തിരുവനന്തപുരം: തൃശൂര്‍ പൂരം കലക്കിയ സംഭവത്തില്‍ ശരിയായ അന്വേഷണം നടത്തിയാല്‍ മുഖ്യമന്ത്രി പിണറായി വിജയനായിരിക്കും ഒന്നാം പ്രതിയെന്ന് പ്രതിപക്ഷ നേതാവ് വിഡി സതീശന്‍. അതിനാല്‍ ഈ സര്‍ക്കാര്‍ നടത്തുന്ന ഒരു തരത്തിലുള്ള അന്വേഷണവും അംഗീകരിക്കില്ലെന്നും ഇക്കാര്യത്തില്‍ സര്‍ക്കാര്‍ ജുഡീഷ്യല്‍ അന്വേഷണം പ്രഖ്യാപിക്കണമെന്നും അടിയന്തര പ്രമേയ ചര്‍ച്ചയില്‍ പ്രതിപക്ഷ നേതാവ് ആവശ്യപ്പെട്ടു.
പ്രതിപക്ഷ നേതാവിന്‍റെ വാക്കുകൾ
തൃശൂര്‍ പൂരം കലക്കല്‍ എന്നത് പ്രതിപക്ഷം സൃഷ്‌ടിച്ച പുകമറയാണെന്നു പറയുന്ന മന്ത്രി എം ബി രാജേഷിനോട് ചോദിക്കാനുള്ളത് ഒരു പുകമറയില്‍ എന്തിനാണ് സര്‍ക്കാര്‍ ത്രിതല അന്വേഷണം നടത്തുന്നതെന്നാണ്. പ്രതിപക്ഷം ഉണ്ടാക്കുന്ന പുകമറയില്‍ എന്തിനാണ് സര്‍ക്കാരിന്‍റെ ത്രിതല അന്വേഷണം. തൃശൂര്‍ എംഎല്‍എയും സിപിഐ നേതാവുമായ പി ബാലചന്ദ്രന്‍ പറയുന്നത് പൂരം കലക്കിയതാണെന്നാണ്. സാധാരണ നടക്കുന്നതു പോലെയായിരുന്നോ ഇത്തവണ പൂരം നടന്നത്. അല്ല, പൂരം കലക്കി. മൂന്നു ദിവസം മുന്‍പേ പൊലീസിന് ഒരു പ്ലാന്‍ ഉണ്ടാകുമെന്ന് ദേവസ്വം മന്ത്രിക്കറിയാമല്ലോ. അങ്ങനെ ഒരു പ്ലാനുമായി സിറ്റി പൊലീസ് കമ്മിഷണര്‍ എഡിജിപി വിളിച്ച യോഗത്തില്‍ മൂന്നു ദിവസം മുന്‍പ് പോയി. എന്നാല്‍ അതിനു പകരം ഒരു പുതിയ പ്ലാന്‍ എഡിജിപി സിറ്റി പൊലീസ് കമ്മിഷണര്‍ക്കു നല്‍കി. ഈ പ്ലാന്‍ നടപ്പാക്കിയാല്‍ മതിയെന്നു പറയുന്നു. ആ പ്ലാന്‍ പൂരം നന്നാക്കാനുള്ള പ്ലാനായിരുന്നോ പൂരം കലക്കാനുള്ള പ്ലാനായിരുന്നോ എന്നതാണ് കാര്യം.
വെടിക്കെട്ടിന്‍റെയല്ല പ്രശ്‌നം, രാവിലെ 11ന് മഠത്തില്‍ വരവ് മുതല്‍ പ്രശ്‌നം തുടങ്ങി. കണിമംഗലം ശാസ്‌താവിന്‍റെ എഴുന്നള്ളിപ്പ് ചെല്ലുമ്പോള്‍ റൗണ്ട്‌സിനു ചുറ്റും വാഹനങ്ങളായിരുന്നു. ഒരിക്കലും ഇവിടെ ഈ സമയത്ത് വാഹനങ്ങളുണ്ടാകാറില്ല. പ്രൈവറ്റ് ബസു വരെ റൗണ്ട്‌സ് വഴി ഓടിക്കൊണ്ടിരിക്കുന്നു. വല്ലാതെ പ്രയാസപ്പെട്ടാണ് കണിമംഗലം ശാസ്‌താവ് അകത്തു പ്രവേശിച്ചത്. വൈകിട്ട് 5 ന് തെക്കോട്ടിറക്കം പ്രശ്‌നമായിരുന്നു. വെളുപ്പിനു നടക്കുന്ന വെടിക്കെട്ടിന് രാത്രി 8 മണിക്ക് ആളുകള്‍ക്ക് സഞ്ചരിക്കാനാകാത്ത വിധം എല്ലാ എന്‍ട്രികളും ബാരിക്കേഡ് വച്ചു തടഞ്ഞു. ആളുകളുടെ സഞ്ചാരം തടസപ്പെട്ടതോടെ പൂരം കാണാനെത്തിയവര്‍ ബഹളം തുടങ്ങി.
മനപൂര്‍വ്വം രാത്രി എല്ലാ എന്‍ട്രികളും ബാരിക്കേഡുവച്ചു തടഞ്ഞു. മൂന്നു സ്ഥലത്ത് പൂരം കാണാനെത്തിയ സാധാരണക്കാരെ പൊലീസ് ലാത്തിചാര്‍ജ് ചെയ്‌തു. ദേവസ്വം ഉദ്യോഗസ്ഥരെ പൊലീസ് തള്ളിമാറ്റി. ജനപ്രതിനിധികളോട് പൊലീസ് മോശമായി പെരുമാറി. ആനയ്ക്ക് പട്ട കൊണ്ടു പോയവരെ തടുത്തു. കുടമാറ്റത്തിനുള്ള കുട കൊണ്ടു പോയവരെ തടഞ്ഞു. ദേവസ്വം ഉദ്യോഗസ്ഥരെ തടഞ്ഞു. പൂര ദിവസം രാവിലെ മുതല്‍ പിറ്റേ ദിവസം രാവിലെ വരെ പൊലീസ് അഴിഞ്ഞാടി.
അത് തെളിവു സഹിതം ബോധ്യമായപ്പോള്‍ സര്‍ക്കാര്‍ കമ്മിഷണറെ മാറ്റി. അവിടെയാണ് പ്രധാന പ്രശ്‌നം. ഇവിടെ കമ്മിഷണര്‍ മാത്രമാണോ ഉണ്ടായിരുന്നത്. അതിനു മേലെ ക്രമസമാധാന ചുമതലയുള്ള എഡിജിപി എം ആര്‍ അജിത്കുമാര്‍ അവിടെയുണ്ടായിരുന്നു. കമ്മിഷണര്‍ അഴിഞ്ഞാടിയെങ്കില്‍ ഏതെങ്കിലും സമയത്ത് ഈ എഡിജിപി അവിടെ ഇടപെട്ടോ. പൂരം കലക്കാനുള്ള ബ്ലൂ പ്രിന്‍റ് തയ്യാറാക്കിയ എഡിജിപി എങ്ങനെ ഈ പ്രശ്‌നത്തില്‍ ഇടപെടും. എന്നിട്ടും എഡിജിപിയോടു സര്‍ക്കാര്‍ ചോദിച്ചില്ല. പട്ടില്‍ പൊതിഞ്ഞ ഒരു ശകാരം പോലും സർക്കാര്‍ എഡിജിപിക്കു നല്‍കിയില്ല. ഇത്രയും പ്രശ്‌നങ്ങളുണ്ടായിട്ടും എന്തു കൊണ്ട് ആഭ്യന്തര വകുപ്പിന്‍റെ ചുമതലയുള്ള മുഖ്യമന്ത്രി ഇതറിഞ്ഞില്ല.
വിവരം കിട്ടിയില്ലെങ്കില്‍ ആ ഇന്‍റലിജന്‍സ് അങ്ങു പിരിച്ചു വിടുന്നതാണ് നല്ലത്. ഇത് മുഖ്യമന്ത്രി അറിഞ്ഞില്ലെന്ന കാര്യം വിശ്വാസിക്കാന്‍ കഴിയില്ല. ഇത്രയും സംഭവങ്ങളുണ്ടായിട്ട് കമ്മിഷണറെയോ എഡിജിപിയെയോ മുഖ്യമന്ത്രിയുടെ ഓഫീസില്‍ നിന്ന് ആരെങ്കിലും വിളിച്ചോ. അവിടെയാണ് ഒരു ഗൂഢാലോചന സംശയിക്കേണ്ടത്. കണിമംഗംലം ശാസ്‌താവിന്‍റെ എഴുന്നള്ളത്തും മഠത്തില്‍ വരവുമൊക്കെ തടസപ്പെട്ടപ്പോള്‍ വേറൊരെഴുന്നള്ളിപ്പ് അതാ സേവാ ഭാരതി ആംബുലന്‍സില്‍ വരുന്നു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
വത്സന്‍ തില്ലങ്കേരി എന്ന ആര്‍എസ്എസ്‌കാരനൊപ്പം മുന്നില്ലും പിന്നിലും പൊലീസുമായി ബിജെപിയുടെ സ്ഥാനാര്‍ത്ഥി രക്ഷകവേഷത്തില്‍ എത്തി. വത്സന്‍ തില്ലങ്കേരിക്കു കൂടിയാണ് എസ്‌കോര്‍ട്ട്. സ്ഥലത്തുണ്ടായിരുന്ന മന്ത്രിമാരോട് അങ്ങോട്ടു പോകരുതെന്ന് പൊലീസ് നിര്‍ദ്ദേശം കൊടുത്തു. പൊലീസ് അങ്ങനെ പറയുമ്പോള്‍ മന്ത്രിമാരോ ജനപ്രതിനിധികളോ ഇത്തരം സ്ഥലങ്ങളില്‍ നിന്നു മാറി നില്‍ക്കുന്നതിന് അവരെ കുറ്റപ്പെടുത്താനാകില്ല. മന്ത്രിമാരോട് പൊലീസ് പോകരുതെന്നു പറഞ്ഞിടത്തേക്ക് മുമ്പിലും പിറകിലും പൊലീസ് അകമ്പടിയോടെ സിനിമയില്‍ വരുന്നതിനേക്കാള്‍ ഗംഭീരമായി സുരേഷ് ഗോപി വരുന്ന തരത്തിലുള്ള ഗൂഢാലോചനയുടെ തിരക്കഥ അണിയിച്ചൊരുക്കിയതാരാണ്.
ദേവസ്വം പ്രസിഡന്‍റിന് പോലും കടക്കാന്‍ പൊലീസ് അനുവദിക്കാത്തപ്പോഴാണിത് എന്നോര്‍ക്കണം. അവിടെയാണ് ബിജെപി സ്ഥാനാര്‍ത്ഥിയെ കടത്തിവിട്ടത്. ഇതാണ് തൃശൂരില്‍ നടന്നത്. 12 മണിവരെ പ്രദര്‍ശന നഗരിയില്‍ നിന്നു സാധാരണ ടിക്കറ്റു നല്‍കാറുണ്ടെങ്കില്‍ ഇത്തവണ 10 മണിക്കു നിര്‍ത്തി. ആനയെ പരിശോധിക്കണമെന്നു പറഞ്ഞ് പൊലീസ് വാശിപിടിക്കുകയാണ്. ഏതെല്ലാം രീതിയില്‍ തടസപ്പെടുത്താമോ അതെല്ലാം ചെയ്‌തു. ഇതു സംബന്ധിച്ച് ഒരാഴ്‌ചയ്ക്കുള്ളില്‍ റിപ്പോര്‍ട്ട് വേണമെന്ന് മുഖ്യമന്ത്രി ഡിജിപിക്ക് നിര്‍ദ്ദേശം നല്‍കി. 5 മാസമായിട്ട് റിപ്പോര്‍ട്ടു കൊടുത്തില്ല. എന്നിട്ട് മുഖ്യമന്ത്രി റിപ്പോര്‍ട്ട് ചോദിച്ചോ.
ഇതു സംബന്ധിച്ച വിവരാവകാശ ചോദ്യം വന്നപ്പോള്‍ സത്യസന്ധനായ ഡിവൈഎസ്‌പി ഒരന്വേഷണവും നടക്കുന്നില്ലെന്നു പറഞ്ഞതോടെ അദ്ദേഹത്തെ സസ്‌പെന്‍ഡു ചെയ്‌തു. ഡിവൈഎസ്‌പിയെ കുറിച്ച് അന്വേഷിക്കുന്നതിനാലാണ് സസ്‌പെന്‍ഷന്‍ എന്നാണ് അതിനു കാരണം പറഞ്ഞത്. എന്നാല്‍ ഒരു ഡസനിലധികം കേസുകളില്‍ അന്വേഷണം നേരിടുന്ന അജിത്കുമാറിനെ കുറിച്ച് അന്വേഷിക്കുമ്പോള്‍ അദ്ദേഹം അതേ സ്ഥാനത്തു തന്നെയിരിക്കും. കുറ്റവാളിയെക്കൊണ്ടു തന്നെ ഇക്കാര്യത്തില്‍ അന്വേഷണം നടത്തി റിപ്പോര്‍ട്ടു കൊടുക്കാന്‍ നിയോഗിക്കുന്ന സര്‍ക്കാരിനു നാണമുണ്ടോ.
സര്‍ക്കാരിന് ഇക്കാര്യത്തില്‍ ഒരാത്മാര്‍ത്ഥതയുമില്ല. അതു കൊണ്ടാണ് ഇക്കാര്യത്തില്‍ ഒരു ഗൂഢാലോചന നടന്നുവെന്ന് പ്രതിപക്ഷം ആരോപിക്കുന്നത്. ഈ ഗൂഢാലോചനയില്‍ സര്‍ക്കാര്‍ പങ്കാളിയല്ലായിരുന്നെങ്കില്‍ അന്ന് ഉച്ചയ്ക്കു മുന്‍പ് ഈ പ്രശ്‌നം അവസാനിക്കുമായിരുന്നു. ഈ ഗൂഢാലോചനയില്‍ മുഖ്യമന്ത്രി ഉള്‍പ്പെടെ പങ്കാളികളാണ്. മുഖ്യമന്ത്രിക്കു കീഴിലുള്ള ഒരന്വേഷണവും പ്രതിപക്ഷത്തിനു സ്വീകാര്യമല്ല. ഇതന്വേഷിച്ചാല്‍ ഇതില്‍ ഒന്നാം പ്രതിയാകേണ്ടയാള്‍ കേരളത്തിന്‍റെ മുഖ്യമന്ത്രി പിണറായി വിജയനാണ്. ആര്‍എസ്എസ് ആണ് പൂരം കലക്കിയതെങ്കില്‍ സര്‍ക്കാര്‍ 5 മാസം എന്തു ചെയ്യുകയായിരുന്നു.
വത്സന്‍ തില്ലങ്കേരിയുടെ നേതൃത്വത്തില്‍ ആര്‍എസ്എസ് ആണ് പൂരം കലക്കിയതെങ്കില്‍ സര്‍ക്കാര്‍ ഒരു എഫ്‌ഐആര്‍ എന്തുകൊണ്ടെടുത്തില്ല. ഇതിനു സര്‍ക്കാരിനു മറുപടിയില്ല. ഇതു മറയ്ക്കാനാണ് മലപ്പുറം ജില്ല രൂപീകരിച്ചതിനെക്കുറിച്ചും തലശേരി കലാപത്തെ കുറിച്ചുമൊക്കെ പറഞ്ഞ് ശ്രദ്ധ തിരിക്കാന്‍ ശ്രമിക്കുന്നത്. ക്ഷേത്രം, അമ്പലം, ഹിന്ദു എന്നൊക്കെ പറയുന്ന ബിജെപിക്കാര്‍ പൂരം കലക്കുന്നതിനു കൂട്ടുനില്‍ക്കുകയായിരുന്നു. അവരും വിചാരണ ചെയ്യപ്പെടുമെന്നും സതീശന്‍ നിയമസഭയില്‍ പറഞ്ഞു.
