തിരുവനന്തപുരം: ഡ്രൈവിംഗ് പഠിക്കാൻ കെഎസ്ആർടിസിയുടെ ഡ്രൈവിംഗ് സ്‌കൂൾ തയ്യാർ. തിരുവനന്തപുരം ആനയറയിലെ സ്വിഫ്റ്റിന്‍റെ ആസ്ഥാനത്താണ് കെഎസ്ആർടിസിയുടെ ആദ്യ ഡ്രൈവിംഗ് സ്‌കൂൾ തുടങ്ങുക. ഇതിന്‍റെ ഉദ്ഘാടനം ലോക്‌സഭ തെരഞ്ഞെടുപ്പ് ഫലപ്രഖ്യാപനത്തിന് ശേഷം ഗതാഗത മന്ത്രി കെബി ഗണേഷ് കുമാർ നിർവഹിക്കുമെന്ന് അധികൃതർ അറിയിച്ചു.
ടെസ്റ്റ് , സ്വിഫ്റ്റിന്‍റെ ആസ്ഥാനത്ത് നടത്താനും അട്ടക്കുളങ്ങരയിലെ കെഎസ്ആർടിസി സ്‌റ്റാഫ് ട്രെയിനിങ് സെന്‍ററിൽ ഡ്രൈവിംഗ് പരിശീലനം നൽകാനുമാണ് തീരുമാനം. നിലവിൽ ഇവിടെ ഡ്രൈവിംഗ് സ്‌കൂളിനുള്ള ലൈസൻസ് ഉണ്ട്. അപകടരഹിതമായി ഡ്രൈവിംഗ് പരിശീലനം നടത്താനുള്ള ഡ്രൈവിംഗ് സിമുലേറ്റർ അടക്കമുള്ള സംവിധാനങ്ങൾ ഉടൻ തന്നെ സജ്ജീകരിക്കും.
കെഎസ്ആർടിസിയുടെ കീഴിലുള്ള 22 കേന്ദ്രങ്ങളിൽ ഡ്രൈവിംഗ് സ്‌കൂളുകൾ ആരംഭിക്കുമെന്നായിരുന്നു ഗതാഗത മന്ത്രിയുടെ പ്രഖ്യാപനം. ആദ്യ ഘട്ടത്തിൽ 11ഡ്രൈവിംഗ് സ്‌കൂളുകളും രണ്ടാം ഘട്ടത്തിൽ ബാക്കിയുള്ളവയും സജ്ജമാക്കാനാണ് ഇപ്പോൾ ശ്രമം നടക്കുന്നത്. കെഎസ്ആർടിസിയുടെ സ്വന്തം സ്ഥലത്താണ് ഡ്രൈവിംഗ് സ്‌കൂളുകൾ ആരംഭിക്കുന്നത് എന്നതിനാൽ ചെലവും കുറയും എന്നതാണ് നേട്ടം.
പഠിപ്പിക്കുന്നതിന് വേണ്ട ഇരുചക്രവാഹനങ്ങളും കാറും വാങ്ങുക എന്നത് മാത്രമാണ് അധിക ചെലവായി വരുന്നത്. മാത്രമല്ല കെഎസ്ആർടിസിയിൽ വർക്ക്‌ഷോപ്പുകളും മികച്ച എഞ്ചിനീയർമാരും ഉള്ളതിനാൽ വാഹനങ്ങളുടെ പ്രവർത്തന പരിചയ ക്ലാസുകളും അപേക്ഷകർക്ക് നല്‌കാൻ സാധിക്കും എന്നതും പ്രത്യേകതയാണ്.
എടപ്പാൾ, അങ്കമാലി, പാറശാല, ഈഞ്ചയ്ക്കൽ, ആനയറ, ആറ്റിങ്ങൽ, ചാത്തന്നൂർ, ചടയമംഗലം, മാവേലിക്കര, പന്തളം, പാലാ, കുമളി, പെരുമ്പാവൂർ, ചാലക്കുടി, നിലമ്പൂർ, പൊന്നാനി, ചിറ്റൂർ, കോഴിക്കോട്, മാനന്തവാടി, തലശ്ശേരി, കാഞ്ഞങ്ങാട് എന്നിവിടങ്ങളിലാണ് കെഎസ്ആർടിസി ഡ്രൈവിംഗ് സ്‌കൂളുകൾ ആരംഭിക്കുന്നത്.
ALSO READ: മൂന്നാറിൽ വീണ്ടും പടയപ്പയുടെ പരാക്രമം; വാഹനങ്ങൾ തടഞ്ഞു; വൈദികന്‍ രക്ഷപെട്ടത് തലനാരിഴയ്‌ക്ക്
