കോഴിക്കോട് : 13കാരന് നേരെ ലൈംഗികാതിക്രമം നടത്തിയ ഓട്ടോ ഡ്രൈവർ പിടിയിൽ. കക്കോടി കുമ്മങ്ങൾ വീട്ടിൽ റാഫി അഹമ്മദ് (62) ആണ് പിടിയിലായത്. റോഡിലൂടെ നടന്നു പോവുകയായിരുന്ന കുട്ടിക്കു നേരെ ഓട്ടോയിലെത്തിയ പ്രതി ലൈംഗികാതിക്രമം നടത്തുകയായിരുന്നു. കോഴിക്കോട് പൊറ്റമ്മലിന് സമീപം കാച്ചിലോട്ട് സ്‌കൂളിനടുത്ത് വച്ചായിരുന്നു സംഭവം.
ലൈംഗികാതിക്രമത്തെ കുറിച്ച് അറിഞ്ഞ കുട്ടിയുടെ വീട്ടുകാർ വിവരം മെഡിക്കൽ കോളജ് പൊലീസിൽ അറിയിച്ചു. കുട്ടിയിൽ നിന്നും വിശദമായ മൊഴിയെടുത്ത പൊലീസ് ഓട്ടോ ഡ്രൈവർക്ക് എതിരെ കേസെടുത്തു. ഓട്ടോറിക്ഷയുടെ നിറവും അതിനു പിന്നിൽ എഴുതിയ പേരും മാത്രമാണ് കുട്ടി തെളിവായി പൊലീസിന് കൈമാറിയിരുന്നത്. കൂടാതെ ഡ്രൈവറുടെ രൂപത്തെ കുറിച്ചുളള വിവരവും പൊലീസിന് നൽകി.
ഇതിൻ്റെ അടിസ്ഥാനത്തിൽ മെഡിക്കൽ കോളജ് പൊലീസ് പ്രദേശത്തെ സിസിടിവി കാമറകൾ പരിശോധിച്ച് ഓട്ടോ കണ്ടെത്തുകയായിരുന്നു. തുടർന്ന് നടത്തിയ അന്വേഷണത്തിലാണ് പ്രതി പിടിയിലാകുന്നത്. അറസ്റ്റ് രേഖപ്പെടുത്തിയ പ്രതിയെ കോടതിയിൽ ഹാജരാക്കി റിമാൻഡ് ചെയ്‌തു.
Also Read: മയക്കുമരുന്ന് ചേർത്ത ഭക്ഷണം കഴിപ്പിച്ച് അബോധാവസ്ഥയിലാക്കി കൂട്ടബലാത്സംഗം; രണ്ട് പേര്‍ അറസ്റ്റില്‍
