തൃശൂർ: ആന എഴുന്നള്ളിപ്പിൽ ഹൈക്കോടതി പുറത്തിറക്കിയ മാർഗരേഖക്കെതിരെ തിരുവമ്പാടി ദേവസ്വം. നിലവിലെ മാര്‍ഗരേഖ പ്രകാരണെങ്കിൽ തൃശൂര്‍ പൂരത്തിൽ മഠത്തില്‍ വരവടക്കം നടത്താന്‍ കഴിയില്ലെന്ന് തിരുവമ്പാടി ദേവസ്വം സെക്രട്ടറി കെ ഗിരീഷ് കുമാര്‍ പറഞ്ഞു. പൂരം അലങ്കോലപ്പെട്ട സംഭവത്തിൽ സർക്കാർ പ്രഖ്യാപിച്ച ത്രിതല അന്വേഷണത്തിന്‍റെ ഭാഗമായി തൃശൂരിൽ നടന്ന മൊഴിയെടുപ്പിന് ശേഷം മാധ്യമങ്ങളോട് സംസാരിക്കുകയായിരുന്നു ഗിരീഷ് കുമാർ
ആനകളുടെ അടുത്തുനിന്ന് എട്ടു മീറ്റർ ദൂരം എന്നത് പൂരത്തിന്‍റെ എല്ലാ ചടങ്ങുകളെയും തടസപ്പെടുത്തും. ആനകള്‍ തമ്മില്‍ നിശ്ചിത അകലം പാലിക്കണമെന്ന നിർദേശം മഠത്തിൽ വരവ്, ഇലഞ്ഞിത്തറമേളം, തൃശൂർ പൂരം എന്നിവയെ തകർക്കുന്നതാണ്. ആനയിൽ നിന്നും മുൻപിൽ നിന്നാണോ പിറകിൽ നിന്നാണോ എട്ടു മീറ്റർ പാലിക്കേണ്ടത് എന്ന് ഉത്തരവിൽ വ്യക്തതയില്ല. ഇങ്ങനെ പോയാൽ തൃശൂർ പൂരം പാടത്തേക്ക് മാറ്റേണ്ട അവസ്ഥയാണെന്നും അദ്ദേഹം പറഞ്ഞു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
ഒരു വർഷം ഒരു ആന 85 പൂരം വരെയാണ് ശരാശരി എടുക്കാറുള്ളത്. ബാക്കി 280 ദിവസങ്ങളിലും വിശ്രമം ആണെന്നിരിക്കെ 24 മണിക്കൂർ വിശ്രമം വേണമെന്നത് അപ്രായോഗികമാണെന്നും അദ്ദേഹം കൂട്ടിചേർത്തു. ഇത്തരം ഉത്തരവുകൾ ആനകളുടെ ചെലവുപോലും കണ്ടെത്താൻ കഴിയാത്ത സാമ്പത്തിക പ്രതിസന്ധിയിലേക്ക് കാര്യങ്ങൾ കൊണ്ടുപോകുമെന്നും ഗിരീഷ് കുമാര്‍ പറഞ്ഞു.
തൃശൂർ കളക്‌ടർക്കെതിരെയും ആരോപണം
തൃശൂർ പൂരം അലങ്കോലപ്പെട്ട സംഭവത്തിൽ അന്നത്തെ തൃശൂർ ജില്ലാ കളക്‌ടർ ആയിരുന്ന ബി ആർ കൃഷ്‌ണതേജയ്ക്കെതിരെയുെം തിരുവമ്പാടി ദേവസ്വം ആരോപണം ഉന്നയിച്ചു. പൂരം അലങ്കോലപ്പെട്ട രാത്രിയിൽ കളക്‌ടറെ ഫോണിൽ വിളിച്ചിട്ടും പ്രശ്‌നം ചർച്ച ചെയ്യാൻ എത്തിയില്ലെന്ന് ഗിരീഷ് കുമാർ ആരോപിച്ചു. വെടിക്കെട്ട് മാഗസിൻ പൊലീസ് അടച്ചപ്പോൾ റവന്യൂ ഉദ്യോഗസ്ഥർ ഉണ്ടായിരുന്നില്ല. കളക്‌ടർ വന്നിരുന്നെങ്കിൽ പ്രശ്‌നം ഒത്തുതീർപ്പായേനെ എന്നും ഗിരീഷ് കുമാർ പറഞ്ഞു.
