കാസർകോട് : കുവൈറ്റിൽ കെട്ടിടത്തിലുണ്ടായ തീപിടിത്തത്തിൽ നിന്ന് രക്ഷപ്പെട്ട നളിനാക്ഷന്‍റെ ആരോഗ്യനില തൃപ്‌തികരമെന്നും ദൈവത്തിനു നന്ദിയെന്നും ഭാര്യ ബിന്ദുവും സഹോദരൻ രാജുവും ഇടിവി ഭാരതിനോട്. ഇത് നളിനാക്ഷന്‍റെ രണ്ടാം ജന്മമാണെന്നും ശസ്ത്രക്രിയ പൂർത്തിയായെന്നും വീഡിയോ കോളിലൂടെ വിളിച്ചു സംസാരിച്ചെന്നും ഭാര്യ പ്രതികരിച്ചു.
നാളിനാക്ഷനെ നാട്ടിലെത്തിക്കാനുള്ള നടപടികൾ വേഗത്തിലാക്കണമെന്ന് സഹോദരൻ രാജു അവശ്യപ്പെട്ടു. അപകടനില തരണം ചെയ്‌തുവെന്ന് കേട്ടപ്പോൾ തന്നെ സമാധാനം ആയെന്നും രാജു പറഞ്ഞു. മൂന്നാം നിലയിൽ നിന്ന് താഴെയുള്ള വാട്ടർ ടാങ്കിലേക്ക് ചാടിയാണ് നളിനാക്ഷൻ രക്ഷപെട്ടത്. തീ ആളി പടരുന്നത് കണ്ട് നളിനാക്ഷൻ വാട്ടർ ടാങ്കിലേക്ക് എടുത്ത് ചാടുകയായിരുന്നു. നേരെ ചെന്ന് വീണത് വെള്ളത്തിലേക്ക് ആയിരുന്നു.
പരിക്കേറ്റെങ്കിലും മരണത്തിൽ നിന്നും അത്ഭുതകരമായി നളിനാക്ഷൻ രക്ഷപ്പെട്ടു. നളിനാക്ഷൻ അപകടത്തിൽപ്പെട്ടു എന്ന വാർത്ത നാട്ടിൽ ഉച്ചയ്ക്ക് തന്നെ അറിഞ്ഞിരുന്നു. വൈകിട്ടോടെ നളിനാക്ഷന്‍റെ ശബ്‌ദം ഫോണിൽ കേട്ടപ്പോൾ തൃക്കരിപ്പൂർ ഒളവറയിലെ വീട്ടിൽ ആശ്വാസമായി. വീഴ്‌ചയിൽ അരയ്ക്ക് താഴെ പരിക്കേറ്റ നളിനാക്ഷൻ ആശുപത്രിയിൽ ചികിത്സയിലാണ്. ആശുപത്രിയിൽ എത്തുന്നതുവരെ ബോധമുണ്ടായിരുന്നില്ല. പത്ത് വർഷമായി നളിനാക്ഷൻ ഗൾഫിൽ ജോലി ചെയ്യുന്നു.
