മറിയക്കുട്ടിക്ക് വീടൊരുക്കി കെപിസിസി (ETV Bharat)
ഇടുക്കി: ക്ഷേമ പെന്‍ഷന്‍ മുടങ്ങിയതില്‍ പ്രതിഷേധിച്ച് അടിമാലിയില്‍ യാചനാ സമരം നടത്തിയ മറിയക്കുട്ടിക്ക് കെപിസിസി നിര്‍മ്മിച്ച് നല്‍കിയ വീടിന്‍റെ താക്കോല്‍ കൈമാറി. നിര്‍മ്മാണം പൂര്‍ത്തീകരിച്ച വീടിന്‍റെ താക്കോല്‍ കെപിസിസി പ്രസിഡന്‍റ് കെ സുധാകരന്‍ മറിയക്കുട്ടിക്ക് കൈമാറി.
അടിമാലി ഇരുന്നൂറേക്കറിലാണ് മറിയക്കുട്ടിക്ക് പുതിയ വീട് നിര്‍മ്മിച്ച് നല്‍കിയത്. 12 ലക്ഷം രൂപ മുതല്‍ മുടക്കിലാണ് വീട് നിര്‍മിച്ചത്. വീട് യാഥാര്‍ത്ഥ്യമാക്കി തന്നതിലുള്ള സന്തോഷം മറിയക്കുട്ടി കെപിസിസി പ്രസിഡന്‍റിനെ അറിയിച്ചു. കെപിസിസി നല്‍കിയ തുകക്ക് പുറമെ കോണ്‍ഗ്രസ് അടിമാലി ബ്ലോക്ക് കമ്മിറ്റി ബാക്കി തുക കണ്ടെത്തിയാണ് വീടിന്‍റെ നിര്‍മ്മാണ ജോലികള്‍ പൂര്‍ത്തീകരിച്ചത്. ചടങ്ങില്‍ വിവിധ നേതാക്കള്‍ പങ്കെടുത്തു.
