ഇടുക്കി: പുല്ലുപാറയില്‍ കെഎസ്‌ആര്‍ടിസി ബസ് താഴ്‌ചയിലേക്ക് മറിഞ്ഞ് നാല് മരണം. മാവേലിക്കര സ്വദേശികളായ അരുൺ ഹരി, രമ മോഹൻ, സംഗീത്, ബിന്ദു നാരായണൻ എന്നിവരാണ് മരിച്ചതെന്നാണ് വിവരം. ഗുരുതരമായി പരിക്കേറ്റ രണ്ട് പേരെ പാലായിലെ സ്വകാര്യ ആശുപത്രിയിലേക്ക് മാറ്റി.
മാവേലിക്കരയിൽ നിന്നും തഞ്ചാവൂർ ക്ഷേത്രത്തിലേക്ക് പോയ സംഘം തിരികെ മടങ്ങി വരും വഴിയാണ് ബസ് അപകടത്തിൽപ്പെട്ടത്. പുല്ലുപാറയ്ക്ക് സമീപം റോഡിൽ നിന്ന് 30 അടിയോളം താഴ്‌ചയിലേക്ക് മറിഞ്ഞാണ് അപകടമുണ്ടായത്. സംഭവ സമയത്ത് ബസിൽ 34 യാത്രക്കാരും മൂന്ന് ജീവനക്കാരുമാണുണ്ടായിരുന്നത്.
അതേസമയം മരിച്ചവരുടെ മൃതദേഹങ്ങൾ മുണ്ടക്കയം മെഡിക്കൽ ട്രെസ്‌റ്റ് ആശുപത്രിയിലാണ് സൂക്ഷിച്ചിരിക്കുകയാണ്. പരിക്കേറ്റ മറ്റുള്ളവർ മുണ്ടക്കയത്തെ സ്വകാര്യ ആശുപത്രിയിലും കാ‍ഞ്ഞിരപ്പള്ളി ആശുപത്രിയിലുമായി ചികിത്സയിൽ കഴിയുകയാണ്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
ഇന്ന് രാവിലെ 6.15 ഓടെയായിരുന്നു അപകടം. താഴ്‌ചയിലേക്ക് മറിഞ്ഞ ബസിനടിയിൽപ്പെട്ടവരാണ് മരിച്ചതെന്നാണ് വിവരം. കുട്ടിക്കാനത്തിനും മുണ്ടക്കയത്തിനും ഇടയിൽ കൊടും വളവുകൾ നിറഞ്ഞ റോഡിൽ ഒരു ഭാഗം കൊക്കയാണ്. ബ്രേക്ക് പൊട്ടി വാഹനം റോഡിൻ്റെ ബാരിക്കേഡ് തക‍ർത്ത് താഴ്‌ചയിലേക്ക് മറിയുകയായിരുന്നു.
ഫയർഫോഴ്‌സ്, നാട്ടുകാർ എന്നിവരുടെ നേതൃത്വത്തിലാണ് രക്ഷാപ്രവർത്തനം നടത്തിയത്. സമീപത്തെ മരങ്ങളിൽ ബസ് തട്ടി നിന്നതിനാൽ വലിയ അപകടമാണ് ഒഴിവായത്.
Also Read: കൊല്ലത്ത് ശബരിമല തീർഥാടകർ സഞ്ചരിച്ച കാറും ടൂറിസ്റ്റ് ബസും കൂട്ടിയിടിച്ചു; 2 മരണം, 3 പേർക്ക് പരിക്ക്
