ഭൂമിയിലെ അത്ഭുതം: അന്താരാഷ്‌ട്ര ബഹിരാകാശ നിലയത്തിൽ നിന്നും പകർത്തിയ കുംഭമേളയുടെ ചിത്രങ്ങൾ കാണാം

ബഹിരാകാശ നിലയത്തിൽ നിന്നും പകർത്തിയ കുംഭമേളയുടെ ചിത്രങ്ങൾ വൈറൽ. ബഹിരാകാശ യാത്രികനായ ഡോൺ പെറ്റിറ്റ് ആണ് ചിത്രങ്ങൾ പങ്കുവെച്ചത്.

ഹൈദരാബാദ്: ലോകത്തിൽ തന്നെ ഏറ്റവും കൂടുതൽ പേർ ഒത്തുകൂടുന്ന മഹാകുംഭമേള ഉത്തർപ്രദേശിലെ പ്രയാഗ്‌രാജിൽ നടന്നുകൊണ്ടിരിക്കുകയാണ്. ഉത്തർപ്രദേശ് സർക്കാരിന്‍റെ കണക്കനുസരിച്ച് ഇതുവരെ 140 ദശലക്ഷത്തിലധികം ആളുകൾ പ്രയാഗ്‌രാജിലുള്ള സംഗമ ത്രിവേണിയിൽ പുണ്യസ്‌നാനം ചെയ്‌തിട്ടുണ്ട്. കുംഭമേളയുടെ അന്താരാഷ്‌ട്ര ബഹിരാകാശ നിലയത്തിൽ നിന്നുള്ള ചിത്രങ്ങൾ സമൂഹമാധ്യമങ്ങളിൽ വൈറലാവുകയാണ് ഇപ്പോൾ.

ഭൂമിയിൽ നിന്ന് മാത്രമല്ല, കുംഭമേളയുടെ ബഹിരാകാശത്തുനിന്നുള്ള ചിത്രങ്ങളും ദശലക്ഷക്കണക്കിന് ആളുകളുടെ ശ്രദ്ധ ആകർഷിച്ചിരിക്കുകയാണ്. അന്താരാഷ്ട്ര ബഹിരാകാശ നിലയത്തിൽ കഴിയുന്ന നാസയുടെ ബഹിരാകാശയാത്രികനായ ഡോൺ പെറ്റിറ്റ് ആണ് കുംഭമേളയുടെ ആകാശ ചിത്രങ്ങൾ തന്‍റെ എക്‌സ് പേജിലൂടെ പങ്കുവച്ചത്. ആസ്‌ട്രോ ഫോട്ടോഗ്രഫിയിൽ പേരുകേട്ട പെറ്റിറ്റ് ഗംഗാനദിയുടെ തീരത്തുനിന്നുള്ള ദീപാലങ്കാരങ്ങളുടെ രാത്രി ദൃശ്യങ്ങളാണ് പങ്കുവച്ചത്. ലോകത്തിൽ ഏറ്റവും കൂടുതൽ പേർ ഒത്തുകൂടുന്നതിന്‍റെ പ്രകാശമെന്നാണ് പെറ്റിറ്റ് എക്‌സിൽ കുറിച്ചത്.

2025 Maha Kumbh Mela Ganges River pilgrimage from the ISS at night. The largest human gathering in the world is well lit. pic.twitter.com/l9YD6o0Llo

— Don Pettit (@astro_Pettit) January 26, 2025

ഭൂമിക്ക് മുകളിലൂടെ മണിക്കൂറിൽ 28,000 കിലോമീറ്റർ വേഗതയിലാണ് ഐഎസ്‌എസ്‌ ഭ്രമണം ചെയ്യുന്നത്. അന്താരാഷ്‌ട്ര ബഹിരാകാശ നിലയത്തിലെ ഉയർന്ന പവറുള്ള ക്യാമറയിൽ നിന്നാണ് ഈ ചിത്രങ്ങൾ പകർത്തിയിരിക്കുന്നത്. ഡോൺ പെറ്റിറ്റിനൊപ്പം സുനിത വില്യംസും ബുച്ച് വിൽമോറും ഉൾപ്പെടെ അന്താരാഷ്‌ട്ര ബഹിരാകാശ നിലയത്തിലുണ്ട്.

2025 Maha Kumbh Mela Spectacular Images (X/@Don Pettit)

രാജ്യത്തെ ഏറ്റവും വലിയ ഹൈന്ദവ തീര്‍ഥാടന സംഗമമാണ് കുംഭമേള. 12 വർഷത്തിലൊരിക്കെ മാത്രം നടക്കുന്ന മഹാകുംഭമേളയാണ് ഇപ്പോൾ നടന്നുകൊണ്ടിരിക്കുന്നത്. ജനുവരി 13ന് ആരംഭിച്ച കുംഭമേള 26 ഫെബ്രുവരി വരെയാണ് നടക്കുക. 45 ദിവസം നീണ്ടുനിന്ന പരിപാടിയിൽ വൈദ്യുതി ഉറപ്പാക്കാനായി യുപി സർക്കാർ നിരവധി കാര്യങ്ങൾ ചെയ്‌തിട്ടുണ്ട്. 182 കിലോമീറ്റർ ഹൈടെൻഷൻ ലൈനുകൾ, 40,000 റീചാർജ് ചെയ്യാവുന്ന ബൾബുകൾ, 2,700 സിസിടിവി ക്യാമറകൾ, അണ്ടർവാട്ടർ ഡ്രോണുകൾ തുടങ്ങിയ നിരവധി സജ്ജീകരണങ്ങൾ നടത്തിയിട്ടുണ്ട്.

2025 Maha Kumbh Mela Spectacular Images (X/@Don Pettit)