കോഴിക്കോട്: തിക്കോടി കടപ്പുറത്ത് തിരയിൽപെട്ട് കൂടെയുണ്ടായിരുന്ന നാല് പേർ മരിച്ച സംഭവത്തിൽ ഞെട്ടൽ മാറാതെ രക്ഷപ്പെട്ട ജിൻസി. ജിൻസിയുൾപ്പെടെ 5 പേരാണ് കൈ കോർത്തുപിടിച്ച് കടലിലിറങ്ങിയത്. ഒപ്പമുണ്ടായിരുന്ന നാല് പേർ ഇപ്പോൾ ഇല്ല. ആ ദുരന്തത്തെ കുറിച്ച് വിറയലോടെ മുണ്ടേരി നെടുങ്ങോട് സ്വദേശിനി ജിൻസി (27) പറയുകയാണ്.
''ഞങ്ങൾ ഒന്നിച്ചാണ് കടലിലേക്ക് ഇറങ്ങിയത്.. സാധാരണ ഇറങ്ങുന്നത് പോലെ തന്നെയാണ് വെള്ളത്തിലേക്ക് ഇറങ്ങിയത്. കുറച്ച് മുന്നോട്ട് പോയപ്പോഴും കുഴപ്പമൊന്നും തോന്നിയില്ല. അപ്പോഴാണ് വലിയൊരു തിരയടിച്ചത്. എല്ലാരും വേർപെട്ട് പോയി. എത്ര നീന്തിയിട്ടും മുന്നോട്ട് കരയിലേക്ക് വരാൻ പറ്റിയില്ല. ആഴത്തിലേക്ക് താഴ്ന്ന് പോയി... അവര് വിളിക്കുന്നത് ഞാൻ കണ്ടിരുന്നു. ആരോ വന്നിട്ട് എന്നെ പിടിച്ചത് ഓർമ്മയുണ്ട്. പക്ഷേ അവരൊക്കെ പോയില്ലേ" സങ്കടം അടക്കാനാവാതെ ജിൻസി പറഞ്ഞു.
കോഴിക്കോട് തിക്കോടി കല്ലകത്ത് ബീച്ചിലാണ് ഞായറാഴ്‌ച 4 വിനോദസഞ്ചാരികൾ തിരയിൽപ്പെട്ടു മരിച്ചത്. വയനാട് കൽപ്പറ്റ സ്വദേശികളായ വാണി, അനീസ, വിനീഷ്, ഫൈസൽ എന്നിവരാണ് മരിച്ചത്. രക്ഷപ്പെട്ട ജിൻസി ചികിത്സയിലാണ്. കൽപ്പറ്റ ബോഡി ഷേപ്പ് എന്ന ജിമ്മിലെ 26 അംഗ സംഘമാണ് കടൽ കാണാനെത്തിയത്. ഇവരിൽ 5 പേർ കടലിൽ ഇറങ്ങുകയായിരുന്നു. തിരയിൽപെട്ടവരിൽ ജിൻസി അത്ഭുതകരമായി രക്ഷപ്പെട്ടു.
നാട്ടുകാരും മത്സ്യത്തൊഴിലാളികളും നടത്തിയ രക്ഷാപ്രവർത്തനത്തിൽ 3 പേരെ കരയിൽ എത്തിച്ചു. ഒരു മണിക്കൂർ കഴിഞ്ഞാണ് നാലാമത്തെയാളെ കടലിലെ പാറയിൽ തങ്ങിനിൽക്കുന്ന നിലയിൽ കണ്ടെത്തിയത്. കടുക്കത്തൊഴിലാളികളായ പള്ളിപറമ്പ് ഷെഫിഖ്, അഴിയിട്ട വളപ്പിൽ കബീർ, അഴിയിട്ട വളപ്പിൽ റിയാസ്, സിറാജ് തട്ടാൻ്റവിട, ഹാരിസ് ചാലിൽ, കോട്ടവളപ്പിൽ സിദ്ദിഖ് എന്നിവരും സമീപവാസികളും ഓടിയെത്തിയാണ് രക്ഷാപ്രവർത്തനം നടത്തിയത്.
ഇവരോട് കടലിൽ ഇറങ്ങരുതെന്നു നാട്ടുകാർ മുന്നറിയിപ്പ് നൽകിയിരുന്നു. കടലിൻ്റെ സ്വഭാവം മാറിമറിയുന്നതോ, അടിയൊഴുക്കുകളോ അറിയാതെ കടലില്‍ ഇറങ്ങുന്നവരാണ് അപകടത്തില്‍പ്പെടുന്നത്. വയനാട്ടില്‍നിന്ന് കടല്‍ ആസ്വദിക്കാനെത്തിയവര്‍ക്ക് ഇതൊന്നും അറിയില്ലായിരുന്നു. വേലിയിറക്കസമയമായതിനാൽ പതിവുപോലെ ഞായറാഴ്‌ച വൈകീട്ട് കല്ലകത്ത് ബീച്ചിൽ വെള്ളം നന്നായി ഉൾവലിഞ്ഞിരുന്നു. തിരമാലകൾക്കും താരതമ്യേന ശക്തി കുറവായിരുന്നു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
വേലിയിറക്കസമയത്ത് തീരത്തുനിന്ന് മുക്കാൽ കിലോമീറ്ററോളം കടലിലേക്ക് ഇറങ്ങിപ്പോകാൻ പറ്റുന്ന പ്രത്യേകതയാണ് കല്ലകത്ത് ബീച്ചിലുള്ളത്. അതുകൊണ്ടുതന്നെ ധാരാളംപേർ കടലിലേക്ക് ഇറങ്ങും. എന്നാൽ, വെള്ളം കയറുമ്പോൾ കടൽ പൂർവസ്ഥിതിയിലാവും. ഈ ഭാഗത്ത് കടലിൽ തിട്ടകളും താഴ്‌ചകളും ചാലുകളുമുണ്ട്. കടൽ ഉൾവലിഞ്ഞിരുന്നെങ്കിലും അടിവലിപ്പ് അന്ന് കൂടുതലായിരുന്നു.
