വെള്ള പൂശിയ ചുവരുകളിലെ വടിവൊത്ത അക്ഷരങ്ങൾ, അത്ഭുതപ്പെടുത്തുന്ന എഴുത്ത് വൈദഗ്‌ധ്യം; ഓര്‍മയാകുന്ന ചുവരെഴുത്ത്

ഇടുക്കി : ഒരു കാലത്ത് പരസ്യകല രംഗത്ത് നിറഞ്ഞു നിന്നിരുന്നവരാണ് ചുവരെഴുത്ത് കലാകാരന്മാർ. ഫ്ലക്‌സും ബാനറുകളും അടക്കം മറ്റ് ഉപാധികൾ വന്നതോടെ പല കലാകാരന്മാരും കളം ഒഴിഞ്ഞു. എങ്കിലും ചുരുക്കം ചിലർ മാത്രം ഇപ്പോഴും ഈ രംഗത്ത് തുടരുന്നു. ചുവരെഴുത്ത് കലാകാരന്മാരുടെ ഉത്സവ സീസൺ ആണ്‌ തെരഞ്ഞെടുപ്പ് കാലം. വെള്ള പൂശിയ ചുവരുകളിലെ വടിവൊത്ത അക്ഷരങ്ങൾ, എഴുത്തിൽ ആരെയും അത്ഭുതപ്പെടുത്തുന്ന വൈദഗ്‌ധ്യം. ഒരു കാലത്ത് വലിയ അംഗീകാരം നേടിയവരായിരുന്നു ചുവരെഴുത്ത് കലാകാരന്മാർ. ഫ്ലക്‌സും ബാനറും പോസ്റ്ററുമൊക്കെ കളം നിറഞ്ഞപ്പോൾ ചുവരെഴുത്ത്, പ്രതാപ കാലത്തിന്‍റെ ഓർമകളിൽ ഒതുങ്ങി. പലരും തൊഴിൽ ഉപേക്ഷിച്ച് ഉപജീവന മാർഗം തേടി മറ്റ് മേഖലകളിലേയ്‌ക്ക്‌ ചേക്കേറി. തെരഞ്ഞെടുപ്പ് കാലത്തിന്‍റെ ഏക പ്രതീക്ഷയിലാണ് നിലവിൽ ഈ തൊഴില്‍ രംഗത്തുള്ളവർ. പ്രഖ്യാപനം വരുംമുമ്പേ തെരഞ്ഞെടുപ്പ് ചൂടിലേക്ക് കടന്നു കൊണ്ട് പലയിടങ്ങളിലും ഇപ്പോഴേ ചുവരെഴുത്ത് ആരംഭിച്ചിട്ടുണ്ട്‌. ഹരിത ചട്ടങ്ങൾ പാലിച്ചുള്ള ഈ പ്രകൃതി സൗഹൃദ തെരഞ്ഞെടുപ്പ് കാലം പ്രതീക്ഷ വർധിപ്പിയ്ക്കുന്നു എന്ന്‌ ചുവരെഴുത്ത് കലാകാരന്മാർ പറയുന്നു.