കാസർകോട്: കാഞ്ഞങ്ങാട് പത്തുവയസുകാരിയെ തട്ടിക്കൊണ്ട് പോയി പീഡിപ്പിച്ച കേസിലെ പ്രതിയെ ആന്ധ്രാപ്രദേശിൽ നിന്നും കാസർകോട് എത്തിച്ചു. കുടക് സ്വദേശി പി എ സലീമിനെയാണ് ആന്ധ്രാപ്രദേശിൽ നിന്ന് പ്രത്യേക അന്വേഷണ സംഘം കസ്‌റ്റഡിയിൽ എടുത്തത്. പ്രതിയുടെ അറസ്‌റ്റ് രേഖപ്പെടുത്തിയ ശേഷം നാളെ കോടതിയിൽ ഹാജരാക്കും. തുടർന്ന് തെളിവെടുപ്പിനായി കൊണ്ടുപോകും.
ആന്ധ്രാപ്രദേശിൽ ഒളിവിൽ കഴിയവേയാണ് പി എ സലീം പ്രത്യേക അന്വേഷണ സംഘത്തിന്‍റെ പിടിയിലാകുന്നത്. സ്വന്തമായി മൊബൈൽ ഫോൺ ഉപയോഗിക്കാത്ത പ്രതി മറ്റൊരാളിന്‍റെ ഫോണിൽ നിന്ന് തന്‍റെ പെൺ സുഹൃത്തിനെ വിളിച്ചതാണ് അന്വേഷണത്തിൽ വഴിതിരിവായത്. ഈ ഫോൺകോൾ കേന്ദ്രീകരിച്ച് പൊലീസ് നടത്തിയ തെരച്ചിലിൽ യഥാർത്ഥ ഫോൺ ഉടമയെ കണ്ടെത്തി. തുടർന്ന് ഇയാളെ ചോദ്യം ചെയ്‌തതോടെ സലീം എവിടെയുണ്ടെന്ന വിവരം അന്വേഷണ സംഘത്തിന് ലഭിച്ചു.
