ ഒരു പരാതി മാത്രമേ ലഭിച്ചുള്ളൂ എന്ന് വനിത സിഐ സുമതി പറഞ്ഞു. കുഞ്ഞുമോൻ വിവിധ മേഖലകളിൽ ആത്മീയ കച്ചവടത്തിന്‍റെ മറവിൽ സ്ത്രീകളെ ദുരുപയോഗം ചെയ്‌തതായാണ് നിലവിൽ പരാതികൾ ഉയരുന്നത്. ഇത് സംബന്ധിച്ച്‌ പൊലീസ് അന്വേഷണം ആരംഭിച്ചു. ഇടുക്കി എസ് പി വിഷ്‌ണു പ്രദീപ്, ഡി വൈ എസ്‌ പി എന്നിവരുടെ നിർദ്ദേശ പ്രകാരമാണ് ഇടുക്കി വനിതാ പൊലീസ് അറസ്റ്റു ചെയ്‌ത പ്രതിയെ കോടതിയിൽ ഹാജരാക്കിയത്. ഇടുക്കി വണ്ടിപ്പെരിയാർ കേസിൽ ക്രമക്കേട് നടന്നതായുള്ള കോടതിയുടെ നിരീക്ഷണത്തെ തുടർന്ന് അന്വേഷണ ഉദ്യോഗസ്ഥനെ  സര്‍ക്കാര്‍ കഴിഞ്ഞ ദിവസം സസ്‌പെന്‍ഡ് ചെയ്‌തിരുന്നു.