കോഴിക്കോട് : താമരശ്ശേരിയിൽ യുവതിയെ നഗ്ന പൂജയ്‌ക്ക് നിർബന്ധിച്ചതായി പരാതി. സംഭവത്തിൽ ഭർത്താവിനെയും സുഹൃത്തിനെയും പൊലീസ് അറസ്റ്റ് ചെയ്‌തു. താമരശ്ശേരി അടിവാരം മേലെ പൊടിക്കൈയിൽ പി കെ പ്രകാശനും യുവതിയുടെ ഭർത്താവുമാണ് അറസ്റ്റിലായത്.
കുടുംബ പ്രശ്‌നം പരിഹരിക്കാനും അഭിവൃദ്ധിക്കും വേണ്ടി യുവതിയോട് നഗ്നപൂജ നടത്താൻ ആവശ്യപ്പെട്ടു എന്നാണ് പരാതി. അതീവ ദാരിദ്ര്യത്തിൽ കഴിയുകയാണ് യുവതിയും മൂന്ന് മക്കളും. പരാതി പറയാൻ പൊലീസ് സ്റ്റേഷനിൽ വരാൻ വണ്ടി കൂലി പോലുമില്ലാത്ത അവസ്ഥയായിരുന്നു യുവതിയുടേത്.
ഫോൺ കോളിൽ പരാതി ലഭിച്ച പ്രകാരം താമരശ്ശേരി സ്റ്റേഷനിലെ വനിത പൊലീസുകാരി വീട്ടിലെത്തി പരാതി രേഖപ്പെടുത്തുകയായിരുന്നു. ഒരു വർഷത്തിലേറെയായി യുവതി ഭർത്താവുമായി പിരിഞ്ഞ് കഴിയുകയാണ്. ഇടയ്‌ക്ക് ഭര്‍ത്താവ് വന്ന് ഉപദ്രവിക്കും.
ഇതിനിടെയാണ് ഭർത്താവിന്‍റെ സുഹൃത്ത് പ്രകാശൻ വിളിക്കാനും മെസേജ് അയക്കാനും തുടങ്ങിയത്. കുടുംബ പ്രശ്‌നം പരിഹരിക്കുന്ന പൂജാരിയെ പോലെയാണ് പെരുമാറിയത്. നഗ്ന പൂജയ്‌ക്ക് നിർബന്ധിച്ചു.
വേറെ മാർഗമില്ലാതായതോടെ പൊലീസ് സ്റ്റേഷനിലേക്ക് വിളിക്കുകയായിരുന്നു എന്ന് താമരശേരി ഡിവൈഎസ്‌പി പ്രമോദ് പറഞ്ഞു. ഭർത്താവിന്‍റെ ഒത്താശയോട് കൂടിയാണ് പ്രകാശൻ സ്ത്രീയെ ശല്യപ്പെടുത്തിയതെന്ന് പൊലീസ് പറഞ്ഞു. കൂടുതൽ ചോദ്യം ചെയ്‌ത ശേഷം പ്രതികളെ കോടതിയിൽ ഹാജരാക്കും.
Also Read: ഹോളി ആഘോഷത്തിനിടെ ദളിത് സ്ത്രീയെ മർദിച്ച് നഗ്നയാക്കി നടത്തിച്ചു; നാല് സ്‌ത്രീകള്‍ അറസ്റ്റില്
