തിരുവനന്തപുരം : സംസ്ഥാനത്ത് ഡ്രൈവിങ് ടെസ്റ്റ് കേന്ദ്രങ്ങളിൽ പ്രതിദിനം ടെസ്റ്റ് നടത്തുന്നവരുടെ എണ്ണം നിജപ്പെടുത്താൻ ഗതാഗത മന്ത്രി കെ ബി ഗണേഷ് കുമാറിന്‍റെ നിർദേശം.ആർടിഒ, ജോയിന്‍റ് ആർടിഒമാരുമായി ഗതാഗത മന്ത്രി ഇന്ന്(06-03-2024) ഓൺലൈനായി നടത്തിയ യോഗത്തിലാണ് ഇത് സംബന്ധിച്ച നിർദേശം. നാളെ മുതൽ പ്രതിദിന ഡ്രൈവിങ് ടെസ്റ്റ് 50 ആയി നിജപ്പെടുത്താനാണ് നിർദേശം.
സാധാരണ ദിവസം 100 മുതൽ 180 പേർക്കാണ് ടെസ്റ്റ് നടത്തുന്നത്. ഗതാഗത മന്ത്രിയുടെ നിർദേശം എങ്ങനെ നടപ്പാക്കണമെന്നറിയാതെ ആശയക്കുഴപ്പത്തിലാണ് ഉദ്യോഗസ്ഥർ. പ്രതിദിനം 180 വരെ നടക്കുന്ന ഡ്രൈവിങ് ടെസ്റ്റ് 50 ആയി ചുരുക്കുമ്പോൾ ആരെയൊക്കെ ഒഴിവാക്കും, എന്ത് മാനദണ്ഡത്തിന്‍റെ അടിസ്ഥാനത്തിൽ ഒഴിവാക്കും പുതിയ തീയതി എങ്ങനെ നൽകുമെന്നുളള ആശയക്കുഴപ്പത്തിലാണ് മോട്ടോർ വാഹനവകുപ്പ് ഉദ്യോഗസ്ഥർ.
ഗതാഗത കമ്മീഷണർ ഇറക്കിയ സർക്കുലറുകൾ തിരുത്താനും മന്ത്രി നിർദേശം നൽകി.മന്ത്രി അംഗീകാരം നൽകുന്ന സർക്കുലർ മാത്രമേ ഗതാഗത കമ്മീഷണർ ഇറക്കാവൂ എന്നാണ് നിർദേശം. അവസാന ട്രിപ്പ് മുടക്കുന്ന സ്വകാര്യ ബസുകളുടെയും റോഡ് വികസന കരാ‍ർ ഏറ്റെടുത്ത കമ്പനികളുടെ വാഹനങ്ങള്‍ നിയമലംഘനം നടത്തുന്നുണ്ടെങ്കിൽ പെർമിറ്റ് റദ്ദാക്കാനും നിദ്ദേശം നൽകിയിട്ടുണ്ട്.
പരിഷ്‌ക്കരിച്ച രീതിയിൽ മെയ് 1 മുതൽ ഡ്രൈവിങ് ടെസ്റ്റ് നടത്തണമെന്ന് നേരത്തെ ഉത്തരവ് ഇറക്കിയിരുന്നു. എന്നാൽ 30 പേർക്ക് മാത്രമാണ് പുതിയ ട്രാക്കിൽ പരീക്ഷ നടത്തേണ്ടത്. ടെസ്റ്റ് നടത്തേണ്ടവരുടെ എണ്ണം 30 ആയി ചുരുക്കുമ്പോൾ ഉണ്ടാകുന്ന പ്രായോഗിക ബുദ്ധിമുട്ടുകള്‍,ട്രാക്ക് നിര്‍മിക്കാനുള്ള ചെലവ് ആര് വഹിക്കും എന്നതിനെ പറ്റി ഇനിയും തീരുമാനമാകാതെയിരിക്കുന്ന സാഹചര്യത്തിലാണ് ഗതാഗത മന്ത്രിയുടെ പുതിയ നിർദേശം. അതേസമയം, ഗതാഗത സെക്രട്ടറിയും ഗതാഗത കമ്മീഷണറും യോഗത്തിൽ പങ്കെടുത്തില്ല.
മന്ത്രിയുടെ നിർദേശത്തിൽ കടുത്ത അതൃപ്‌തിയിലാണ് ഡ്രൈവിങ് സ്‌കൂൾ ഉടമകളുടെ സംഘടനയായ ആൾ കേരള മോട്ടോർ ഡ്രൈവിങ് സ്‌കൂൾ അസോസിയേഷൻ. നാളെ ഡ്രൈവിങ് ടെസ്റ്റ് തീയതി ലഭിച്ച മുഴുവൻ പേരെയും ടെസ്റ്റ് ഗ്രൗണ്ടിൽ കൊണ്ടുപോകുകയും ടെസ്റ്റ് നടത്താത്ത പക്ഷം ഗ്രൗണ്ടിൽ വാഹനങ്ങൾ നിർത്തി പ്രതിഷേധിക്കുമെന്നുമാണ് സംഘടന മുന്നറിയിപ്പ് നൽകിയിരിക്കുന്നത്.
