തിരുവനന്തപുരത്ത് കാക്കകളുടെ പ്രിയപ്പെട്ട ഒരു സുഹൃത്ത് ഉണ്ട്. പടിഞ്ഞാറെ കോട്ടയ്‌ക്ക് സമീപം ചായക്കട നടത്തുന്ന മുരുകൻ ചേട്ടൻ. എന്നാൽ ഒന്ന് അറിയണമല്ലോ ആ അപൂർവ സൗഹൃദം. നേരെ വച്ചുപിടിച്ചു, പടിഞ്ഞാറെ കോട്ടയിലേക്ക്.
മുരുകൻ ചേട്ടന്‍റെ കട കണ്ടെത്താൻ ഒരൽപം ബുദ്ധിമുട്ടി. അവിടെ കണ്ട ഒരു അമ്മാവനോട് മുരുകൻ ചേട്ടനെ പറ്റിയും കാക്കകളെ പറ്റിയും അന്വേഷിച്ചു. തനി തിരുവനന്തപുരം സ്ലാങ്ങിൽ അമ്മാവന്‍റെ മറുപടി. 'യ്യോ മുരുകനെ പറ്റി പറഞ്ഞ ഒട്ടണ്ട്. പയല് എവിടെ പൊളിച്ചോണ്ട് പോയി കടയിട്ടാലും പറ്റം ചേർന്ന് കാക്കകൾ പൊളൊന്നോണ്ട് ചെല്ലും. ഞങ്ങൾക്കറിയില്ല അവന്‍റെ കൈയിലെ മായപ്പൊടിയെ കുറിച്ച്. കട തപ്പി നടക്കണ്ട പടിഞ്ഞാറെ കോട്ടയുടെ നേരെ മുന്നില്‍ ഇടതുവശത്തായി കാണാം.'
അമ്മാവൻ പറഞ്ഞ വിവരം വച്ച് കട കണ്ടെത്താൻ ബുദ്ധിമുട്ടുണ്ടായില്ല. രണ്ടു മണി ആയാൽ മുരുകൻ ചേട്ടൻ ഊണുകഴിക്കാനായി വീട്ടിലേക്ക് പോകും. വിശ്രമമെല്ലാം കഴിഞ്ഞു പിന്നെ വരുന്നത് മൂന്നര മണിക്കാണ്. ഞങ്ങൾ അര മണിക്കൂർ മുമ്പ് അവിടെയെത്തി. കാക്ക പോയിട്ട് കാക്കയുടെ പൂട പോലും പരിസരത്ത് ഇല്ല.
മുരുകൻ ചേട്ടന്‍റെ കടയോട് ചേർന്ന് നിൽക്കുന്ന ചക്ക വിൽക്കുന്ന കടയിലെ ചേട്ടനോട് കാര്യം തിരക്കി. 'അല്ല ചേട്ടാ ഈ മുരുകൻ ചേട്ടനെ തേടി കാക്ക വരുമെന്നൊക്കെ പറയുന്നത് ഉള്ളതാണോ?'. 'കാക്ക വരും പക്ഷേ അതിനൊക്കെ ഒരു സമയമുണ്ട്. ഉച്ചയ്ക്ക് 1:45, പിന്നെ 3:45'.
കൃത്യമായി സമയക്രമം പാലിക്കുന്ന കാക്കകളോ. ചുമ്മാ തള്ളല്ലേ ചേട്ടാ. എന്നാൽ നിങ്ങൾ കണ്ടോ എന്ന് മാത്രം ചക്ക വിൽക്കുന്ന ചേട്ടന്‍റെ മറുപടി. സമയം മൂന്നര കഴിയുന്നു. പരിസരത്തെ മതിലുകളിലും മരങ്ങളുടെ മുകളിലും മഴയുണ്ടായിട്ടും കാക്കകൾ എത്തിത്തുടങ്ങി. അവർ ആരെയോ കാത്തിരിക്കുന്നത് പോലെ. മുരുകൻ ചേട്ടന്‍റെ കടയിൽ അദ്ദേഹം എത്തിയിട്ടില്ല. അതാ നോക്കുമ്പോൾ ഒരു കാക്ക കടക്കുള്ളിൽ കയറി കരഞ്ഞു കൊണ്ടിരിക്കുകയാണ്. ചക്ക വിൽക്കുന്ന ചേട്ടൻ ഞങ്ങളെ നോക്കി ഒന്ന് പുഞ്ചിരിച്ചു.
ശെടാ ഇതെന്തു മറിമായം. സമയം വൈകിയില്ല ഉടൻതന്നെ മുരുകൻ ചേട്ടൻ സൈക്കിളിൽ അവിടേക്കെത്തി, കടയിലേക്ക് കയറി. പതിവു ചായ കസ്റ്റമേഴ്‌സ് എത്തിയിട്ടുണ്ട്. ഞങ്ങൾ വന്ന കാര്യം മുരുകൻ ചേട്ടനോട് പറഞ്ഞു. മുരുകൻ ചേട്ടൻ അധികം സംസാരിച്ചൊന്നുമില്ല. പതിവുകാർക്കും ഞങ്ങൾക്കും ഓരോ ചായ ആദ്യം തന്നെ ഉണ്ടാക്കിത്തന്നു.
കയ്യിലെ ചായ കഴിഞ്ഞപ്പോൾ ഞങ്ങളുടെ നോട്ടം കാക്കകളിലേക്കായി. മതിലിലിരിക്കുകയായിരുന്ന ആദ്യം മുരുകൻ ചേട്ടനെ തേടി എത്തിയ കാക്ക ആകാശത്തേക്ക് പറന്നു. അവൻ തിരിച്ചെത്തിയത് ഒപ്പം ഒരാളെ കൂട്ടി. ഈ കാക്കയാണോ ചേട്ടന്‍റെ സുഹൃത്ത്? 35 ഓളം കാക്കകളുണ്ടെന്ന് മുരുകൻ ചേട്ടന്‍റെ മറുപടി. തീർന്നില്ല, പ്രാവ്, പരുന്ത്, അണ്ണാൻ അങ്ങനെ വേറെയും സുഹൃത്തുക്കൾ.
കണ്ണടച്ച് തുറക്കും മുമ്പ് ചുറ്റും കാക്കകളുടെ സംസ്ഥാന സമ്മേളനം. കാക്കകൾക്കായി തയ്യാറാക്കിയ പ്രത്യേക ഭക്ഷണവുമായി മുരുകൻ ചേട്ടൻ അടുത്തേക്ക് നടന്നു. ചിലർ മുരുകൻ ചേട്ടന്‍റെ കയ്യിൽ നിന്നു തന്നെ ഭക്ഷണം വാങ്ങി കഴിക്കുന്നുണ്ട്. മറ്റു ചിലർക്ക് അത്ര പരിചയം ആയിട്ടില്ല, പക്ഷേ ആളെ അറിയാം. എണ്ണമില്ലാതെ കാക്കകൾ പറന്നിറങ്ങി. ഞങ്ങൾ അടുത്തേക്ക് ഷൂട്ട് ചെയ്യാനായി ചെല്ലുമ്പോൾ കാക്കകൾ പറന്നു പോകാൻ തുടങ്ങി. കാക്കകൾക്ക് മുരുകൻ ചേട്ടനോട് മാത്രമാണല്ലോ സൗഹൃദം.
കാക്കയ്‌ക്ക് കറുപ്പ് പേടിയാണെന്ന് മുരുകൻ ചേട്ടൻ പറഞ്ഞു. ഞങ്ങളുടെ ക്യാമറാമാനാകട്ടെ കറുത്ത വസ്‌ത്രമാണ് ധരിച്ചിരുന്നത്. എങ്കിലും മുരുകൻ ചേട്ടൻ ഞങ്ങൾക്ക് വേണ്ടി സ്‌നേഹത്തോടെ കാക്കകളെ വിളിച്ച് ഭക്ഷണം കൊടുത്തു. ഞങ്ങളെ കണ്ടതുകൊണ്ടാണോ എന്തോ കാക്കകൾക്ക് ഒരൽപം ഭയം ഉള്ളതുപോലെ തോന്നി.
ഭക്ഷണം കഴിച്ചു കഴിഞ്ഞതും സമീപത്തൊന്നും ഒരൊറ്റ കാക്കയില്ല. 'ഇനി നാളെ ഉച്ചയ്ക്ക് 1:45ന് കാണാം', മുരുകൻ ചേട്ടൻ ഞങ്ങളോട് പറഞ്ഞു. കഴിഞ്ഞ 15, 20 വർഷമായി കൃത്യ സമയത്ത് കാക്കകൾ മുരുകൻ ചേട്ടനെ തേടി എത്താറുണ്ട്. 15 വർഷം മുമ്പ് 'കഷണ്ടിത്തലയൻ' എന്ന് സ്‌നേഹത്തോടെ പേരിട്ട് വിളിച്ച ഒരു കാക്കയാണ് ഇത്രയും കാലം കൂട്ടുകൂടാൻ എത്തിയതിൽ ഏറ്റവും സ്‌നേഹസമ്പന്നൻ എന്ന് ചേട്ടൻ പറയുന്നു.
അവനെപ്പോലെ സ്‌നേഹമുള്ള ഒരു കാക്കയെ പിന്നീട് ഒരിക്കലും കണ്ടിട്ടില്ലത്രേ. കടയിൽ മാത്രമല്ല വീട്ടിലുമുണ്ട് ഇദ്ദേഹത്തെ തേടിയെത്തുന്ന കാക്ക ചങ്ങാതിമാർ. എന്തായാലും സംഭവം കൊള്ളാം. പക്ഷികൾക്കും പേടി കൂടാതെ ചങ്ങാത്തം കൂടാൻ സാധിക്കുന്ന മനുഷ്യരുണ്ടല്ലോ നാട്ടിൽ.
ALSO READ: 16 മീറ്റർ ആഴം, രഹസ്യങ്ങൾ ഒളിപ്പിച്ച അടിത്തട്ട്; ഒറ്റയ്‌ക്ക് ക്ഷേത്രക്കുളം പണിത് കയ്യടി നേടി യുവാവ്
