കാസർകോട്: നീലേശ്വരത്ത് പാറയില്‍ കോറിയിട്ട മനുഷ്യരൂപവും കാല്‍പാദങ്ങളും കണ്ടെത്തി. കാഞ്ഞിരപ്പൊയിലിലെ സ്വകാര്യ വ്യക്തിയുടെ പറമ്പിലെ പാറയിലാണ് 24 ജോഡി കാല്‍പാദങ്ങളും ഒരു മനുഷ്യ രൂപവും കണ്ടെത്തിയത്. ഇരുമ്പ് ആയുധങ്ങള്‍ കൊണ്ട് കോറിയിട്ട ഈ രൂപങ്ങള്‍ മഹാശിലാ കാലഘട്ടത്തിലേതാണെന്നാണ് ഗവേഷകര്‍ പറയുന്നത്.
സംഭവം ശ്രദ്ധയില്‍പ്പെട്ടതോടെ പ്രാദേശിക പുരാവസ്‌തു നിരീക്ഷകനായ സതീശൻ കാളിയാനം സ്ഥലത്തെത്തി പരിശോധന നടത്തി. തുടര്‍ന്ന് പുരാവസ്‌തു ഗവേഷകനായ പ്രൊഫ.അജിത്ത് കുമാർ, ചരിത്ര ഗവേഷകനായ ഡോ. നന്ദകുമാർ കോറോത്ത് എന്നിവരെ വിവരം അറിയിച്ചു. ഇവരെത്തി പാറയിലെ പുല്ലുകള്‍ വകഞ്ഞ് മാറ്റി പരിശോധന നടത്തി. ഇതോടെയാണ് ഇവ മഹാശില കാലഘട്ടത്തിലേതാണെന്ന് തിരിച്ചറിഞ്ഞത്.
കുട്ടികളുടെയും മുതിര്‍ന്നവരുടെ കാല്‍പാദങ്ങളാണ് പാറയില്‍ കണ്ടെത്തിയത്. ഇവ തിരിച്ചറിഞ്ഞത് ഇവയുടെ നീളം കണക്കിലെടുത്താണ്. ആറ്, ഏഴ്, എട്ട്, ഒമ്പത്, പത്ത് ഇഞ്ച് നീളത്തിലുള്ളതാണ് കാല്‍പാദങ്ങള്‍. കാൽപാദങ്ങൾ അവസാനിക്കുന്നിടത്ത് ഒരു മനുഷ്യ രൂപവും കൊത്തി വച്ചിട്ടുണ്ട്. മനുഷ്യരൂപത്തിൻ്റെ ചുറ്റിലുമായി വൃത്താകൃതിയിലുള്ള നാല് കുഴികളും കാണപ്പെടുന്നുണ്ട്. സമാനമായ ശിലാ ചിത്രങ്ങൾ ഉഡുപ്പിയിലെ അവലക്കിപ്പാറയിൽ വർഷങ്ങൾക്ക് മുമ്പ് കണ്ടെത്തിയിട്ടുണ്ട്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
രണ്ടായിരത്തോളം വർഷം പഴക്കമുള്ള ശിലാ ചിത്രങ്ങൾ മടിക്കൈ ഗ്രാമ പഞ്ചായത്തിൻ്റെയും കേരളത്തിൻ്റെയും മുൻകാല സംസ്‌കാരത്തിൻ്റെ നേർക്കാഴ്‌ചകളാണ്. തുടർന്ന് നടത്തിയ നിരീക്ഷണങ്ങളിൽ സമീപത്തുള്ള കോതോട്ടുപാറയിൽ തോരണത്തിൻ്റെ ആകൃതിയിലുള്ള ശിലാ ചിത്രവും കണ്ടെത്തി.
കാസർകോട് ജില്ലയിലെ എരിക്കുളം വലിയ പാറയിലെ തോരണങ്ങളും ബങ്കളം ഗവൺമെൻ്റ് ഹയർ സെക്കഡറി സ്‌കൂളിന് സമീപത്ത് കാണപ്പെടുന്ന പായുന്ന പുലിയുടെ രൂപവും ചീമേനി അരിയിട്ട പാറയിലെ രണ്ട് മനുഷ്യ രൂപങ്ങളും കാളകളുടേയും മറ്റു മൃഗങ്ങളുടേയും രൂപങ്ങളും കണ്ണൂരിലെ ഏറ്റുകുടുക്കയിലുള്ള കാളകളുടെ രൂപവും വയനാട്ടിലെ എടക്കൽ ഗുഹയിൽ കാണപ്പെടുന്ന രൂപങ്ങളുമാണ് ഉത്തര കേരളത്തിൽ നിന്ന് മുൻ കാലങ്ങളിൽ കണ്ടെത്തിയിട്ടുള്ള മഹാശിലാ കാലഘട്ടത്തിലേതെന്ന് കരുതുന്ന ശിലാ ചിത്രങ്ങൾ.
Also Read: പുറത്ത് ചെറിയൊരു ദ്വാരം; അകത്ത് കൂരാകൂരിരുട്ട്, ഗുണാകേവിനെ വെല്ലും കുണ്ടറയിലെ ഗുഹ
