എറണാകുളം: എറണാകുളം ലോക്‌സഭ മണ്ഡലത്തിലെ ഐക്യ ജനാധിപത്യമുന്നണി സ്ഥാനാർഥി ഹൈബി ഈഡന് ഇന്ന് പിറന്നാൾ. 1983 ഏപ്രിൽ 19-ന് കോൺഗ്രസ് നേതാവ് ജോർജ് ഈഡൻ്റെയും റാണി ഈഡൻ്റെയും മകനായാണ് ഹൈബിയുടെ ജനനം. തെരഞ്ഞെടുപ്പ് തിരക്കുകള്‍ക്കിടെയാണ് ഇത്തവണ ഹൈബിയുടെ പിറന്നാള്‍. നാൽപ്പത്തിയൊന്നുകാരനായ ഹൈബി ഇത് രണ്ടാം തവണയാണ് പാർലമെൻ്റിലേക്ക് ജനവിധി തേടുന്നത്.
കെഎസ്‌യുവിലൂടെ പിതാവിൻ്റെ വഴിയിൽ രാഷ്ട്രീയ പ്രവർത്തനങ്ങളിൽ സജീവമായ ഹൈബി, തൻ്റെ ഇരുപത്തിയെട്ടാമത്തെ വയസിൽ നിയമസഭയിൽ എറണാകുളത്തെ പ്രതിനിധീകരിച്ചാണ് പാർലമെൻ്ററി രംഗത്ത് സജീവമായത്. 2019 ൽ സിറ്റിങ് എംപി കെ വി തോമസിനെ മാറ്റിയായിരുന്നു ഹൈബിക്ക് കോൺഗ്രസ് സീറ്റ് നൽകിയത്. ഇത് വലിയ പ്രതിഷേധത്തിനിടയാക്കിയിരുന്നു.
എന്നാൽ റെക്കോർഡ് ഭൂരിപക്ഷത്തിൽ അന്ന് സിപിഎം ജില്ല സെക്രട്ടറിയായിരുന്ന ഇന്നത്തെ മന്ത്രി പി രാജീവിനെ തോൽപ്പിക്കുകയായിരുന്നു. ഇത്തവണ തെരഞ്ഞെടുപ്പ് പ്രചാരണങ്ങൾക്കിടയിൽ എത്തിയ ഹൈബിയുടെ ജന്മദിനം കോൺഗ്രസ് പ്രവർത്തകർ ആഘോഷമാക്കി. അതിരാവിലെ പറവൂർ കുത്തിയതോട് പ്രദേശത്ത് വെച്ച് കേക്ക് മുറിച്ചായിരുന്നു ഇന്നത്തെ പ്രചരണം തുടങ്ങിയത്.
ഹൈബിയുടെ തെരഞ്ഞെടുപ്പ് പ്രവർത്തനങ്ങളിൽ ഉൾപ്പെടെ സജീവമായ സഹധർമ്മിണി അന്നയും മകൾ ക്ലാരയും പിറന്നാൾ സമ്മാനമായി നൽകിയത് ഇരുവരും ചേർന്ന് തയ്യാറാക്കിയ സംഗീത ആൽബമായിരുന്നു. ഹൈബി ഇത് സമൂഹ മാധ്യമത്തിൽ ഹൃദ്യമായ കുറിപ്പോടെ പങ്കുവെക്കുകയും ചെയ്‌തു."ക്ലാരയുടെയും അന്നയുടെയും ഒരു പിറന്നാൾ സംഗീത സമ്മാനം. അവരുടെ ഹൃദയത്തിൽ നിന്ന് എന്‍റതിലേക്കും നിങ്ങളിലേക്കും.
ഒരു പൊതുപ്രവർത്തകനും ഒരിക്കലും തന്‍റെ കുടുംബത്തിന് പൂർണ്ണമായും ലഭ്യമാകില്ല. വീട് കൈകാര്യം ചെയ്യുന്നതിലുള്ള അന്നയുടെ ശക്തിയിലും ചിലപ്പോഴൊക്കെ എറണാകുളത്തിന് അവളുടെ അപ്പയിൽ തന്നേക്കാൾ വലിയ അവകാശമുണ്ടെന്ന് മനസിലാക്കാനുള്ള ക്ലാരയുടെ കഴിവിലും ആത്മവിശ്വാസത്തോടെ ഞാൻ എപ്പോഴും സ്വതന്ത്രമായി നിങ്ങൾക്കിടയിൽ". അതിനാൽ, പിറന്നാൾ സമ്മാനം വളരെ സവിശേഷമായിരുന്നുവെന്നും ഹൈബി വ്യക്തമാക്കി.
ഒരേ പാതയിൽ, ഒരേ യാത്രയിൽ എനിക്കുള്ളൊരാൾ, നമുക്കുള്ളൊരാൾ... എന്ന വരികളോടെയാണ് ഗാനോപഹാരം ആരംഭിക്കുന്നത്. ക്ലാരയും അന്നയും വീഡിയോയിൽ മുഖം കാണിക്കുന്നുണ്ട്. കൊച്ചിയുടെ വിവിധ ഭാഗങ്ങളിലാണ് ഗാനം ചിത്രീകരിച്ചിരിക്കുന്നത്. ഹൈബിയും മകൾ ക്ലാരയുമൊത്തുള്ള സ്നേഹ പ്രകടനവും വീഡിയോയിൽ കാണാം. വിനായക് ശശികുമാറിന്‍റെ വരികൾക്ക് മെജോ ജോസഫാക് സംഗീതം പകർന്നത്.
വ്യത്യസ്‌തമായ ഒരു പിറന്നാൾ സമ്മാനം നൽകണമെന്ന ചിന്തയിൽ നിന്നാണ് ഇത്തരമൊരു ഗാനോപഹാരമെന്ന ആശയം വന്നതെന്ന് അന്ന പറഞ്ഞു. കൊച്ചിയോടൊപ്പമെന്നും യാത്ര ചെയ്യുന്ന ഹൈബിയുടെ പിറന്നാളും കൊച്ചിയുമായി ബന്ധപ്പെടുത്തിയാകണം എന്ന ആഗ്രഹത്തിലാണ് വീഡിയോ കൊച്ചിയുടെ പശ്ചാത്തലത്തിൽ ചിത്രീകരിച്ചത്. തെരഞ്ഞെടുപ്പ് പ്രചാരണ തിരക്കിലായതിനാൽ ഇത്തരമൊരു സംഗീതോപഹാരമാകും ഉചിതമെന്ന് കരുതി എന്നും അന്ന പറഞ്ഞു.
Also Read: ശ്രീനിയേട്ടനെ കണ്ട് വോട്ട് തേടി; ഹൈബി ഈഡൻ നടൻ ശ്രീനിവാസനെ സന്ദർശിച്ചു
