ഹൈദരാബാദ്: സോഫ്റ്റ്‌വെയർ ഡെവലപ്മെന്റ്, സൈബർ സുരക്ഷ, ക്ലൗഡ് കംപ്യൂട്ടിംഗ്, ഡാറ്റ മാനേജ്‌മെന്‍റ്, പ്രൊജക്‌ട് മാനേജ്‌മെന്‍റ്, സോഫ്റ്റ്‌വെയർ ഓപറേഷൻസ് എന്നീ മേഖലകളിൽ 2025ഓടെ സ്ത്രീകൾക്ക് തൊഴിൽ സാധ്യത വർധിക്കുമെന്ന് റിപ്പോർട്ടുകൾ. ഡിജിറ്റൽ സ്‌കിൽസ് ആൻഡ് സാലറി പ്രൈമർ 2024-25 പുറത്തുവിട്ട റിപ്പോർട്ടിലാണ് ഇക്കാര്യം വെളിപ്പെടുത്തിയത്. 2025 ആകുമ്പോഴേക്കും ഐടി മേഖലയിലെ വിവിധ വിഭാഗങ്ങളിൽ ഏകദേശം 21 ലക്ഷം തൊഴിലവസരങ്ങൾ ലഭിക്കും.
ഐടി മേഖലയിലെ 15,000-ലധികം തൊഴിലുകളെക്കുറിച്ചും അവയുടെ ഭാവി സാധ്യതകളെ കുറിച്ചും നടത്തിയ പഠനത്തിലാണ് പുതിയ കണ്ടെത്തൽ. തൊഴിലുടമകൾ ആവശ്യപ്പെടുന്ന നൈപുണ്യം എന്താണെന്നും മാറുന്ന ടെക്‌നോളജിക്കനുസരിച്ചും തൊഴിലിടങ്ങളിലെ ആവശ്യങ്ങൾക്കനുസരിച്ചും തൊഴിലാളികൾക്ക് എങ്ങനെ നൈപുണ്യം വർധിപ്പിക്കാമെന്നും ഉൾക്കാഴ്‌ച നൽകുന്നതാണ് ഡിജിറ്റൽ സ്‌കിൽസ് ആൻഡ് സാലറി പ്രൈമറിന്‍റെ റിപ്പോർട്ടുകൾ.
ആർട്ടിഫിഷ്യൽ ഇന്‍റലിജൻസ്, ഡാറ്റ, സൈബർ സുരക്ഷ, ക്ലൗഡ് എന്നിവയിലെ പ്രധാന ജോലികൾക്ക് 8 ശതമാനം മുതൽ 15 ശതമാനം വരെ ശമ്പള വർധനവ് പ്രതീക്ഷിക്കുന്നതായി റിപ്പോർട്ടിൽ പറയുന്നു. എഐ മേഖലയുടെ കുതിച്ചുചാട്ടം എഐ വിദഗ്‌ധരുടെ ആവശ്യകതയിലേക്കാണ് വിരൽചൂണ്ടുന്നത്. സാങ്കേതിക മേഖലയിൽ 19-20 ശതമാനം പുതിയ നിയമനങ്ങൾ (ഫ്രഷേഴ്‌സ്) നടക്കാനിടയുണ്ട്. 40 ശതമാനത്തോളം പരിചയസമ്പന്നരായ പ്രൊഫഷണലുകളുടെ ആവശ്യമുണ്ടാകുമെന്നും റിപ്പോർട്ടിൽ പറയുന്നു.
2026ഓടെ 1.4 ദശലക്ഷം മുതൽ 1.9 ദശലക്ഷം വരെ ഡിജിറ്റൽ പ്രൊഫഷണലുകളുടെ ആവശ്യകത വർധിക്കും. സാങ്കേതിക മേഖലയിലെ പ്രൊഫഷണലുകളുടെ ലിംഗ വൈവിധ്യത്തിൽ 2025ഓടെ വലിയ മാറ്റം വരുമെന്നും കണക്കുകൾ സൂചിപ്പിക്കുന്നു. 2022ൽ നിന്നും 2025 ആവുമ്പോഴേക്കും വനിത പ്രൊഫഷണലുകളുടെ എണ്ണം 16.8 ലക്ഷത്തിൽ നിന്ന് 21 ലക്ഷമാകും. പുരുഷ പ്രൊഫഷണലുകളുടെ എണ്ണം 34.2 ലക്ഷത്തിൽ നിന്ന് 38.9 ലക്ഷമായും വർധിക്കുമെന്നാണ് കണക്കുകൾ. അതേസമയം മൊത്തം ജീവനക്കാരുടെ എണ്ണം 59.9 ലക്ഷമായി ഉയരും.
ഇലക്‌ട്രോണിക് വെഹിക്കിൾ, സെമികണ്ടട്‌ടേഴ്‌സ്, മാനുഫാക്‌ചറിങ്, ബിഎസ്‌എഫ്ഐ എന്നീ മേഖലകളിലാണ് സ്ത്രീ പങ്കാളിത്തം വർധിച്ചത്. സ്‌ത്രീകളും പുരുഷന്മാരും തമ്മിൽ ടെക്‌നികൽ മേഖലയിൽ നിലനിൽക്കുന്ന അന്തരം കുറയ്‌ക്കാനായി സർക്കാറെടുത്ത നടപടികളുടെ ഫലമാണ് ഇത്. ഇന്ത്യയിൽ സാങ്കേതിക മേഖലയിൽ നിലവിൽ 20.5 വനിത പ്രൊഫഷണലുകളുണ്ട്. ഗ്ലോബൽ കപ്പാസിറ്റി സെന്‍ററുകളിലെ (ജിസിസി) ആകെ സാങ്കേതിക വനിത വിദഗ്‌ധരുടെ എണ്ണം 4.82 ലക്ഷമാണ്. 2027ഓടെ ജിസിസിയിലെ സ്ത്രീകളുടെ എണ്ണം 25 ശതമാനത്തിൽ നിന്ന് 35 ശതമാനമായി ഉയരുമെന്നാണ് കണക്കുകൾ സൂചിപ്പിക്കുന്നത്.
2024-25 സാമ്പത്തിക വർഷത്തിലെ ഇന്ത്യൻ സാങ്കേതിക തൊഴിലാളികൾക്കിടയിൽ ഡ്യൂട്ടി വിതരണം ചെയ്യുന്നതിലെ അസമത്വം, കരിയർ മുന്നേറ്റത്തിനുള്ള തടസങ്ങൾ, വേതന വ്യത്യാസം എന്നിങ്ങനെയുള്ള ഘടനാപരമായ ലിംഗ അസമത്വങ്ങൾ ഉണ്ടെന്നും റിപ്പോർട്ടിൽ പറയുന്നു. ലിംഗഭേദത്തെ അടിസ്ഥാനമാക്കി സാങ്കേതിക മേഖലയിലുള്ള ശമ്പള വിടവ് സാധാരണയായി 10 ശതമാനം മുതൽ 17 ശതമാനം വരെയാണ്. കുറഞ്ഞ എക്‌സ്‌പീരിയൻസ് ഉള്ളവരുടെ ശമ്പള വിടവ് 22-30 ശതമാനം വരെയാണ്.
പുരുഷന്മാരുമായി താരതമ്യപ്പെടുത്തുമ്പോൾ ടെക് മേഖലയിൽ മുതിർന്ന വനിത പ്രൊഫഷണലുകൾ തങ്ങളുടെ പുരുഷ എതിരാളികളേക്കാൾ സാങ്കേതിക വിദ്യകളിൽ നൈപുണ്യം വർധിപ്പിക്കുന്നതിന് കൂടുതൽ നിക്ഷേപം നടത്തുന്നതായി കാണുന്നു. വെബ് ഡെവലപ്മെന്റ്, അഡ്വാൻസ്‌ഡ് എക്‌സൽ, പൈത്തൺ, ഡാറ്റ സയൻസ്, ആർട്ടിഫിഷ്യൽ ഇന്‍റലിജൻസ് മെഷീൻ ലേണിംഗ്, യുഐ/യുഎക്‌സ് ഡിസൈൻ എന്നിവയാണ് സ്ത്രീകൾക്കിടയിൽ ഏറ്റവും പ്രചാരമുള്ള സാങ്കേതിക കോഴ്‌സുകൾ.
മൈക്രോസോഫ്റ്റ് അസ്യൂർ, എഡബ്ല്യുഎസ് പോലുള്ള ക്ലൗഡ് പ്ലാറ്റ്‌ഫോമുകൾക്കും ടെൻസർഫ്ലോ, പൈത്തൺ പോലുള്ള എഐ ടൂളുകൾക്കും ഭാവിയിൽ വലിയ പ്രാധാന്യമുണ്ടാകും. ഇവയിൽ വൈദഗ്‌ധ്യം നേടുന്നവർക്ക് എക്കാലത്തും ആവശ്യക്കാരുണ്ടാകുമെന്നും റിപ്പോർട്ടുകൾ സൂചിപ്പിക്കുന്നു.
Also Read: ആഗോള എഐ പവർഹൗസാകാൻ ഒരുങ്ങി ഇന്ത്യ; ആവശ്യമായി വരുന്നത് 12.5 ലക്ഷം പ്രൊഫഷണലുകളെ
