ടിക് ടോക്കിനെ മൈക്രോസോഫ്‌റ്റ് വാങ്ങുമോ? നിർണായക നീക്കങ്ങളുമായി ട്രംപ്

ടിക് ടോക് ഏറ്റെടുക്കാൻ ചർച്ചയാരംഭിച്ച് മൈക്രോസോഫ്‌റ്റ്. യുഎസിൽ പ്രവർത്തനം തുടരാൻ ആപ്പിന്‍റെ 50 ശതമാനം ഓഹരി നൽകണമെന്നാണ് ട്രംപിന്‍റെ ആവശ്യം. തീരുമാനമെടുക്കാൻ ടിക് ടോക്കിന് 75 ദിവസത്തെ സമയം അനുവദിച്ചിട്ടുണ്ട്.

ഹൈദരാബാദ്: ടിക് ടോക്കിനെ ഏറ്റെടുക്കാൻ മൈക്രോസോഫ്‌റ്റ് ഒരുങ്ങുന്നതായി റിപ്പോർട്ടുകൾ. ആപ്പ് ഏറ്റെടുക്കുന്നതുമായി ബന്ധപ്പെട്ട ചർച്ചകൾ ആരംഭിച്ചതായി അമേരിക്കൻ പ്രസിഡന്‍റ് ഡൊണാൾഡ് ട്രംപ് സ്ഥിരീകരിച്ചു. ടിക് ടോക്കിന് അമേരിക്കയിൽ പ്രവർത്തനം തുടരണമെങ്കിൽ 50 ശതമാനം ഉടമസ്ഥാവകാശം നൽകണമെന്ന് ട്രംപ് ആവശ്യപ്പെട്ടതിനെ തുടർന്നാണ് ചർച്ചകൾ നടന്നത്.

ഇക്കാര്യത്തിൽ തീരുമാനമെടുക്കാൻ ടിക്‌ ടോക്കിന് 75 ദിവസം സമയം അനുവദിച്ചിട്ടുണ്ട്. ട്രംപ് ആവശ്യപ്പെട്ട പോലെ യുഎസ് നീതിന്യായ വ്യവസ്ഥയ്‌ക്കനുസരിച്ച് പ്രവർത്തിക്കാൻ തയ്യാറായതിനാലാണ് ടിക് ടോക്കിന്‍റെ പ്രവർത്തനം പുനഃസ്ഥാപിച്ചത്. എന്നാൽ 50 ശതമാനം ഉടമസ്ഥാവകാശം യുഎസിന് നൽകിയാൽ മാത്രമാകും പ്രവർത്തനം തുടരാനാവുക.

ജോ ബൈഡൻ സർക്കാർ ആണ് യുഎസിൽ ടിക് ടോക്കിന് നിരോധനം ഏർപ്പെടുത്തിയത്. കമ്പനിയുടെ നിയന്ത്രണം അമേരിക്കന്‍ കമ്പനികളുടെ ഉടമസ്ഥതയിലേക്ക് മാറ്റണമെന്ന യുഎസ് സുപ്രീം കോടതി ഉത്തരവ് ടിക് ടോക് പാലിച്ചിരുന്നില്ല. ഇതിനെ തുടര്‍ന്നാണ് നിരോധനം. നിരോധനം തടയാന്‍ ചൈനീസ് കമ്പനിയായ ടിക് ടോക് സുപ്രീം കോടതിയെ സമീപിച്ചിരുന്നുവെങ്കിലും അനുകൂല വിധി ഉണ്ടായില്ല.

ആപ്പ് നിരോധനത്തിലൂടെ യുഎസിലെ ഇൻ്റര്‍നെറ്റ് വിപണിയില്‍ ചൈനീസ് കമ്പനി ആധിപത്യം സ്ഥാപിക്കുന്നത് ഇല്ലാതാക്കുകയാണ് ചെയ്‌തത്. സ്വകാര്യത, രാജ്യ സുരക്ഷ എന്നിവയുമായി ബന്ധപ്പെട്ട ആരോപണങ്ങളും ടിക് ടോക്കിനെതിരെ വന്നിരുന്നു. എന്നാൽ ട്രംപ് അധികാരമേറ്റ ഉടൻ തന്നെ നിരോധനം നീക്കം ചെയ്യുകയായിരുന്നു. അധികാരത്തിൽ തിരിച്ചെത്തിയാൽ ടിക് ടോക് പുനസ്ഥാപിക്കുമെന്ന് ട്രംപ് നേരത്തെ തന്നെ വ്യക്തമാക്കിയിരുന്നു. തുടർന്ന് ട്രംപിന് നന്ദി അറിയിച്ച് ടിക്‌ടോക് എത്തിയിരുന്നു.