സാങ്കേതിക വിദ്യ വളരുന്നതിനനുസരിച്ച് നിര്‍മിതബുദ്ധിയെക്കുറിച്ചുള്ള ചര്‍ച്ചകളും സജീവമാവുകയാണ്. ഇന്നലെ വരെ കേവലം സങ്കല്‍പ്പങ്ങളും ഭാവനയുമൊക്കെയായിരുന്ന കാര്യങ്ങള്‍ പതിയെ ആഗോള തലത്തില്‍ത്തന്നെ ലോകത്തെ അലട്ടുന്ന നിലയിലേക്ക് വളര്‍ന്നിരിക്കുകയാണ്(Artificial Intelligence).
മനുഷ്യന്‍റെ ചെറിയ പിഴവുകള്‍ പോലും നിര്‍മ്മിതബുദ്ധി തെറ്റായ രീതിയില്‍ ഉപയോഗിച്ചേക്കാന്‍ ഇടയുണ്ടെന്നതാണ് ഏറ്റവും വലിയ ആശങ്ക. ലോക സാമ്പത്തിക ഫോറം മുതല്‍ സാങ്കേതിക വിദ്യയില്‍ മുന്നില്‍ നില്‍ക്കുന്ന രാജ്യങ്ങള്‍ വരെ എഐയുടെ അപകടവും നല്ല വശങ്ങളും ചൂണ്ടിക്കാട്ടി ഇതു ഒരു പുത്തന്‍ ശീതയുദ്ധത്തിന് വരെ കാരണമായേക്കുമെന്ന് അഭിപ്രായപ്പെടുന്നു(Future of AI).
എഐ സാങ്കേതിക വിദ്യ അഭിവൃദ്ധിപ്പെട്ടതോടെ നമുക്കു മുന്നില്‍ തുറന്നു കിട്ടിയത് പുരോഗതിയാണെങ്കിലും അതില്‍ അപകടങ്ങള്‍ പതിയിരിക്കുന്നു എന്നതാണ് വലിയ വൈരുദ്ധ്യം(Misuse of AI). ഡീപ്പ് ഫേക് പോലുള്ള സാങ്കേതിക വിദ്യകളുടെ കണ്ടെത്തല്‍ തന്നെ ഏറ്റവും വലിയ അപകടങ്ങളിലൊന്നാണ്. ഇത് അത്യന്താധുനികവും സങ്കീര്‍ണവുമായ ഡിജിറ്റല്‍ വ്യാജ നിര്‍മിതിയാണ്. യാഥാര്‍ത്ഥ്യമേത് ഭാവനയേത് എന്ന് തിരിച്ചറിയാന്‍ സാധിക്കാത്ത തരത്തിലുള്ള ഇത്തരം പരിപാടികള്‍ ഡിജിറ്റല്‍ ആശയവിനിമയ രീതികളുടെ വിശ്വാസ്യതയെത്തന്നെ തകര്‍ക്കുന്നു. എഐ അധിഷ്ഠിത ക്രിപ്റ്റോഗ്രാഫിയും സൈബര്‍ സുരക്ഷാ ആപ്പുകളുമൊക്കെ തട്ടിപ്പിനും കൃത്രിമത്വത്തിനുമുള്ള സാധ്യതകള്‍ ഏറ്റുന്നു. ഇത് വിവരങ്ങള്‍ പങ്കുവെക്കുന്നതിലെ സുരക്ഷിതത്വം ചോര്‍ത്തുകയും ആഗോള സുരക്ഷയ്ക്ക് വെല്ലുവിളി ഉയര്‍ത്തുകയും ചെയ്യുന്നു.
ഹൈപ്പര്‍ ഗ്ലോബലൈസേഷനും ആഗോള തലത്തിലെ ചര്‍ച്ചകളും
ഹൈപ്പര്‍ ഗ്ലോബലൈസേഷനില്‍ നിര്‍മ്മിതബുദ്ധിയുടെ പങ്കിനെക്കുറിച്ചുള്ള ചര്‍ച്ചകള്‍ മുന്നോട്ടു കൊണ്ടു പോകുന്നതില്‍ ലോക സാമ്പത്തിക ഫോറം പോലുള്ള രാജ്യാന്തര സംഘടനകളുടെ പങ്ക് വലുതാണ്. ആഗോള സമ്പദ് വ്യവസ്ഥയില്‍ എഐയെക്കൂടി ഉള്‍ച്ചേര്‍ക്കുമ്പോള്‍ വളരെ സമന്വിതമായ സമീപനം ആവശ്യമാണെന്ന് ഈ സംഘടനകള്‍ പറയുന്നു. പ്രത്യേകിച്ചും സാമ്പത്തിക വളര്‍ച്ച സാധ്യമാക്കുന്നതിനൊപ്പം അസമത്വം പെരുകും എന്ന അപകടവും കാണാതെ പോകരുതെന്ന് ഇവര്‍ ഓര്‍മ്മിപ്പിക്കുന്നു. നിര്‍മ്മിത ബുദ്ധിയുടെ കാര്യത്തില്‍ മേധാവിത്വം ആര്‍ക്കെന്നതിനെച്ചൊല്ലി പുതിയ ശീതയുദ്ധങ്ങള്‍ ആരംഭിക്കുന്നത് ലോക രാഷ്ട്രങ്ങളെ വീണ്ടും ശിഥിലമാക്കും. സാങ്കേതിക വിദ്യ വളരുമ്പോഴും അതിലെ നൈതികത ഉറപ്പു വരുത്തുന്നതിനുള്ള ചട്ടക്കൂടുകള്‍ അടിയന്തരമായിത്തന്നെ നമുക്ക് ആവിഷ്കരിക്കേണ്ടതുണ്ട്.
യുദ്ധമുന്നണിയില്‍ എ ഐ
സൈനിക രംഗത്ത് നിര്‍മ്മിത ബുദ്ധിയുടെ പ്രയോഗം, പ്രത്യേകിച്ചും ഓഗ്മെന്‍റഡ് റിയാലിറ്റിയും വിര്‍ച്വല്‍ റിയാലിറ്റിയും പോലുള്ളവ ഉപയോഗിച്ചുള്ള സിമുലേഷന്‍, പ്രതിരോധ തന്ത്രങ്ങളില്‍ വിപ്ലവകരമായ മാറ്റങ്ങള്‍ക്ക് വഴി വച്ചിട്ടുണ്ട്. തന്ത്രപരമായി ഇത്തരം സാങ്കേതിക വിദ്യകള്‍ നമുക്ക് മേല്‍ക്കൈ നല്‍കുമെങ്കിലും അവയുടെ ഉപയോഗവും പ്രയോഗവും നൈതികമായ ചില ചോദ്യങ്ങള്‍ ഉയര്‍ത്തുന്നു. എ ഐ ഉപയോഗിച്ചുള്ള ആയുധ മല്‍സരം കൂടി കനക്കുന്നതോടെ രാജ്യാന്തര ബന്ധങ്ങള്‍ പലതും വീണ്ടും സങ്കീര്‍ണ്ണമാവും. സ്വയം നിയന്ത്രിത ആയുധങ്ങള്‍ സൃഷ്ടിക്കാനിടയുള്ള അപകടം തിരിച്ചറിഞ്ഞ് അവയ്ക്ക് നിയന്ത്രണം ഏര്‍പ്പെടുത്തണമെന്ന് ലോക സാമ്പത്തിക ഫോറം പോലുള്ള സംഘടനകള്‍ ആവശ്യപ്പെട്ടിട്ടുണ്ട്. രാഷ്ട്ര സുരക്ഷയ്ക്ക് എഐ ഉപയോഗിക്കുന്നതില്‍ തെറ്റില്ല. പക്ഷേ നാളെ സ്വയം നിയന്ത്രിത ആയുധങ്ങള്‍ ഉപയോഗിച്ച് ആളില്ലാ സംഘര്‍ഷങ്ങള്‍ പൊട്ടിപ്പുറപ്പെടുന്ന അരാജക അവസ്ഥ ഉണ്ടായിക്കൂടാ. അതിന് കൃത്യമായ അതിര്‍ വരമ്പുകള്‍ നിശ്ചയിക്കേണ്ടതുണ്ട്.
നിര്‍മ്മിത ബുദ്ധിയുടെ കാര്യത്തില്‍ മേധാവിത്വത്തിനായി ലോക രാഷ്ട്രങ്ങള്‍ നടത്തുന്ന മല്‍സരം കൈ ഫു ലീയുടെ ' എഐ സൂപ്പര്‍ പവേഴ്‌സ് : ചൈന, സിലിക്കണ്‍വാലി, ആന്‍ഡ് ദി ന്യൂ വേള്‍ഡ് ഓര്‍ഡര്‍' എന്ന പുസ്‌തകത്തില്‍ വ്യക്തമാക്കുന്നുണ്ട്. തന്ത്രപരമായി എഐ എത്രമാത്രം പ്രധാനമാണ് എന്ന് തെളിയിക്കുന്നതാണ് എഐ മേധാവിത്വത്തിന്‍റെ പേരില്‍ വന്‍ ശക്തികള്‍ തമ്മില്‍ നടക്കുന്ന സാങ്കേതിക ശീതയുദ്ധങ്ങളെന്ന് ലീ പുസ്‌തകത്തില്‍ വിവരിക്കുന്നു. ഒപ്പം ഈ ശീതയുദ്ധങ്ങള്‍ എങ്ങനെ ആഗോള തലത്തില്‍ അസ്ഥിരതയ്ക്ക് വഴിവയ്ക്കു‌ന്ന സംഘര്‍ഷമായി വളരാമെന്നും മുന്നറിയിപ്പ് നല്‍കുന്നു.
സാമ്പത്തിക മാറ്റങ്ങളും പാരിസ്ഥിതിക പരിഹാരവും
ഈ ആശങ്കകളൊക്കെ ഉണ്ടെങ്കിലും നല്ല മാറ്റങ്ങള്‍ കൊണ്ടു വരാനും നിര്‍മ്മിത ബുദ്ധിക്ക് കഴിവുണ്ടെന്നത് കാണാതിരുന്നു കൂടാ. പരിസ്ഥിതി സംരക്ഷണത്തില്‍ എഐ വിജയകരമായി പ്രയോജനപ്പെടുത്താം. ഫോസില്‍ ഇന്ധനങ്ങളില്‍ നിന്ന് ബദല്‍ ഇന്ധനങ്ങളിലേക്കുള്ള പരിവര്‍ത്തന പ്രക്രിയയില്‍ ബദല്‍ ഇന്ധനങ്ങള്‍ വികസിപ്പിക്കാനുള്ള അതിപ്രധാന ഘട്ടത്തില്‍ എഐ ഉപയോഗപ്പെടുത്താം. ലഭ്യമായ ഡാറ്റാ പരിശോധിച്ച് വിശകലനം ചെയ്‌ത് പുനരുപയോഗം ചെയ്യാവുന്ന ഊര്‍ജ ഉല്‍പ്പാദനത്തിനുള്ള മാര്‍ഗങ്ങള്‍ എഐ നിര്‍ദേശിക്കും. കാലാവസ്ഥാ വ്യതിയാനം ചെറുക്കാനുള്ള പോരാട്ടത്തില്‍ ഇതിന് വലിയൊരു പങ്ക് വഹിക്കാന്‍ കഴിയും.
ഡിജിറ്റല്‍ ബാങ്കിങ്ങിലും വിപ്ലവകരമായ മാറ്റങ്ങള്‍ കൊണ്ടു വരാന്‍ എഐക്ക് സാധിക്കും കൂടുതല്‍ കൃത്യത ഉറപ്പാക്കുന്നതിലും തട്ടിപ്പുകള്‍ കണ്ടുപിടിക്കുന്നതിലും വ്യക്തിഗത ഉപഭോക്തൃ സേവനങ്ങള്‍ ഉറപ്പു വരുത്തുന്നതിലും എഐക്ക് വലിയ പങ്ക് വഹിക്കാന്‍ സാധിക്കും. അതേ സമയം എഐ ഉപയോഗിച്ച് നടത്താനിടയുള്ള സാമ്പത്തിക തട്ടിപ്പുകള്‍ തടയാനുള്ള സൈബര്‍ സുരക്ഷാ നടപടികള്‍ കൂടി ഈ ഡിജിറ്റല്‍ പരിവര്‍ത്തനം നടക്കുന്ന വേളയില്‍ ആവശ്യമായി വരും.
അടുത്ത തലമുറ: വന്‍ ഭീഷണികളും സാധ്യതകളും
വരും തലമുറകള്‍ക്ക് എഐ തുറന്നു കൊടുക്കുന്നത് സമാനതകളില്ലാത്ത വിഭവങ്ങളും സാധ്യതകളുമാണ്. അതേസമയം അതിശക്തമായ വെല്ലുവിളിയും. ഡിജിറ്റല്‍ ദുരുപയോഗവും തെറ്റായ വസ്‌തുതകള്‍ പ്രചരിപ്പിക്കലും കുപ്രചാരണങ്ങളുമൊക്കെ ഉയര്‍ത്തുന്ന അപകടങ്ങള്‍ പെരുകിയേക്കാം. ഇത് ചെറുക്കാന്‍ യുവാക്കള്‍ക്കിടയില്‍ ഡിജിറ്റല്‍ സാക്ഷരതയും വിമര്‍ശനാത്മക ചിന്തയും വളര്‍ത്തണം. കുട്ടികളില്‍ വേറിട്ട പഠനാനുഭവങ്ങള്‍ നല്‍കിയും അനന്തമായ വിവര - വിജ്ഞാന ശേഖരത്തിലേക്ക് നയിച്ചും സാങ്കേതിക വിദ്യാ അധിഷ്‌ഠിതമായ ലോകത്തില്‍ മുന്നേറാനാവുന്ന തരത്തില്‍ പുതു തലമുറയെ നയിക്കാന്‍ വിദ്യാഭ്യാസ രംഗത്തെ എഐ ഇടപെടല്‍ വഴി സാധിക്കും.
വേണം സന്തുലിത നിലപാട്
ഉത്തരവാദിത്വത്തോടെയും ദീര്‍ഘവീക്ഷണത്തോടെയും നിര്‍മ്മിത ബുദ്ധിയുടെ ഗുണവശങ്ങളും അദ്ഭുതനേട്ടങ്ങളും ഉള്‍ക്കൊള്ളണം. നൈതിക നിര്‍മ്മിത ബുദ്ധി വികസനത്തിന് രാജ്യാന്തര സഹകരണവും സമഗ്രമായ പദ്ധതികളും അത്യാവശ്യമാണ്. മനുഷ്യന്‍റെ കഴിവുകളെ സാങ്കേതിക വിദ്യ ഇരട്ടിപ്പിക്കുന്ന യുഗത്തിലേക്കാണ് നാം കടക്കുന്നത്. അവിടെ നമ്മുടെ അടിസ്ഥാന മൂല്യങ്ങളും സുരക്ഷയും കൈമോശം വരാതെ നോക്കേണ്ടത് ആഗോള സമൂഹത്തിന്‍റെ കൂടി ആവശ്യമാണ്. നിര്‍മ്മിത ബുദ്ധി മുന്നോട്ടു വയ്ക്കു‌ന്ന നൂതന സാധ്യതകളും മനുഷ്യന്‍റെ അവിവേകവും സംബന്ധിച്ചുള്ള ചര്‍ച്ചകള്‍ ഇനിയും തുടരും. നിര്‍മ്മിത ബുദ്ധി നടത്തുന്ന കണ്ടെത്തലുകളെ കൂട്ടായ പ്രവര്‍ത്തനത്തിലൂടെയും വിവേക പൂര്‍ണ്ണമായ നീക്കങ്ങളിലൂടെയും മാനവ രാശിക്ക് ഗുണകരമാക്കി മാറ്റാനാവും.
Also Read: സ്‌മാര്‍ട്ട്സിറ്റി വികസനത്തിന് ജീവന്‍ വയ്ക്കുന്നു ; കേരളത്തില്‍ കണ്ണുവച്ച് ആഗോള ഐടി കമ്പനികള്‍
