തിരുവനന്തപുരം : മലപ്പുറം പരപ്പനങ്ങാടിയിൽ പ്ലസ് വൺ വിദ്യാർഥിനി ഹാദിറുഷ്‌ദയുടെ മരണം അഡ്‌മിഷൻ തടസം കാരണമല്ലെന്ന് വിദ്യാഭ്യാസ മന്ത്രി വി ശിവൻകുട്ടി നിയമസഭയിൽ. കെ പി എ മജീദ് നൽകിയ സബ്‌മിഷന് മറുപടി പറയുകയായിരുന്നു മന്ത്രി.
ആത്മഹത്യയുടെ കാരണം സംബന്ധിച്ച് പൊലീസിനോട് റിപ്പോർട്ട്‌ തേടിയിട്ടുണ്ട്. അഡ്‌മിഷൻ തടസമില്ലായിരുന്നു എന്നാണ് വ്യക്തമാകുന്നത്. ഈ മാസം അലോട്മെന്‍റ് പൂർത്തിയാകുന്നതിന് മുൻപ് തന്നെ എല്ലാ കുട്ടികൾക്കും പ്രവേശനം നേടാനാകും. പ്ലസ് വൺ അഡ്‌മിഷനുമായി കുട്ടിയുടെ വേർപാടിനെ കൂട്ടിക്കെട്ടേണ്ട കാര്യമില്ല.
രക്ഷിതാക്കളെയും കുട്ടികളെയും അത് ഭീതിപ്പെടുത്തും. കുട്ടിയുടെ മരണത്തിൽ റിപ്പോർട്ട്‌ ലഭിച്ച ശേഷം നടപടികൾ സ്വീകരിക്കാമെന്നും വിദ്യാഭ്യാസ മന്ത്രി വി ശിവൻകുട്ടി നിയമസഭയിൽ വ്യക്തമാക്കി.
