കുറഞ്ഞ രീതിയിൽ പരസ്യങ്ങൾ ഉൾപ്പെടുത്തി കൊണ്ട് ഉപഭോക്താക്കൾക്കായി പുതിയ സബ്‌സ്‌ക്രിപ്‌ഷൻ പ്ലാൻ അവതരിപ്പിക്കാനൊരുങ്ങി ജനപ്രിയ വീഡിയോ പ്ലാറ്റ്‌ഫോമായ യൂട്യൂബ്. പ്രീമിയം സബ്‌സ്‌ക്രിപ്‌ഷനേക്കാൾ കുറഞ്ഞ നിരക്കിൽ ലഭ്യമാകുന്ന പ്രീമിയം ലൈറ്റ് സബ്‌സ്‌ക്രിപ്‌ഷൻ അവതരിപ്പിക്കാനാണ് പദ്ധതിയിടുന്നത്. പ്രീമിയം സബ്‌സ്‌ക്രിപ്‌ഷൻ്റെ പകുതി വിലയായിരിക്കും പ്രീമിയം ലൈറ്റ് സബ്‌സ്‌ക്രിപ്‌ഷന് എന്നാണ് സൂചനകൾ.
ജോനാമൻസാനോ എന്ന ഉപയോക്താവിന്‍റെ ത്രെഡ് പോസ്റ്റ് അനുസരിച്ച്, യൂട്യൂബ് പ്രീമിയം ലൈറ്റിന്‍റെ വില പ്രതിമാസം 8.99 ഡോളറും, യൂട്യൂബ് പ്രീമിയം സബ്‌സ്‌ക്രിപ്‌ഷൻ്റെ വില 16.99 ഡോളറുമാണ്. പുതിയ പ്ലാനിന്‍റെ വില പ്രീമിയം സബ്‌സ്‌ക്രിപ്‌ഷനേക്കാൾ 50 ശതമാനം കുറവായിരിക്കുമെന്നാണ് ഇത് കാണിക്കുന്നത്. എന്നാൽ യൂട്യൂബ് പ്രീമിയം ലൈറ്റിന്‍റെ വാർഷിക സബ്‌സ്‌ക്രിപ്‌ഷനെ കുറിച്ച് നിലവിൽ സ്ഥിരീകരണമൊന്നുമില്ല.
ഇന്ത്യയിൽ സബ്‌സ്‌ക്രിപ്‌ഷന് വില കുറയുമോ?
യൂട്യൂബ് പ്രീമിയം ലൈറ്റ് സബ്‌സ്‌ക്രിപ്‌ഷൻ ഇന്ത്യയിൽ ലഭ്യമാകുമോ എന്നതിനെ കുറിച്ച് നിലവിൽ വിവരങ്ങളൊന്നും തന്നെയില്ല. പ്രതിമാസം 149 രൂപയാണ് ഇന്ത്യയിൽ സാധാരണ പ്രീമിയം പ്ലാനിന്‍റെ വില വരുന്നത്. അതിനാൽ തന്നെ യൂട്യൂബ് പ്രീമിയം ലൈറ്റ് സബ്‌സ്‌ക്രിപ്‌ഷൻ രാജ്യത്ത് അവതരിപ്പിക്കുകയാണെങ്കിൽ ഏകദേശം 75 രൂപയ്ക്ക് ലഭ്യമാകാനാണ് സാധ്യത.
കുറഞ്ഞ പരസ്യങ്ങളോടെയുള്ള ബ്‌സ്‌ക്രിപ്‌ഷൻ:
യൂട്യൂബ് പ്രീമിയം ലൈറ്റ് സബ്‌സ്‌ക്രിപ്‌ഷൻ കുറഞ്ഞ പരസ്യങ്ങളോടെ ആയിരിക്കും ലഭ്യമാകുക. മിക്ക വീഡിയോകളിലും പരസ്യമില്ലാത്ത സേവനം നൽകുമെങ്കിലും, പാട്ടുകളിലും ഷോർട്ട് വീഡിയോകളിലും പരസ്യം ദൃശ്യമായേക്കാം. എന്നാൽ പ്രീമിയം ലൈറ്റ് സബ്‌സ്‌ക്രിപ്‌ഷൻ എടുക്കുന്നവർക്ക് ആഡ് ഫ്രീ സ്ട്രീമിങ്, ഓഫ്‌ലൈൻ ഡൗൺലോഡുകൾ, യൂട്യൂബ് മ്യൂസിക്കിലെ ബാക്ക്‌ഗ്രൗണ്ട് പ്ലേ തുടങ്ങിയ ആനുകൂല്യങ്ങൾ നഷ്‌ടമാകും.
'ദി വെർജ്' നൽകിയ റിപ്പോർട്ടുകൾ അനുസരിച്ച് പ്രീമിയം ലൈറ്റ് സബ്‌സ്‌ക്രിപ്‌ഷൻ നിലവിൽ ജർമ്മനി, തായ്‌ലൻഡ്, ഓസ്‌ട്രേലിയ തുടങ്ങിയ വിപണിയിൽ പരീക്ഷിച്ചുകൊണ്ടിരിക്കുകയാണ്. പുതിയ പ്ലാൻ വിജയകരമാവുകയാണെങ്കിൽ മറ്റ് രാജ്യങ്ങളിലേക്ക് കൂടെ വ്യാപിപ്പിക്കാനാണ് സാധ്യത.
