തിരുവനന്തപുരം: കെ.കരുണാകരന്‍റെ മകൾ പത്മജ വേണുഗോപാൽ ബിജെപിയിൽ ചേർന്നതിനെ അതിരൂക്ഷമായ ഭാഷയില്‍ വിമർശിച്ച് യൂത്ത് കോൺഗ്രസ് സംസ്ഥാന അധ്യക്ഷൻ രാഹുൽ മാങ്കൂട്ടത്തിൽ. തന്തക്ക് പിറന്ന മകളോ തന്തയെ കൊന്ന സന്താനമോ? പത്മജയെ വിശേഷിപ്പിക്കേണ്ടത് എങ്ങനെയാണെന്ന് രാഹുൽ മാങ്കൂട്ടത്തിൽ ചോദിച്ചു.
മുൻപ് പത്മജ പറഞ്ഞത് താൻ തന്തക്ക് പിറന്ന മകൾ ആണ് എന്നാണ്. കെ. കരുണാകരൻ എന്ത് പാതകമാണ് പത്മജയോട് ചെയ്‌തത്. കരുണാകരന്‍റെ പാരമ്പര്യം പത്മജ ഇനി എവിടെയെങ്കിലും ഉപയോഗിച്ചാൽ പത്മജയെ യൂത്ത് കോൺഗ്രസ് തെരുവിൽ തടയുമെന്നും
പിതൃ ഘാതക എന്നായിരിക്കും പത്മജയെ ചരിത്രം അടയാളപ്പെടുത്തുകയെന്നും രാഹുൽ മാങ്കൂട്ടത്തിൽ പറഞ്ഞു (Rahul mankoottathil against padmaja venugopal).
പത്മജയെ രാഷ്ട്രപതിയും പ്രധാനമന്ത്രിയും ആക്കാൻ പാര്‍ട്ടിക്ക് കഴിഞ്ഞില്ല. എവിടെയെങ്കിലും ഒന്ന് ജയിച്ചിരുന്നെങ്കില്‍ കേരളത്തിന്‍റെ മുഖ്യമന്ത്രി ആക്കാമായിരുന്നു. എന്നാല്‍ പത്മജ തോറ്റത് പാര്‍ട്ടി ഏത് കുറ്റിച്ചൂലിനെ നിര്‍ത്തിയാലും ജയിക്കുന്ന മണ്ഡലങ്ങളിലാണെന്നും രാഹുല്‍ വിമര്‍ശിച്ചു.
പാര്‍ട്ടിയില്‍ പരിഗണന കിട്ടിയില്ല എങ്കില്‍ അവര്‍ക്ക് സിപിഎമ്മില്‍ പോകാമായിരുന്നില്ലേ? അത് പോയില്ല. അപ്പോള്‍ എന്തിനാണോ മറ്റ് സംസ്ഥാനങ്ങളില്‍ ഉള്ളവര്‍ ബിജെപിയിലേക്ക് പോകുന്നത് അതിന് തന്നെയാണ് പത്മജയും പോയത്.
ഇതിനിടെ സിപിഎം സംസ്ഥാന സെക്രട്ടറി എം വി ഗോവിന്ദനും രാഹുല്‍ മാങ്കൂട്ടത്തില്‍ മറുപടി നല്‍കി. എം.വി. ഗോവിന്ദന്‍റെ ആശങ്ക ശരിയാണ്. ബംഗാളിലും ത്രിപുരയിലും പാർട്ടി ഓഫീസ് ഉൾപ്പെടെ ബിജെപിയിലേക്ക് പോയ അനുഭവമുണ്ട്. അതുകൊണ്ട് എം.വി. ഗോവിന്ദൻ കോൺഗ്രസിനെ വിമർശിക്കാൻ നിൽക്കണ്ട. ബിജെപിയുടെ അത്താഴ വിരുന്നിൽ പങ്കെടുത്തവരാണ് സി.പി.എം നേതാക്കളെന്നും രാഹുൽ മാങ്കൂട്ടത്തില്‍ പറഞ്ഞു.
സ്വന്തം സ്ഥാനാർഥികളെ പോലും നിർത്താൻ കഴിയാത്ത ഗതികേടിലാണ് ബിജെപിയുള്ളത്. ബിജെപിക്ക് ഏറ്റവും കൂടുതൽ സാധ്യതയുണ്ടെന്ന് അവർ പറഞ്ഞ സ്ഥലങ്ങളിൽ ബിജെപിക്കാരെ സ്ഥാനാർത്ഥിയാക്കാൻ പോലും കഴിഞ്ഞിട്ടില്ല (Rahul mankoottathil against padmaja venugopal).
പത്മജ ബിജെപിയിൽ പോകുമ്പോൾ ബിജെപിക്ക് കിട്ടാൻ പോകുന്നത് ഒരു വോട്ടാണ്. പത്മജ ചെയ്യുമെങ്കിൽ പത്മജയുടെ വോട്ട് മാത്രമെന്നും രാഹുൽ മാങ്കൂട്ടത്തിൽ പരിഹസിച്ചു.
വലിയ വേദനയാണ് പത്മജ പാർട്ടി വിടുന്നതെന്ന് ജെബി മേത്തർ എംപി പ്രതികരിച്ചു. കേരള രാഷ്ട്രീയത്തിലെ കൊടും ചതിയാണ് പത്മജയുടെ ബിജെപി പ്രവേശനം. കോൺഗ്രസ് പ്രസ്ഥാനം എന്ത് അവഗണനയാണ് പത്മജയോട് ചെയ്‌തതെന്ന് അറിയാൻ ആഗ്രഹമുണ്ടെന്നും അദ്ദേഹം പറഞ്ഞു.
