കോഴിക്കോട്: മുഖ്യമന്ത്രിയും സിപിഎമ്മും കൈയൊഴിഞ്ഞതിന് പിന്നാലെ അടങ്ങിയ നിലമ്പൂർ എംഎൽഎ പി വി അൻവർ ഇന്ന് (സെപ്റ്റംബർ 26 ) വീണ്ടും മാധ്യമങ്ങളെ കാണും. വൈകിട്ട് നാലരക്ക് മാധ്യമങ്ങളെ കാണുമെന്നറിയിച്ച് ഫേസ്ബുക്കിൽ കുറിപ്പിട്ടു. 'വിശ്വാസങ്ങൾക്കും വിധേയത്വത്തിനും താൽക്കാലികതക്കും അപ്പുറം ഓരോ മനുഷ്യനിലും ഉള്ള ഒന്നാണു ആത്മാഭിമാനം. അതിത്തിരി കൂടുതലുണ്ട്‌. നീതിയില്ലെങ്കിൽ നീ തീയാവുക എന്നാണല്ലോ. വൈകിട്ട് നാലരയ്ക്ക്‌ മാധ്യമങ്ങളെ കാണും'- അൻവർ ഫേസ്ബുക്കിൽ കുറിച്ചു.
കഴിഞ്ഞ ദിവസം എടവണ്ണ റിദാൻ ബാസിൽ കൊലക്കേസിൽ പ്രതികരണവുമായി അൻവർ രംഗത്തെത്തിയിരുന്നു. ഈ കേസുമായി ബന്ധമുണ്ടെന്ന് താൻ സംശയിക്കുന്ന എഡിജിപി ലോ ആൻഡ്‌ ഓർഡർ ആ ചുമതലയിൽ തുടരുന്നിടത്തോളം കാലം കേസിൽ നീതിപൂർവ്വമായ അന്വേഷണം ഉണ്ടാകില്ലെന്ന് വ്യക്തമായെന്ന് അൻവർ ഫേസ്ബുക്കിൽ കുറിച്ചു. എടവണ്ണ റിദാൻ ബാസിൽ കൊലക്കേസിൽ ദുരൂഹത ഉണ്ടെന്നും ഉന്നത പൊലീസ്‌ ഉദ്യോഗസ്ഥർക്ക്‌ ഇതിൽ പങ്കുണ്ടെന്നും പല തവണ ആവർത്തിച്ചിരുന്നു. ഈ കേസ്‌ പ്രത്യേക അന്വേഷണ സംഘം നേരിട്ട്‌ വീണ്ടും അന്വേഷിക്കണം എന്നാവശ്യപ്പെട്ട്‌ മുഖ്യമന്ത്രിക്ക്‌ കത്ത് നൽകിയിരുന്നുവെന്നും അൻവർ പറഞ്ഞു.
ഇടിവി ഭാരത് കേരളം ഇനി വാട്‌സ്‌ആപ്പിലും
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
നിലവിൽ വിചാരണ നടന്നുകൊണ്ടിരിക്കുന്ന ഈ കേസിൽ എടവണ്ണ പൊലീസ്‌ പുതിയൊരു നീക്കം നടത്തിയിട്ടുണ്ട്‌. കൊല്ലപ്പെട്ട റിദാന്‍റെ കാണാതായ ഫോണുമായി ബന്ധപ്പെട്ട്‌ ചില സുപ്രധാന വിവരങ്ങൾ ലഭിച്ചിട്ടുണ്ടെന്നും അതിന്‍രെ അന്വേഷണത്തിനായി വിചാരണ നിർത്തി വയ്ക്കണം എന്നും ആവശ്യപ്പെട്ട്‌ അന്വേഷണ ഉദ്യോഗസ്ഥൻ കഴിഞ്ഞ ദിവസം കോടതിയെ സമീപിക്കുകയും കോടതി അത്‌ അനുവദിക്കുകയും ചെയ്‌തിട്ടുണ്ട്‌. ഇതിന്‍റെ കൂടുതൽ കാര്യങ്ങളും നിലവിലെ രാഷ്ട്രീയ വിവാദങ്ങൾക്കും അൻവർ മറുപടി പറയുമെന്നാണ് പ്രതീക്ഷിക്കുന്നത്. ഇടതുമുന്നണി പാർലമെന്‍ററി പാർട്ടി യോഗത്തിൽ പങ്കെടുക്കില്ലെന്നും സൂചനയുണ്ട്.
Also Read:അൻവർ എങ്ങോട്ട്? ലക്ഷ്യം ലീഗോ? തടയിടാൻ കോൺഗ്രസ്; ഇനിയും ക്ഷമിക്കാനാവില്ലെന്ന് സിപിഎം
