തിരുവനന്തപുരം: സംസ്ഥാനത്തെ 1,458 സര്‍ക്കാര്‍ ജീവനക്കാര്‍ സാമൂഹ്യ സുരക്ഷാ പെന്‍ഷന്‍ കൈപ്പറ്റുന്നതായി കണ്ടെത്തി. ധനവകുപ്പ് നിര്‍ദേശപ്രകാരം ഇന്‍ഫര്‍മേഷന്‍ കേരള മിഷന്‍ നടത്തിയ പരിശോധനയിലാണ് തട്ടിപ്പ് കണ്ടെത്തിയത്. ഗസറ്റഡ് ഉദ്യോഗസ്ഥര്‍ അടക്കം പെന്‍ഷന്‍ കൈപ്പറ്റിയതായാണ് ഇന്‍ഫര്‍മേഷന്‍ കേരള മിഷന്‍റെ കണ്ടെത്തല്‍.
കോളജ് അസിസ്റ്റന്‍റ് പ്രൊഫസര്‍മാര്‍ ഉള്‍പ്പെടെ ക്ഷേമ പെന്‍ഷന്‍ വാങ്ങുന്നതായി അന്വേഷണത്തില്‍ കണ്ടെത്തി. ഹയര്‍ സെക്കൻഡറിയിലെ അധ്യാപകരുള്‍പ്പടെ ക്ഷേമ പെന്‍ഷന്‍ വാങ്ങുന്നവരുടെ പട്ടികയിലുണ്ട്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
അനധികൃതമായി കൈപ്പറ്റിയ പെന്‍ഷന്‍ തുക പലിശ അടക്കം തിരിച്ചു പിടിക്കാനും കുറ്റക്കാര്‍ക്കെതിരെ കര്‍ശന അച്ചടക്ക നടപടി സ്വീകരിക്കാനും ധന മന്ത്രി കെ എന്‍ ബാലഗോപാല്‍ നിര്‍ദേശിച്ചു.
പെന്‍ഷന്‍ കൈപ്പറ്റുന്ന രണ്ട് അസിസ്റ്റന്‍റ് പ്രൊഫസര്‍മാരില്‍ ഒരാള്‍ തിരുവനന്തപുരം ജില്ലയിലെ സര്‍ക്കാര്‍ കോളജിലെ അധ്യാപകനാണ്. ഒരാള്‍ പാലക്കാട് ജില്ലയിലെ സര്‍ക്കാര്‍ കോളജിലും ജോലി ചെയ്യുന്നു. ഹയര്‍ സെക്കൻഡറി അധ്യാപകരായ മൂന്ന് പേരാണ് പെന്‍ഷന്‍ വാങ്ങുന്നത്.
ആരോഗ്യ വകുപ്പിലാണ് ഏറ്റവും കൂടുതല്‍ പേര്‍ ക്ഷേമ പെന്‍ഷന്‍ വാങ്ങുന്നവരുള്ളത്. 373 പേരാണ് അനധികൃതമായി ക്ഷേമ പെന്‍ഷന്‍ വാങ്ങുന്നത്. പൊതുവിദ്യാഭ്യാസ വകുപ്പാണ് രണ്ടാം സ്ഥാനത്ത്. 224 പേരും മെഡിക്കല്‍ എഡ്യുക്കേഷന്‍ വകുപ്പില്‍ 124 പേരും, ആയുര്‍വേദ വകുപ്പില്‍ (ഇന്ത്യന്‍ സിസ്റ്റം ഓഫ് മെഡിസിന്‍) 114 പേരും, മൃഗസംരണക്ഷ വകുപ്പില്‍ 74 പേരും, പൊതുമരാമത്ത് വകുപ്പില്‍ 47 പേരും ക്ഷേമ പെന്‍ഷന്‍ വാങ്ങുന്ന സര്‍ക്കാര്‍ ജീവനക്കാരാണ്.
സാങ്കേതിക വിദ്യാഭ്യാസ വകുപ്പില്‍ 46 പേരും, ഹോമിയോപ്പതി വകുപ്പില്‍ 41 പേരും പെന്‍ഷന്‍ വാങ്ങുന്നു. കൃഷി, റവന്യു വകുപ്പുകളില്‍ 35 പേര്‍ വീതവും, ജുഡീഷ്യറി ആന്‍ഡ് സോഷ്യല്‍ ജസ്റ്റിസ് വകുപ്പില്‍ 34 പേരും, ഇന്‍ഷ്വറന്‍സ് മെഡിക്കല്‍ സര്‍വീസ് വകുപ്പില്‍ 31 പേരും, കോളജിയറ്റ് എഡ്യുക്കേഷന്‍ വകുപ്പില്‍ 27 പേരും, ഹോമിയോപ്പതിയില്‍ 25 പേരും ക്ഷേമ പെന്‍ഷന്‍ കൈപറ്റുന്നുണ്ട്.
മറ്റ് വകുപ്പുകളിലും സ്ഥാപനങ്ങിലും പെന്‍ഷന്‍ പറ്റുന്നവരുടെ കണക്ക്:
വില്‍പന നികുതി - 14 വീതം
പട്ടികജാതി ക്ഷേമം - 13
ഗ്രാമ വികസനം, പൊലീസ്, പിഎസ്‌സി, ആയുര്‍വേദ മെഡിക്കല്‍ എഡ്യുക്കേഷന്‍ 10 വീതം.
സഹകരണം - 8,
ലജിസ്ലേച്ചര്‍ സെക്രട്ടറിയേറ്റ്, തൊഴില്‍ പരിശീലനം, പൊതുഭരണം, വൊക്കേഷണല്‍ ഹയര്‍ സെക്കൻഡറി - 7 വീതം
വനം വന്യജീവി - 9
സോയില്‍ സര്‍വേ, ഫിഷറീസ് - 6 വീതം
തദ്ദേശ ഭരണം, വാഹന ഗതാഗതം, വ്യവാസായവും വാണിജ്യവും, ഫയര്‍ഫോഴ്‌സ്, ക്ഷീര വികസനം, പൊതുവിതരണം, അഡ്വക്കേറ്റ് ജനറല്‍ ഓഫിസ് - 4 വീതം
സാമൂഹിക ക്ഷേമം, എക്സൈസ്, ആര്‍ക്കിയോളജി, രജിസ്ട്രേഷന്‍, മ്യുസിയം, പ്രിന്‍റിങ്, ഭക്ഷ്യ സുരക്ഷ - 3 വീതം
തൊഴില്‍, മെഡിക്കല്‍ എക്‌സാമിനേഷന്‍ ലബോട്ടറി, എക്ണോമിക്‌സ് ആന്‍ഡ് സ്റ്റാറ്റിറ്റിക്‌സ്, ലീഗല്‍ മെട്രോളജി, ലാ കോളജുകള്‍ - 2 വീതം
എന്‍സിസി, ലോട്ടറീസ്, ജയില്‍, തൊഴില്‍ കോടതി, ഹാര്‍ബര്‍ എന്‍ജിനിയറിങ്, ഇലക്ട്രിക്കല്‍ ഇന്‍സ്‌പക്ട്രേറ്റ്, ഡ്രഗ്‌സ് കണ്‍ട്രോള്‍, പിന്നോക്ക വിഭാഗ വികസനം, കയര്‍ വകിസനം - 1 വീതം.
ഉദ്യോഗസ്ഥര്‍ക്കെതിരെ കര്‍ശന നടപടി എന്ന് ധനമന്ത്രി
സർക്കാർ ഉദ്യോഗസ്ഥർ ക്ഷേമ പെൻഷൻ വാങ്ങുന്നത് തെറ്റായ കാര്യമാണെന്ന് ധനമന്ത്രി കെ എൻ ബാലഗോപാൽ പ്രതികരിച്ചു. "പ്രാഥമിക അന്വേഷണത്തിൽ വിവിധ ജീവനക്കാർ സാമൂഹ്യ ക്ഷേമ പെൻഷൻ വാങ്ങുന്നതായി കണ്ടെത്തിയിട്ടുണ്ട്. ആവശ്യമായ നടപടി എടുക്കാൻ നിർദേശം നൽകി. പാവപ്പെട്ടവരുടെ പെൻഷൻ തുക തട്ടിയെടുക്കുന്നത് അംഗീകരിക്കാനാകില്ല. പൂർണമായും പട്ടിക പുറത്ത് വിട്ടാൽ ഞെട്ടും.
ർ ക്ഷേമ പെൻഷന് അവകാശമുണ്ടെന്ന് സാക്ഷ്യപ്പെടുത്തുന്ന തദ്ധേശ സ്വയംഭരണ സ്ഥാപനങ്ങളിലെ ഉദ്യോഗസ്ഥർക്കെതിരെയും നടപടി ഉണ്ടാകും. ഗസറ്റഡ് ഉദ്യോഗസ്ഥർ ഉൾപ്പെടെെ 1,458 സർക്കാർ ജീവനക്കാർ സാമൂഹ്യ പെൻഷൻ കൈപ്പറ്റി എന്നാണ് കണ്ടെത്തിയത്. അനധികൃതമായി പെൻഷൻ തുക പലിശ അടക്കം തിരിച്ചു പിടിക്കാൻ ധന വകുപ്പ് നിർദേശം നൽകി,' എന്ന് ധനമന്ത്രി വ്യക്തമാക്കി.
എന്താണ് സാമൂഹ്യ സുരക്ഷാ പെൻഷൻ, എത്ര രൂപ വീതം ലഭിക്കും?
സമൂഹത്തിലെ ദുര്‍ബല വിഭാഗത്തെ സഹായിക്കുന്നതിനായി കേന്ദ്ര-സംസ്ഥാന സര്‍ക്കാരുകളുടെ പങ്കാളിത്തത്തോടെ നടപ്പാക്കി വരുന്ന പദ്ധതിയാണ് സാമൂഹ്യ സുരക്ഷാ പെൻഷൻ. മുതിര്‍ന്ന പൗരന്മാര്‍, അവിവാഹിതര്‍, ഭിന്നശേഷിക്കാര്‍, വിധവകള്‍, കര്‍ഷകര്‍ ഉള്‍പ്പെടെയുള്ള വിഭാഗങ്ങള്‍ക്ക് ഇതിന്‍റെ ആനുകൂല്യങ്ങള്‍ ലഭിക്കും. 60 വയസിന് മുകളിലുള്ള മുതിര്‍ന്ന പൗരന്മാര്‍ക്ക് പ്രതിമാസം 1600 രൂപയാണ് സാമൂഹിക ക്ഷേമ പെൻഷൻ പദ്ധതിയിലൂടെ ലഭ്യമാകുന്നത്.
Also Read: ന്യായമായ വേതനം ഇല്ല; അങ്കണവാടി ജീവനക്കാർ പ്രതിസന്ധിയിൽ, ഹോണറേറിയം വർധിപ്പിക്കണമെന്നാവശ്യം
