എറണാകുളം: വിവാഹേതര ബന്ധങ്ങള്‍ വര്‍ധിക്കുന്നതിലൂടെ കുടുംബ ബന്ധങ്ങള്‍ ശിഥിലമാകുന്ന പ്രവണത കൂടുന്നതായും കുട്ടികളെ അത് ബാധിക്കുന്നതായും വനിതാ കമ്മിഷന് അധ്യക്ഷ പി സതീദേവി. കൊച്ചിയിൽ കമ്മിഷൻ അദാലത്തിന് ശേഷം മാധ്യമങ്ങളോട് സംസാരിക്കുകയായിരുന്നു അവർ. ഭാര്യമാരുടെയും ഭർത്താക്കന്മാരുടെയും വിവാഹേതര ബന്ധങ്ങള്‍ പരാതിയായി കമ്മിഷന് മുന്നിലെത്തുന്നു.
ഇത്തരം പരാതികൾ വർധിക്കുന്നതായും കമ്മിഷൻ ചൂണ്ടിക്കാണിച്ചു. ലിവിങ് ടുഗെതര്‍ ബന്ധം വര്‍ധിക്കുന്നതിനൊപ്പം കുട്ടികള്‍ ജനിച്ച് കഴിയുമ്പോൾ അവര്‍ക്ക് സംരക്ഷണം നല്‍കുന്നത് സംബന്ധിച്ചുള്ള തര്‍ക്കങ്ങളും കൂടുന്നതായും വനിതാ കമ്മിഷൻ അധ്യക്ഷ വ്യക്തമാക്കി. ഊഷ്‌മളമായ കുടുംബ ബന്ധങ്ങൾ നില നിർത്തുന്നതിനുളള അവബോധം സൃഷ്‌ടിക്കേണ്ടതുണ്ട്.
കുടുംബ ബന്ധങ്ങള്‍ നിലനിര്‍ത്തേണ്ടതിൻ്റെ ആവശ്യകത ബോധ്യപ്പെടുത്തുന്നതിനായി ജാഗ്രതാ സമിതികളുടെ നേതൃത്വത്തിലുള്ള ബോധവത്‌കരണ പ്രവര്‍ത്തനങ്ങള്‍ കൂടുതല്‍ ശക്തിപ്പെടുത്തണമെന്നും കമ്മിഷന് പറഞ്ഞു.
തൊഴിലിടങ്ങളിലെ മാനസിക പീഡനം
തൊഴിലിടങ്ങളിലെ പീഡനവുമായി ബന്ധപ്പെട്ട് കമ്മീഷൻ്റെ മുമ്പാകെ വന്ന പരാതികളില്‍ അണ്‍ എയ്‌ഡഡ്, എയ്‌ഡഡ് വിദ്യാഭ്യാസ സ്ഥാപനങ്ങളില്‍ ഇൻ്റേണല്‍ കമ്മിറ്റികള്‍ കാര്യക്ഷമമായല്ല പ്രവർത്തിക്കുന്നതെന്ന് കമ്മിഷൻ വിലയിരുത്തി. സിസിടിവി ക്യാമറകളിലൂടെ അധ്യാപകരുടെ ചെറിയ ചലനങ്ങള്‍ പോലും നിരീക്ഷിച്ച് കൊണ്ട് അവരുടെ ആത്മവിശ്വാസം തകർക്കുന്ന രീതിയിൽ ചില വിദ്യാഭ്യാസ സ്ഥാപനങ്ങള്‍ പ്രവര്‍ത്തിക്കുന്നതായും കമ്മിഷന് പരാതി ലഭിച്ചു. തൊഴിലിടങ്ങളില്‍ വനിതാ അധ്യാപകർക്ക് ആത്മവിശ്വാസത്തോടെ പ്രവര്‍ത്തിക്കാനുള്ള സാഹചര്യം ഒരുക്കാന്‍ സ്‌കൂൾ മാനേജ്‌മെൻ്റ് ശ്രദ്ധ പുലര്‍ത്തണമെന്ന് കമ്മിഷന് നിര്‍ദേശിച്ചു.
അവഗണിക്കപ്പെടുന്ന വയോധികരായ അമ്മമാർ
നിരാലംബരാകുന്ന അനവധി അമ്മമാരാണ് കമ്മിഷന് മുന്നിലെത്തുന്നത്. പ്രായമായ മാതാപിതാക്കളുടെ സ്വത്തുക്കള്‍ കൈക്കലാക്കിയ ശേഷം അവരെ ഇറക്കി വിടുന്ന അനവധി പരാതികളാണ് കമ്മിഷന് ലഭിക്കുന്നത്.
കൗൺസിലിംഗ് സംവിധാനമൊരുക്കി കമ്മീഷൻ
ദാമ്പത്യ പ്രശ്‌നങ്ങള്‍ വർധിക്കുന്നതിനാൽ കൗണ്‍സിലിംഗ് ഒട്ടേറെ പരാതികളിൽ ആവശ്യമായിരിക്കുകയാണ്. കൗൺസിലിംഗ് ആവശ്യമുള്ളവർക്കായി തിരുവനന്തപുരം കമ്മിഷൻ ഓഫിസിലും എറണാകുളം റീജണല്‍ ഓഫിസിലും കൗൺസിലിംഗ് നൽകുന്നതിനുള്ള സംവിധാനങ്ങൾ ഒരുക്കിയിട്ടുണ്ടെന്നും കമ്മിഷൻ അറിയിച്ചു.
എറണാകുളം ജില്ലാതല മെഗാ അദാലത്തില്‍ 117 പരാതികളാണ് കമ്മിഷന് പരിഗണിച്ചത്. 15 കേസുകള്‍ തീര്‍പ്പാക്കി. അഞ്ച് കേസുകള്‍ പൊലീസ് റിപ്പോര്‍ട്ടിന് വിട്ടു. മൂന്ന് പരാതികളില്‍ തുടര്‍ കൗണ്‍സിലിംഗ് കൊടുക്കുന്നതിന് നിര്‍ദേശിച്ചു.
Also Read: 'കുട്ടികള്‍ രക്ഷിതാക്കളുടെ സ്ഥാവര ജംഗമ സ്വത്തല്ല'; നിര്‍ണായക നിരീക്ഷണവുമായി സുപ്രീം കോടതി
