കോഴിക്കോട്: ചരിത്രത്തിലെ ഏറ്റവും ഉയര്‍ന്ന വിലയിലേക്ക് കുതിച്ചെത്തിയിരിക്കുകയാണ് ലഗോണ്‍ കോഴി വില. കിലോയ്ക്ക് 90 രൂപയ്ക്ക് കിട്ടിക്കൊണ്ടിരുന്ന ലൈവ് കോഴിക്ക് ഇപ്പോള്‍ 160 രൂപയാണ് വില. കഴിഞ്ഞയാഴ്‌ച ആദ്യം വരെ കോഴിക്കോട്ട് 120 രൂപയ്ക്കും 150 രൂപയ്ക്കും കിട്ടിക്കൊണ്ടിരുന്ന മുട്ടക്കോഴിയിറച്ചിക്ക് (ലഗോണ്‍) 110 രൂപ വരെ കൂടി 230- 250 രൂപ വിലയായി.
കല്യാണപ്പാര്‍ട്ടികള്‍ക്ക് വന്‍ തിരിച്ചടി
പൊതുവേ ഇറച്ചിക്കായി വളര്‍ത്തുന്ന ബ്രോയിലര്‍ കോഴിയായിരുന്നു നാട്ടില്‍ വില കൂടിയ ഇനം. മുട്ടക്കോഴിയായി അറിയപ്പെടുന്ന ലഗോണ്‍ കോഴികള്‍ മുട്ടയിടല്‍ നിര്‍ത്തിയ ശേഷം ഇറച്ചിക്കോഴികളായി എത്തുന്നതും പതിവായിരുന്നു. തമിഴ്നാട്ടിലെ നാമക്കലില്‍ നിന്നും മറ്റും വന്‍ തോതില്‍ ഇത്തരത്തില്‍ ലഗോണ്‍ കോഴി ലോഡുകള്‍ കേരളത്തിലേക്ക് എത്തുക പതിവായിരുന്നു. വിവാഹപ്പാര്‍ട്ടികള്‍ക്കും ഹോട്ടലികളിലെ ആവശ്യത്തിനും പ്രധാനമായും വില കുറഞ്ഞു കിട്ടുന്ന ലഗോണ്‍ കോഴിയേയായിരുന്നു നാട്ടിന്‍പുറത്തുകാര്‍ ആശ്രയിച്ചു പോന്നത്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം
കോഴി കിലോക്കണക്കിന് തൂക്കി വാങ്ങിയാണ് കല്യാണ വീടുകളില്‍ ബിരിയാണിക്ക് ഉപയോഗിച്ചു പോന്നത്. കിലോയ്ക്ക് 90 രൂപ നിരക്കിലാണ് ഏറെക്കാലമായി ലഗോണ്‍ കോഴി കിട്ടിക്കൊണ്ടിരുന്നത്. ഡ്രസ് ചെയ്ത വൃത്തിയാക്കിയ കോഴിയിറച്ചിയാണെങ്കില്‍ 120 മുതല്‍ 150 വരെയായിരുന്നു വില. ഹോട്ടലുകാരും ഈ കോഴിയിറച്ചിയാണ് ഉപയോഗിച്ചു പോന്നത്.
ചിക്കന്‍ പാര്ട്സിനും ക്ഷാമം
തട്ടുകടകളിലേയും ഹോട്ടലുകളിലേയും ജനപ്രിയ നോണ്‍വെജ് ഇനമായ ചിക്കന്‍ പാര്ട്സിനും ലഗോണ്‍ കോഴിയായിരുന്നു ഉത്തമം. ലിവറും വിരിയാത്ത മുട്ടയും ഒക്കെ ചേര്‍ന്ന കോഴി പാര്‍ട്സിന് ആവശ്യക്കാര്‍ ഏറെയാണ്.ലഗോണ്‍ കോഴി വില ഉയര്‍ന്നതോടെ തമിഴ്നാട്ടില്‍ നിന്നുള്ള കോഴി വരവും കുറഞ്ഞു.
ഹോട്ടലുകാര്‍ക്കും കാറ്ററിങ്ങ് സര്‍വീസുകാര്‍ക്കും അതോടെ വലിയ തിരിച്ചടിയായി. ബിരിയാണിക്കും ചിക്കന്‍ വിഭവങ്ങള്‍ക്കും വലിയ വില കൊടുത്ത് ബ്രോയിലര്‍ ചിക്കന്‍ വാങ്ങിക്കേണ്ട സ്ഥിതിയാണിപ്പോള്‍. ലഗോണ്‍ കോഴി വരവ് ചുരുങ്ങിയതോടെ ചിക്കന്‍ പാര്ട്സിനും ഹോട്ടലുകളിലെ മെനുവില്‍ നിന്ന് പതുക്കെ ഒഴിവായിത്തുടങ്ങി.
കുറഞ്ഞ വിലക്ക് ലഭിച്ചിരുന്ന ലഗോൺ ഇറച്ചിക്ക് വില കുത്തനെ കൂടി 230 മുതൽ 250 രൂപ വരെ ആയതോടെ ഹോട്ടലുകളില്‍ ഏതു നിമിഷവും ചിക്കന്‍ ഐറ്റങ്ങളുടെ വില ഉയരാമെന്ന നിലയാണ്. കിലോയ്ക്ക് 140 മുതല്‍ 180 രൂപ വരെ നല്‍കി ബ്രോയിലര്‍ ചിക്കന്‍ വാങ്ങേണ്ട സ്ഥിതിയിലാണ് ഹോട്ടലുകാരും സാധാരണക്കാരും.
സമീപകാലത്തൊന്നും ലഗോണിന് ഇത്രയും വില വർധിച്ചിട്ടില്ലെന്നും ഇത് റെക്കോഡാണെന്നും വ്യാപാരികൾ പറഞ്ഞു. ലഗോൺ ഇറച്ചിക്കും മുട്ടക്കും വില ഇനിയും വർധിക്കാനാണ് സാധ്യതയെന്നും വ്യാപാരികൾ പറയുന്നു. മുട്ട വില ഉയർന്നതിന് ആനുപാതികമായാണ് മുട്ടക്കോഴിയായ ലഗോണിന്‍റേയും വില വർധിച്ചതെന്ന് കച്ചവടക്കാരനായ മനാഫ് പറഞ്ഞു. ലഗോൺ ഇറച്ചിക്ക് വില കുത്തനെ ഉയർന്നതോടെ അന്തംവിട്ടിരിക്കുകയാണ് കല്യാണ പാർട്ടിക്കാരും ഹോട്ടലുകളും കാറ്ററിങ് സർവിസുകാരും.
മുട്ട വില കുത്തനെ ഉയര്‍ന്നു.
മുമ്പൊന്നുമില്ലാത്ത തരത്തിലാണ് സംസ്ഥാനത്ത് മുട്ടവിലയും ഉയര്‍ന്നത്. ഏതാനും മാസം മുമ്പ് വരെ 5 രൂപയായിരുന്നു മുട്ട വില. ഇത് കഴിഞ്ഞമാസം ആദ്യം അഞ്ചര രൂപയായും പിന്നീട് ആറു രൂപയായും ഉയര്‍ന്നു. രണ്ടാഴ്ച മുമ്പാണ് മുട്ട വില ഏഴ് രൂപയിലെത്തിയത്.ക്രിസ്‌മസ് കേക്കുണ്ടാക്കാൻ മുട്ടക്ക് ആവശ്യക്കാർ കൂടുന്നതാണ് വില വർധിക്കാൻ കാരണമായി ചൂണ്ടിക്കാണിക്കപ്പെടുന്നത്.
മുട്ടക്ക് നല്ല വില ലഭിച്ചു തുടങ്ങിയതോടെ കോഴി ഫാമുകാരും നിലപാട് മാറ്റി. ലഗോൺ കോഴികളെ ഫാമുകളിൽ നിന്ന് ഇറച്ചിക്ക് വിട്ടുനൽകുന്ന മുന്‍ രീതി തല്‍ക്കാലം അവര്‍ നിര്‍ത്തിവെച്ചു തുടങ്ങി. മുട്ടക്ക് മെച്ചപ്പെട്ട വില ലഭിക്കുമ്പോൾ പരമാവധി മുട്ട ഉൽപാദിപ്പിക്കാനാണ് ഫാം ഉടമകൾ ശ്രമിക്കുന്നതെന്ന് കച്ചവടക്കാരനായ മനാഫ് പറയുന്നു.ഈ ട്രെന്‍ഡ് ക്രിസ്‌മസ് സീസൺ കഴിയും വരെ തുടരാനാണ് സാധ്യത. അതിനു ശേഷവും ലഗോൺ ഇറച്ചിക്ക് വില കുറയുമെന്ന് ഉറപ്പു പറയാനാവില്ലെന്നും വ്യാപാരികൾ പറയുന്നു.
ബിരിയാണി വില ഉയരുന്നു
ലഗോണ്‍ കോഴി കിട്ടാതായതോടെ കാറ്ററിങ് സർവിസുകാർ ഉപഭോക്താക്കളിൽ നിന്ന് ബിരിയാണിക്ക് കൂടുതൽ തുക ഈടാക്കിത്തുടങ്ങിയിട്ടുണ്ട്. ചിലർ ലഗോൺ ഒഴിവാക്കി ബ്രോയിലർ ഇറച്ചിയാണ് ബിരിയാണിക്ക് വേണ്ടി ഉപയോഗിക്കുന്നത്. കേരളത്തിലെ ഫാമുകളിൽ ബ്രോയിലർ കോഴികളെയാണ് അധികവും ഉൽപാദിപ്പിക്കുന്നത്.
അതിനാൽ തന്നെ തമിഴ്‌നാട്ടിൽ നിന്നുള്ള ഇടനിലക്കാരാണ് കേരളത്തിലെ ലഗോൺ കോഴിയിറച്ചി വില നിശ്ചയിക്കുന്നത്. ലഗോൺ ഉൽപാദനം കുറച്ചതും തമിഴ്നാട്ടിലെ ഫാമുകളിൽ നിന്ന് ഇറച്ചിക്കോഴികളെ ലഭിക്കുന്നതിൽ വന്ന കുറവും വില വർധനക്ക് ആക്കം കൂട്ടി.
Also Read : മാംസാഹാരത്തോടൊപ്പം പാൽ ഉത്പന്നങ്ങൾ കഴിക്കാമോ ? അറിയേണ്ടതെല്ലാം
