ഇടുക്കി : മൂന്നാറിനോട് എന്നും പ്രിയമായിരുന്നു രത്തൻ ടാറ്റയ്‌ക്ക്. രണ്ട് തവണയാണ് അദ്ദേഹം മൂന്നാറിന്‍റെ മണ്ണിലേക്ക് എത്തിയത്. അദ്ദേഹത്തിന്‍റെ വിയോഗം മൂന്നാറിനെയും തീരാദുഃഖത്തിലാഴ്ത്തി. 1997 ഏപ്രിലിലാണ് രത്തൻ ടാറ്റ ആദ്യമായി മൂന്നാർ സന്ദർശിച്ചത്. ഡയർ സ്‌കൂൾ, ഐടിഡി, നല്ലതണ്ണിയിലെ ലയങ്ങൾ എന്നിവിടങ്ങളിലാണ് അന്ന് ടാറ്റ സന്ദർശനം നടത്തിയത്. 2009 നവംബറിൽ ഹൈറേഞ്ച് സ്‌കൂളിന്‍റെ 25-ാം വാർഷികത്തിലായിരുന്നു രണ്ടാം സന്ദർശനം.
മൂന്നാറിലെ കുട്ടികളുടെ വിദ്യാഭ്യാസത്തിൽ അദ്ദേഹം പ്രത്യേക ശ്രദ്ധ ചെലുത്തിയിരുന്നു. ഭിന്നശേഷിക്കാരായ കുട്ടികൾക്കായി ഡയർ സ്‌കൂൾ ആരംഭിച്ചത് അദേഹത്തിന്‍റെ നിർദേശ പ്രകാരമായിരുന്നു. ഭിന്നശേഷിക്കാരുടെ ഉന്നമനത്തിനായി 'സൃഷ്‌ടി'യുടെ തുടക്കവും രത്തൻ ടാറ്റയുടെ മേൽനോട്ടത്തിൽ ആയിരുന്നു. ഭിന്നശേഷികാരുടെ വിദ്യാഭ്യാസവും തൊഴിലുമെല്ലാം ലക്ഷ്യം വച്ചാണ് സൃഷ്‌ടി പ്രവർത്തിക്കുന്നത്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
തോട്ടം തൊഴിലാളികളുടെ മക്കൾക്ക് മികച്ച വിദ്യാഭ്യാസം ലക്ഷ്യം വച്ച് പ്രവത്തിക്കുന്ന ഹൈറേഞ്ച് സ്‌കൂളിൽ സൗജന്യ വിദ്യാഭ്യാസവും സൃഷ്‌ടി ഉറപ്പ് വരുത്തുന്നു. മൂന്നാറിന്‍റെ ഉന്നമനത്തിനായി പ്രത്യേകം ശ്രദ്ധ ചെലുത്തിയിരുന്ന രത്തൻ ടാറ്റയുടെ വിയോഗം നികത്താൻ ആവാത്ത നഷ്‌ടമാണെങ്കിലും അദ്ദേഹം നൽകിയ കരുതലിന്‍റെ ഓർമകളിലാണ് നാട്.
