കാസർകോട്: കവർച്ചയുടെ ഭീതിയിലാണ് കാസർകോട് ജില്ലയിലെ ആരാധനാലയങ്ങൾ. കഴിഞ്ഞ രണ്ട് ദിവസത്തിനിടെ ആറിടങ്ങളിലാണ് കവര്‍ച്ച നടന്നത്. ഇതിന് പിന്നില്‍ ആരാധനാലയങ്ങള്‍ കേന്ദ്രീകരിച്ച് കവര്‍ച്ച നടത്തുന്ന തിരുടര്‍ സംഘമാണെന്നാണ് പൊലീസിന് ലഭിക്കുന്ന സൂചന.
കാസർകോട്, മഞ്ചേശ്വരം മേഖലകളിലെ ആരാധനലായങ്ങളിലാണ് കവർച്ചയും കവർച്ചാശ്രമവും നടന്നത്. പ്രധാനമായും ക്ഷേത്ര ഭണ്ഡാരങ്ങളാണ് ഇക്കൂട്ടർ പൊളിക്കുന്നത്. മോഷണങ്ങൾക്കെല്ലാം പിന്നിൽ ഒരു സംഘം തന്നെയാണെന്ന് പൊലീസ് സംശയിക്കുന്നു.
ഇതിനിടയിൽ വ്യാപാര സ്ഥാപനങ്ങളും വീടുകളും കുത്തിത്തുറന്നുള്ള കവർച്ചയും നടക്കുന്നുണ്ട്. നാല് വ്യാപാര സ്ഥാപനങ്ങളിലും രണ്ട് വീടുകളിലും മോഷണം നടന്നിട്ടുണ്ട്.
എടനീരിലെ വിഷ്‌ണുമംഗലം ക്ഷേത്രത്തിൽ ഭണ്ഡാരം പൊളിച്ച് കവർച്ച നടന്നു. മഞ്ചേശ്വരം വൊർക്കാടി പാവളയിൽ പള്ളിയുടെ പ്രാർഥനാകേന്ദ്രത്തിലെ നേർച്ചപ്പെട്ടി കുത്തിത്തുറന്നു. കൊറഗജ്ജ ദൈവസ്ഥാനത്തിന്‍റെ ഭണ്ഡാരപ്പെട്ടിയും പൊളിച്ചു. മാന്യ അയ്യപ്പ ഭജന മന്ദീരത്തിലും നെല്ലിക്കട്ട ശ്രീ നാരായണ ഗുരു മന്ദിരത്തിലും കവർച്ച നടന്നു.
അടുത്തടുത്ത സ്ഥലങ്ങളിൽ മണിക്കൂറുകളുടെ ഇടവേളയിലാണ് മോഷണം നടന്നത്. ഒരു സ്ഥലത്ത് എത്തിയാൽ ആ പ്രദേശത്തെ ആരാധനാലയങ്ങൾ ലക്ഷ്യമിട്ടാണ് കവർച്ച. ഒറ്റപ്പെട്ടുകിടക്കുന്ന കടകളും കവർച്ചാസംഘം കൊള്ളയടിക്കുന്നു.
കവർച്ച നടന്ന സ്ഥലങ്ങളിലെ സിസിടിവി ദൃശ്യങ്ങൾ പരിശോധിച്ചാണ് പൊലീസ് അന്വേഷണം നടക്കുന്നത്. എന്നാൽ, പലയിടത്തും സിസിടിവി ക്യാമറകളില്ലാത്തത് പ്രതിസന്ധി ഉണ്ടാക്കുന്നു. ഉത്സവകാലം ആയതോടെ ക്ഷേത്രങ്ങളിലും മറ്റ് ആരാധനാലയങ്ങളിലും ഭണ്ഡാരങ്ങളിൽ നിന്ന് ദിവസേന പണം എടുത്തുമാറ്റാറില്ല.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
ഉത്സവാഘോഷം കഴിഞ്ഞാണ് ഭണ്ഡാരവരവ് തിട്ടപ്പെടുത്തുന്നത്. അതിനാൽ ഭണ്ഡാരത്തിൽ പണം ഉണ്ടായിരുന്നു. ഏഴു ലക്ഷം രൂപയുടെ നഷ്‌ടപ്പെട്ടിട്ടുണ്ടെന്നാണ് ലഭിക്കുന്ന വിവരം. സംഭവത്തിൽ അന്വേഷണം ഊർജിതമായി നടക്കുന്നുണ്ടെന്ന് പൊലീസ് അറിയിച്ചു.
