എറണാകുളം: ഓർത്തഡോക്‌സ് യാക്കോബായ പളളിത്തർക്ക വിഷയത്തിൽ സർക്കാരിനെതിരെ കോടതിയലക്ഷ്യ നടപടി. 6 പളളികൾ ജില്ലാ കലക്‌ടർമാർ ഏറ്റെടുക്കണമെന്ന ഉത്തരവ് നടപ്പാക്കാത്തതിൽ ചീഫ് സെക്രട്ടറി അടക്കമുള്ളവരോട് നേരിട്ട് ഹാജരാകാൻ ഹൈക്കോടതി നിർദേശം നൽകി.ചീഫ് സെക്രട്ടറി, എറണാകുളം, പലാക്കാട് ജില്ലാ കലക്‌ടർമാർ ഉൾപ്പെടെയുളള എതിർകക്ഷികൾക്കെതിരെ കുറ്റം ചുമത്തുന്നതിനു വേണ്ടിയാണ് ഹാജരാകാൻ ആവശ്യപ്പെട്ടത്.
നവംബർ 8 ന് രാവിലെ 10.15 ന് എല്ലാ എതിർകക്ഷികളും കോടതിയിൽ ഹാജരാകണം. യാക്കോബായ സഭയുടെ കൈവശമുളള ആറു പളളികൾ ഏറ്റെടുക്കാൻ ജില്ലാ കലക്‌ടർമാരോട് നേരത്തെ ഹൈക്കോടതി ഇടക്കാല ഉത്തരവിലൂടെ നിർദേശിച്ചിരുന്നു. ക്രമസമാധാന പ്രശ്‌നം ചൂണ്ടിക്കാട്ടി സർക്കാർ ഇതിൽ നിന്ന് പിൻമാറി. കൂടാതെ സിംഗിൾ ബഞ്ച് ഉത്തരവിനെതിരെ നൽകിയ അപ്പീലുകൾ ഡിവിഷൻ ബഞ്ച് തള്ളുക കൂടി ചെയ്‌തതോടെയാണ് ഹൈക്കോടതി കോടതിയലക്ഷ്യ നടപടികളിലേക്ക് കടന്നത്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
പള്ളികൾ ഏറ്റെടുക്കുന്ന ഘട്ടത്തിൽ ഉണ്ടാകുന്ന ക്രമസമാധാന പ്രശ്‌നമാണ് സർക്കാർ പലപ്പോഴും ഹൈക്കോടതിയിൽ ചൂണ്ടിക്കാട്ടിയത്. അതേസമയം, സുപ്രീം കോടതി ഉത്തരവ് നടപ്പാക്കാൻ സർക്കാർ ആത്മാർത്ഥമായി പരിശ്രമിക്കുന്നില്ലെന്ന് ഹൈക്കോടതി വിവിധ ഘട്ടങ്ങളിൽ വിമർശിച്ചിരുന്നു. മലങ്കര സഭയ്ക്കു കീഴിലെ പള്ളികൾ 1934 ലെ ഭരണഘടന അനുസരിച്ച് പ്രവർത്തിക്കണമെന്നും തർക്കത്തിലുള്ള പള്ളി ഓർത്തഡോക്‌സ് വിഭാഗത്തിനു വിട്ടു നൽകണമെന്നുമായിരുന്നു 2017 ലെ സുപ്രീം കോടതി വിധി.
