വയനാട്ടിലെയും ചേലക്കരയിലെയും ഉപതെരഞ്ഞെടുപ്പ് ചൂടിനിടെ സിപിഎമ്മിന് തിരിച്ചടിയായി ഇപി ജയരാജന്‍റെ ആത്മകഥയിലെ പരാമര്‍ശം. രണ്ടാം പിണറായി സര്‍ക്കാര്‍ ദുര്‍ബലമാണെന്ന് അടക്കമുള്ള കാര്യങ്ങളാണ് ഇപിയുടെ 'കട്ടന്‍ ചായയും പരിപ്പുവടയും' എന്ന ആത്മകഥയില്‍ കുറിച്ചിട്ടുള്ളത്. സര്‍ക്കാരിനും പാര്‍ട്ടിക്കുമെതിരെ പുസ്‌തകത്തില്‍ കടുത്ത വിമര്‍ശനങ്ങളാണ് ഉന്നയിച്ചിട്ടുണ്ട്.
പാര്‍ട്ടിയും സര്‍ക്കാരും തെറ്റുകളെല്ലാം തിരുത്തണമെന്നും പുസ്‌തകത്തില്‍ പറയുന്നുണ്ട്. തനിക്ക് പറയാനുള്ളത് കേള്‍ക്കാതെയാണ് എല്‍ഡിഎഫ് കണ്‍വീനര്‍ സ്ഥാനത്ത് നിന്നും തന്നെ നീക്കിയത്. പ്രകാശ്‌ ജാവ്‌ദേക്കറുമായുള്ള കൂടിക്കാഴ്‌ച ലോക്‌സഭ തെരഞ്ഞെടുപ്പിന് മുമ്പ് ചര്‍ച്ചയാക്കിയതില്‍ ഗൂഢാലോചനയുണ്ടെന്നും ആത്മകഥയില്‍ പറയുന്നുണ്ട്.
പാലക്കാട്ടെ ഇടത് സ്വതന്ത്ര സ്ഥാനാര്‍ഥി പി സരിനെതിരെയും വിമര്‍ശനമുണ്ട്. സരിനെ സ്ഥാനാര്‍ഥി ആക്കിയതിലും ഇപി അതൃപ്‌തി അറിയിക്കുന്നുണ്ട്. ചേലക്കരയിലെ അന്‍വറിന്‍റെ സ്ഥാനാര്‍ഥി എല്‍ഡിഎഫിന് ദോഷമുണ്ടാക്കുമെന്നും പുസ്‌തകത്തില്‍ പറയുന്നു.
ദേശാഭിമാനിക്കായി പരസ്യവും ബോണ്ടും വാങ്ങിയത് പാര്‍ട്ടിയുമായുള്ള ചര്‍ച്ചകള്‍ക്ക് ശേഷം. എന്നാല്‍ വിഎസ്‌ അച്യുതാനന്ദന്‍ അത് തനിക്കെതിരെ ആയുധമാക്കിയെന്നും പുസ്‌തകത്തില്‍ ഇപി പറയുന്നു.
പരാമര്‍ശങ്ങളൊന്നും തന്‍റേതല്ല: 'കട്ടന്‍ ചായയും പരിപ്പുവടയും' എന്ന ആത്മകഥ സംബന്ധിച്ചുള്ള വിവാദങ്ങളില്‍ ഇപി ജയരാജന്‍ പ്രതികരിച്ചു. പുറത്തുവന്ന കാര്യങ്ങളൊന്നും താന്‍ പറയാത്തവയാണെന്നാണ് ഇപിയുടെ പ്രതികരണം. തെരഞ്ഞെടുപ്പ് ദിനത്തില്‍ തന്‍റെ പേരില്‍ തെറ്റായ പ്രചാരണം നടക്കുകയാണ്. ഇതിന് പിന്നില്‍ ഗൂഢാലോചനയുണ്ടെന്നും ഇപി പറഞ്ഞു.
പുസ്‌തകം ഇപ്പോഴും എഴുതി പൂര്‍ത്തിയാക്കിയിട്ടില്ലെന്നും ഇത്തരത്തിലുള്ള ആത്മകഥയെ കുറിച്ച് എങ്ങനെയാണ് ഇത്തരമൊരു വാര്‍ത്ത വന്നതെന്നും അദ്ദേഹം ചോദിക്കുന്നു. പുസ്‌തകം പ്രസിദ്ധീകരിക്കാന്‍ കൈമാറിയിട്ടില്ലെന്നും ഇപി ജയരാജന്‍ പറയുന്നു.
