കാസർകോട്: കാറഡുക്ക സഹകരണസംഘം തട്ടിപ്പ് കേസിൽ ഒരാൾ കൂടി പിടിയിൽ. കോഴിക്കോട് സ്വദേശി നബീലിനെയാണ് അന്വേഷണ സംഘം പിടികൂടിയത്. തട്ടിയെടുത്ത പണം മുഴുവൻ താൻ കോഴിക്കോട് സ്വദേശി നബീലിന് കൈമാറിയെന്നാണ് സൊസൈറ്റി സെക്രട്ടറി രതീശൻ നൽകിയ മൊഴി.
കോഴിക്കോട് സ്വദേശിയായ നബീലിനെ ജബ്ബാറാണ് രതീശന് പരിചയപ്പെടുത്തി കൊടുത്തത്. വിദേശത്ത് നിന്ന് 673 കോടി രൂപ ലഭിക്കാനുണ്ടെന്ന റിസർവ് ബാങ്കിന്‍റെ പേരിലുള്ള വ്യാജരേഖ കാണിച്ചാണ് തന്നെ നബീലും ജബ്ബാറും കബളിപ്പിച്ചതെന്നാണ് രതീശൻ പറയുന്നത്. കമ്മീഷൻ ഉൾപ്പെടെ നൽകാമെന്ന് പറഞ്ഞായിരുന്നു തട്ടിപ്പ്.
രതീശൻ കിന്നിംഗാറില്‍ സഹകരണ സംഘത്തിന്‍റെ പുതിയ ശാഖ ആരംഭിക്കാന്‍ ശ്രമം നടത്തിയിരുന്നു. ഇതിനായി 10 കോടിയുടെ നിക്ഷേപം നൽകാമെന്നും ജബ്ബാർ വിശ്വസിപ്പിച്ചു. ബാങ്ക് സെക്രട്ടറിയും, സിപിഎം മുള്ളേരിയ ലോക്കൽ കമ്മിറ്റി അംഗവും ആയിരുന്ന കെ രതീശനെയും, കൂട്ടുപ്രതി ജബ്ബാറിനെയും ചോദ്യം ചെയ്‌തതോടെയാണ് നബീലിനെക്കുറിച്ച് സൂചന അന്വേഷണ സംഘത്തിന് ലഭിച്ചത്.
അതേസമയം രതീശന്‍റെ മൊഴി പൂർണമായി അന്വേഷണ സംഘം മുഖവിലയ്‌ക്കെടുത്തിട്ടില്ല. കാസർകോട് കോടതി റിമാൻഡ് ചെയ്‌ത രതീശനെയും ജബ്ബാറിനെയും ക്രൈം ബ്രാഞ്ച് അടുത്ത ദിവസം കസ്‌റ്റഡിയിൽ വാങ്ങും. ഇവരെ നബീലിനും നേരത്തെ പിടിയിലായ മറ്റ് മൂന്ന് പേർക്കൊപ്പമിരുത്തി ചോദ്യം ചെയ്യാനാണ് തീരുമാനം.
ഇല്ലാത്ത ആളുകളുടെ പേരിൽ സ്വർണപ്പണയ വായ്‌പ എടുത്തും പണയം വച്ച സ്വർണ്ണം കടത്തികൊണ്ട് പോയും അപക്‌സ്‌ ബാങ്ക് സൊസൈറ്റിക്ക് നൽകിയ പണം തട്ടിയെടുത്തുമായിരുന്നു സൊസൈറ്റിയിൽ നിന്ന് 4.76 കോടി രതീശൻ തട്ടിയെടുത്തത്.
തട്ടിയെടുത്ത സ്വർണം പണയം വയ്ക്കാൻ സഹായിച്ച രതീശന്‍റെ സുഹൃത്തുക്കളായ അനില്‍കുമാര്‍, ഗഫൂർ, ബഷീര്‍ എന്നിവരെ ബെംഗളൂരുവിൽ നിന്ന് നേരത്തെ പിടികൂടിയിരുന്നു. കാസർകോടെ വിവിധ ബാങ്കുകളിൽ പണയം വച്ച 1.6 കിലോ സ്വർണം തിരിച്ചുപിടിച്ചിട്ടുമുണ്ട്.
ALSO READ: കാറഡുക്ക സഹകരണ സംഘം തട്ടിപ്പ്; മുഖ്യപ്രതി രതീശൻ മുഴുവന്‍ പണവും നല്‍കിയത് കോഴിക്കോട് സ്വദേശിയ്‌ക്ക്
