കോഴിക്കോട് : വിശ്വാസികൾ നിസ്ക്കരിക്കുന്നതിനിടെ പള്ളിയിൽ കയറി ജയ്ശ്രീറാം മുഴക്കി വിദ്വേഷ പരാമർശം നടത്തിയ യുവാവ് അറസ്റ്റിൽ. കാരാടി സ്വദേശി ആലിക്കുന്നുമ്മൽ അഭിജയ് ആണ് അറസ്റ്റിലായത്. കോഴിക്കോട് താമരശേരിയിലാണ് സംഭവം. തന്‍റെ പ്രകടനത്തിന്‍റെ വീഡിയോ ചിത്രീകരിച്ച ഇയാൾ അത് സോഷ്യൽ മീഡിയയിൽ പ്രചരിപ്പിച്ചു. താമരശേരി കാരാടി ജുമാമസ്‌ജിദിലാണ് നിസ്‌കാരം നടക്കുന്ന സമയത്ത് പള്ളിക്കകത്ത് കയറിയുള്ള യുവാവിന്‍റെ അഭ്യാസം.
പള്ളിക്കുള്ളിൽ കയറി ജയ്ശ്രീറാം വിളിക്കുമെന്ന് പറഞ്ഞാൽ വിളിക്കുമെന്ന വെല്ലുവിളി ഉയർത്തുന്നതാണ് ഒരു വീഡിയോ. രണ്ടാമത്തെ വീഡിയോയിൽ ഇയാൾ മുസ്ലിംകളെ അസഭ്യം പറയുന്നതാണ്. പള്ളിയിലുണ്ടായിരുന്നവർ നിസ്‌കാരത്തിലായതിനാൽ ഇയാൾ പള്ളിയിൽ കയറിയത് അറിഞ്ഞിരുന്നില്ല.
വീഡിയോ പ്രചരിച്ചതിന് പിന്നാലെയാണ് പള്ളി കമ്മിറ്റി ഭാരവാഹികൾ വിവരം അറിഞ്ഞത്. തുടർന്ന് താമരശേരി പൊലീസിൽ പരാതി നൽകുകയായിരുന്നു. സംഘർഷം സൃഷ്‌ടിക്കുകയായിരുന്നു ഇയാളുടെ ലക്ഷ്യമെന്നാണ് കരുതുന്നത്. പ്രതിയെ പൊലീസ് ചോദ്യം ചെയ്‌ത് വരികയാണ്.
