പത്തനംതിട്ട : എൻഡിഎ സ്ഥാനാർഥി അനില്‍ കെ ആന്‍റണിയുടെ തെരഞ്ഞെടുപ്പ് പ്രചാരണത്തിനായി പ്രധാനമന്ത്രി നരേന്ദ്രമോദി പത്തനംതിട്ടയിൽ എത്തും. മാര്‍ച്ച് 15ന് രാവിലെ 11 മണിക്ക് പത്തനംതിട്ട ജില്ല സ്‌റ്റേഡിയമാണ് പ്രധാനമന്ത്രിയുടെ പൊതുയോഗ വേദിയായി നിശ്ചയിച്ചിരിക്കുന്നത്. ഹെലികോപ്റ്റര്‍ മാര്‍ഗമാണ് പ്രധാനമന്ത്രി ജില്ല ആസ്ഥാനത്ത് എത്തുക. ശബരിമല ഇടത്താവളം, പ്രമാടം ഇൻഡോര്‍ സ്‌റ്റേഡിയം, കാതോലിക്കേറ്റ് കോളജ് ഗ്രൗണ്ട് എന്നിവിടങ്ങളാകും ലാൻഡിംഗ് ഗ്രൗണ്ടായി പരിഗണിക്കുക എന്നാണ് വിവരം.
ഇന്ന് ജില്ലയിലുള്ള എസ്‌പിജി ഉദ്യോഗസ്ഥരാകും പൊതുയോഗ വേദി ഉൾപ്പടെയുള്ള കാര്യങ്ങളിൽ തീരുമാനമെടുക്കുക. പ്രധാനമന്ത്രി നരേന്ദ്രമോദി രണ്ടാം തവണയാണ് പത്തനംതിട്ടയില്‍ എത്തുന്നത്. കഴിഞ്ഞ നിയമസഭ തെരഞ്ഞെടുപ്പിൽ കോന്നി മണ്ഡലത്തില്‍ എൻഡിഎ സ്ഥാനാർഥിയായിരുന്ന കെ സുരേന്ദ്രന്‍റെ പ്രചാരണത്തിനായി 2021 ഏപ്രില്‍ രണ്ടിന് പ്രധാനമന്ത്രി പ്രമാടം ഇൻഡോർ സ്‌റ്റേഡിയത്തില്‍ പ്രസംഗിച്ചിരുന്നു.
പത്തനംതിട്ട, മാവേലിക്കര മണ്ഡലങ്ങളില്‍നിന്നും ഒന്നരലക്ഷം പ്രവര്‍ത്തകർ പരിപാടിക്കെത്തുമെന്ന് ബിജെപി ജില്ല പ്രസിഡന്‍റ് വി എ സൂരജ് അറിയിച്ചു. പ്രധാനമന്ത്രിയുടെ വാഹന വ്യൂഹം കടന്നുവരുന്ന പ്രദേശങ്ങളില്‍ ഗതാഗത ക്രമീകരണവും സുരക്ഷാപരിശോധനയും ഉണ്ടാകുമെന്നതിനാല്‍ പ്രവർത്തകരുമായുള്ള വാഹനങ്ങള്‍ അടക്കം നിർദേശങ്ങള്‍ പാലിക്കണമെന്ന് അധികൃതർ അറിയിച്ചു.
മുതിർന്ന കോണ്‍ഗ്രസ് നേതാവ് എ കെ.ആന്‍റണിയുടെ മകൻ അനില്‍ കെ.ആന്‍റണി സ്ഥാനാർത്ഥിയായതോടെ മണ്ഡലം ദേശീയ ശ്രദ്ധ ആകർഷിച്ചിട്ടുണ്ട്. എൻഡിഎ വിജയസാധ്യത കാണുന്ന എ ക്ലാസ് മണ്ഡലമാണ് പത്തനംതിട്ട. യുഡിഎഫിൽ നിലവിലെ എം പി ആന്‍റോ ആന്‍റണിയും എൽഡിഎഫിൽ സിപിഎം കേന്ദ്ര കമ്മിറ്റിയംഗം തോമസ് ഐസക്കുമാണ് എതിരാളികൾ.
'പ്രകടനവും പ്രകടനമില്ലായ്‌മയും തമ്മിലുള്ള പോരാട്ടം' : തിരുവനന്തപുരം ലോക്‌സഭ മണ്ഡലത്തിലെ തന്‍റെ എതിരാളിയും മുതിർന്ന കോൺഗ്രസ് നേതാവുമായ ശശി തരൂരിനെ പരിഹസിച്ച് ബിജെപി സ്ഥാനാർത്ഥിയും കേന്ദ്രമന്ത്രിയുമായ രാജീവ് ചന്ദ്രശേഖർ. പ്രകടനവും, 15 വർഷത്തെ പ്രവർത്തനരഹിത നിലയും തമ്മിലുള്ള പോരാട്ടമാണ് ഈ തെരഞ്ഞെടുപ്പെന്നായിരുന്നു കേന്ദ്രമന്ത്രിയുടെ പരിഹാസം.
ALSO READ : 'കെ മുരളീധരൻ നാളെ ബിജെപിയിലേക്ക് വരും, തൃശൂരിൽ സുരേഷ്‌ ഗോപി വിജയിക്കും'; പത്മജ വേണുഗോപാൽ
തിരുവനന്തപുരത്തെ ജനങ്ങൾക്ക് ഇതിനെക്കുറിച്ച് നന്നായി അറിയാം. മെയ് മാസത്തിൽ ആരെ തെരഞ്ഞെടുക്കണമെന്ന് ജനങ്ങൾ തീരുമാനിക്കും. ആളുകൾ ബോധമുള്ളവരാണ്. പ്രകടനത്തിന്‍റെ രാഷ്‌ട്രീയം എന്താണെന്നും, ആരാണ് പ്രകടനത്തിന്‍റെ രാഷ്‌ട്രീയത്തെ പ്രതിനിധീകരിക്കുന്നതെന്നും, ആരാണ് 15 വർഷത്തെ പ്രവർത്തനമില്ലായ്‌മയെ പ്രതിനിധീകരിക്കുന്നതെന്നും അവർക്കറിയാം - രാജീവ് ചന്ദ്രശേഖർ വിശദീകരിച്ചു.
