തിരുവനന്തപുരം സ്‌മാര്‍ട്ട് സിറ്റി 2.0 ലേക്കും തിരഞ്ഞെടുക്കപ്പെട്ടു; മാലിന്യ സംസ്‌കരണം പ്രധാന ലക്ഷ്യം

സ്‌മാർട്ട്‌ സിറ്റി 1.0 ൽ ഉൾപ്പെടുത്തി 1135 കോടി രൂപയുടെ പദ്ധതികള്‍ നഗരത്തിൽ നടത്തിവരുന്നുണ്ട്.

തിരുവനന്തപുരം : കേന്ദ്ര നഗര മന്ത്രാലയത്തിന്‍റെ സ്‌മാർട്ട്‌ സിറ്റി 2.0 ലേക്കും തിരുവനന്തപുരം നഗരസഭയെ തിരഞ്ഞെടുത്തു. സ്‌മാർട്ട്‌ സിറ്റി 1.0 യിൽ 100 നഗരങ്ങളെയായിരുന്നു തിരഞ്ഞെടുത്തത്. ഇത്തവണ ഇതിൽ നിന്നും 36 നഗരങ്ങളെ ആദ്യ ഘട്ടത്തിൽ ഷോർട്ട് ലിസ്റ്റ് ചെയ്യുകയും ഷോർട്ട് ലിസ്റ്റിൽ നിന്നും ഇന്‍റര്‍വ്യൂവിലൂടെ 18 നഗരങ്ങളെ തിരഞ്ഞെടുക്കുകയുമായിരുന്നു.

സ്‌മാർട്ട്‌ സിറ്റി സി ഇ ഒ അഫ്‌സാന പർവീൺ ഐ എ എസ്, നഗരസഭാ സെക്രട്ടറി ബിനു ഫ്രാൻസിസ് എന്നിവരുമാണ് നഗരസഭക്ക് വേണ്ടി കേന്ദ്ര നഗര മന്ത്രാലയത്തിന്‍റെ ഇന്‍റര്‍വ്യൂവിൽ പങ്കെടുത്തത്. സംസ്ഥാനത്ത് നിന്നും തിരുവനന്തപുരത്തെ മാത്രമാണ് സ്‌മാർട്ട്‌ സിറ്റി 2.0 ലേക്ക് തിരഞ്ഞെടുത്തത്.

സ്‌മാർട്ട്‌ സിറ്റി 1.0 ൽ ഉൾപ്പെടുത്തി 1135 കോടി രൂപയുടെ പദ്ധതികളാണ് നഗരത്തിൽ നടപ്പിലാക്കി വരുന്നത്. അടുത്ത ഘട്ടമായ സ്‌മാർട്ട്‌ സിറ്റി 2.0 ൽ മാലിന്യ പരിപാലന പദ്ധതികളാണ് പ്രധാനമായി നഗരസഭ ലക്ഷ്യമിടുന്നത്. സ്‌മാർട്ട്‌ സിറ്റി 1.0 ഈ വർഷം ജൂണിൽ അവസാനിക്കും.

തുടങ്ങി വെച്ച് പദ്ധതികൾ ഇതിനകം പൂർത്തിയാക്കണം. സ്‌മാർട്ട്‌ സിറ്റി 2.0 ൽ നഗരത്തിലെ തോടുകളുടെ നവീകരണം, ഹരിത കർമ്മ സേനയെ ശക്തിപ്പെടുത്തൽ, വൻ കിട മലിന ജല പ്ലാന്‍റുകൾ ഉൾപ്പെടെ വൻ പദ്ധതികളാണ് നഗരസഭ ലക്ഷ്യമിടുന്നതെന്ന് നഗരസഭാ ആരോഗ്യ സെക്രട്ടറി ഇ ടി വി ഭാരതിനോട് പറഞ്ഞു.

സ്‌മാർട്ട്‌ സിറ്റി പദ്ധതിയുടെ മൂന്നാം ഘട്ടത്തിൽ 2017 ലാണ് തിരുവനന്തപുരം നഗരസഭയെ ആദ്യം തിരഞ്ഞെടുക്കുന്നത്. രണ്ട് വർഷത്തിനകം ഇതു പൂർത്തിയാകേണ്ടതായിരുന്നു. എന്നാൽ 2019-20 ൽ കോവിഡിന്‍റെ പശ്ചാത്തലത്തിൽ പദ്ധതികളുടെ പൂർത്തീകരണത്തിനായി 2024 ജൂൺ വരെ കേന്ദ്ര നഗര മന്ത്രാലയം സമയം നീട്ടി നൽകുകയായിരുന്നു.