കോട്ടയം: കെ.ആർ. നാരായണൻ നാഷണൽ ഇൻസ്റ്റിറ്റ്യൂട്ട് ഓഫ് വിഷ്വൽ സയൻസ് ആൻഡ് ആർട്‌സ് ഇൻസ്റ്റിറ്റ്യൂട്ടില്‍ 'രാം കെ നാം' ഡോക്യുമെന്ററി പ്രദർശിപ്പിക്കുമെന്ന് ഡിവൈഎഫ്ഐ. ഡോക്യുമെന്ററി പ്രദർശിപ്പിക്കാൻ ആഗ്രഹിക്കുന്നവർക്ക് ഡിവൈഎഫ്ഐ പശ്ചാത്തല സൗകര്യമൊരുക്കുമെന്ന് ഡിവൈഎഫ്ഐ നേതാവ് ജയ്‌ക് സി തോമസ് പറഞ്ഞു. 'ഡോക്യുമെന്ററി തടയാമെന്ന സംഘപരിവാർ മോഹം നടക്കില്ല. ഇവിടെ നടന്ന സംഘർഷം അബദ്ധം സംഭവിച്ചതല്ല.
കെആർ നാരായണൻ ഇൻസ്റ്റിറ്റ്യൂട്ടിൽ പ്രദർശനം തടസപ്പെടുത്തിയതും ഇന്ത്യയുടെ മറ്റ് പല ഭാഗങ്ങളിലും 'രാം കെ നാം' ഡോക്യുമെന്ററി തടയാൻ ശ്രമിക്കുന്നതും ബോധപൂർവമുള്ള രാഷ്ട്രീയ ബോധ്യങ്ങളുടെ ഭാഗമാണെന്നും അദ്ദേഹം പറഞ്ഞു. സംഘപരിവാർ പ്രചരിപ്പിക്കുന്ന യുക്തികൾക്കപ്പുറം സത്യസന്ധമായ ചരിത്രത്തിലെ വസ്‌തുതകളിലേക്ക് വെളിച്ചം വീശുന്ന ഡോക്യുമെന്ററിയാണ് 'രാം കെ നാം'. അതുകൊണ്ടാണ് പ്രദർശനം തടസപ്പെടുത്താൻ സംഘപരിവാറും ശ്രമിക്കുന്നതെന്നും ജയ്‌ക് സി തോമസ് പറഞ്ഞു.
കഴിഞ്ഞ ദിവസം കെ.ആർ. നാരായണൻ നാഷണൽ ഇൻസ്റ്റിറ്റ്യൂട്ട് ഓഫ് വിഷ്വൽ സയൻസ് ആൻഡ് ആർട്‌സിന് സമീപം ബിജെപി പ്രവർത്തകർ പ്രതിഷേധിച്ചിരുന്നു (Conflict at K.R Narayanan Institute). രാം കെ നാം' എന്ന ഡോക്യുമെന്ററി പ്രദർശിപ്പിക്കാൻ ശ്രമിച്ചതിനെ തുടർന്നാണ് സംഘർഷം. ഡോക്യുമെന്ററി പ്രദർശിപ്പിക്കാൻ ശ്രമിച്ച വിദ്യാർത്ഥികളെ ബിജെപി പ്രവർത്തകർ തടഞ്ഞതായാണ് പരാതി. ഗേറ്റിനു മുന്നിൽ സ്ക്രീൻ വച്ച് 'രാം കേ നാം' എന്ന ഡോക്യുമെന്ററി പ്രദർശിപ്പിക്കാനായിരുന്നു വിദ്യാർത്ഥികളുടെ തീരുമാനം.
എന്നാൽ, സംഘർഷത്തെ തുടർന്ന് ഗേയ്റ്റിനകത്തേക്ക് പ്രദർശനം മാറ്റുകയായിരുന്നു. ഡോക്യുമെന്ററി പ്രദർശനവുമായി ബന്ധപ്പെട്ട് പ്രതിഷേധിച്ച് എത്തിയ ബിജെപി പ്രവർത്തകർ ഇൻസ്റ്റിറ്റ്യൂട്ടിന് പുറത്ത് വച്ച ഫ്ലക്‌സ് നീക്കം ചെയ്യുകയും ചെയ്‌തു. സംഘർഷത്തെ തുടർന്ന് പൊലീസ് എത്തിയാണ് പ്രശ്‍നം നിയന്ത്രണ വിധേയമാക്കിയത്.
