പാലക്കാട്: വയനാട് ദുരന്തം ദേശീയ ദുരന്തമായി പ്രഖ്യാപിക്കാനാവില്ലെന്ന കേന്ദ്ര സർക്കാർ നിലപാട് പ്രതിഷേധാർഹമെന്ന് മുസ്‌ലിം ലീഗ് നേതാവ് പി കെ കുഞ്ഞാലിക്കുട്ടി. കേരളത്തോട് നിരന്തരം അവഗണന കാണിക്കുന്ന കേന്ദ്രഭരണകൂടത്തോടും കണക്കു പറഞ്ഞ് ആനുകൂല്യങ്ങൾ നേടിയെടുക്കുന്നതിൽ ദയനീയമായി പരാജയപ്പെടുന്ന സംസ്ഥാന സർക്കാരിനോടുമുളള സാധാരണക്കാരുടെ രോഷം ഉപതെരഞ്ഞെടുപ്പിൽ പ്രതിഫലിക്കുമെന്നും കുഞ്ഞാലിക്കുട്ടി പറഞ്ഞു. പാലക്കാട് മാധ്യമ പ്രവർത്തകരോട് സംസാരിക്കുകയായിരുന്നു അദ്ദേഹം.
വോട്ട് ചെയ്‌തിട്ടും കാര്യമില്ലെന്ന ബോധ്യത്തോടെ എൽഡിഎഫിൻ്റെയും എൻഡിഎയുടെയും പ്രവർത്തകർ വിട്ടു നിന്നതിനാലാണ് വയനാട് ഉപതെരഞ്ഞെടുപ്പിൽ പോളിങ് ശതമാനം കുറഞ്ഞത്. ബിജെപി സർക്കാർ സംസ്ഥാനത്തോട് എന്നും ശത്രുതാപരമായ സമീപനമാണ് സ്വീകരിക്കുന്നതെന്നും കുഞ്ഞാലിക്കുട്ടി പറഞ്ഞു.
'അതിനെ ചെറുക്കാൻ സംസ്ഥാന സർക്കാരിന് കഴിയുന്നില്ല. ദുരന്തം മൂലമുണ്ടായ നഷ്‌ടത്തിൻ്റെ കണക്കുകൾ കൃത്യമായി നൽകാനാവാത്തതും കേരളത്തിന് ദോഷമായിട്ടുണ്ടാകാം. കേരളത്തെ ശത്രുതയോടെ കാണുന്ന ബിജെപിക്ക് കാലു കുത്താൻ ഇടം നൽകില്ലെന്ന ജനവിധിയാണ് പാലക്കാട്ടുകാർ നൽകാൻ പോകുന്നത്.
കേന്ദ്രത്തിനെതിരെ എന്തു നിലപാട് കൈക്കൊള്ളണമെന്ന കാര്യത്തിൽ സിപിഎമ്മിനും സംസ്ഥാന സർക്കാരിനും വ്യക്തതയില്ല. തുടർ നടപടികളുടെ രൂപരേഖ ഉണ്ടാക്കി തങ്ങളെ സമീപിച്ചാൽ യോജിച്ച പോരാട്ടമാവാം. വയനാട് തെരഞ്ഞെടുപ്പിൽ പോളിങ് കുറഞ്ഞത് പ്രിയങ്ക ഗാന്ധിയുടെ ഭൂരിപക്ഷത്തെ ബാധിക്കില്ല.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം
വോട്ട് ചെയ്‌തിട്ട് കാര്യമില്ലെന്ന് കരുതി ഇടതുപക്ഷത്തിൻ്റെയും ബിജെപിയുടെയും പ്രവർത്തകർ വിട്ടുനിന്നതിനാലാവാം പോളിങ് കുറഞ്ഞത്. നവംബര്‍ 23ന് ഫലം പ്രഖ്യാപിക്കുമ്പോള്‍ അത് വ്യക്തമാവും. ഇ പി ജയരാജൻ്റെ ആത്മകഥ വിവാദം പരിഹാസ്യമാണ്. സിപിഎമ്മിലെ കാര്യങ്ങളുടെ പോക്കിൽ എൽഡിഎഫിൽ അമർഷം പുകയുകയാണ്. അതിൻ്റെ പ്രതിഫലനമാണ് വിവാദമെന്നും' കുഞ്ഞാലിക്കുട്ടി പറഞ്ഞു.
Also Read: വയനാട് ഉരുൾപൊട്ടൽ; ദേശീയ ദുരന്തമായി പ്രഖ്യാപിക്കാനാകില്ലെന്ന് കേന്ദ്രം
