തിരുവനന്തപുരം : ആർഎസ്എസ് നേതാവ് ദത്താത്രേയ ഹൊസബലെയുമായി എഡിജിപി എംആർ അജിത് കുമാർ കൂടിക്കാഴ്‌ച നടത്തിയെന്ന് തൃശൂർ സ്പെഷ്യൽ ബ്രാഞ്ചിന്‍റെ റിപ്പോർട്ട്. ആർഎസ്എസ് നേതാവിന്‍റെ കാറിലാണ് 2023 മേയ് 22-ന് തൃശൂരിൽ ക്യാമ്പ് നടന്ന പാറമേക്കാവ് വിദ്യാ മന്ദിറിൽ പോയതെന്ന് തൃശൂർ സ്പെഷ്യൽ ബ്രാഞ്ച് റിപ്പോര്‍ട്ട് നല്‍കിയിരുന്നു. തൊട്ടടുത്ത ദിവസം തന്നെ ഇന്‍റലിജൻസ് മേധാവിക്കും സംസ്ഥാന പൊലീസ് മേധാവിക്കും ഇതു വഴി സർക്കാരിനും വിവരം ലഭിച്ചു.
വിവരാവകാശ പരിധിയിൽ വരാത്തതിനാൽ ഇക്കാര്യത്തിൽ ഔദ്യോഗികമായി റിപ്പോർട്ട് നടത്താനാകില്ലെന്ന് പൊലീസ് വൃത്തങ്ങൾ അറിയിക്കുന്നു. എന്നാൽ ഹോട്ടലിന് മുന്നിലെ സിസിടിവി ദൃശ്യങ്ങൾ പരിശോധിച്ചാൽ ഇക്കാര്യങ്ങൾ വ്യക്തമാകുമെന്ന് സ്പെഷ്യൽ ബ്രാഞ്ച്, മേലുദ്യോഗസ്ഥരെ അറിയിച്ചതായാണ് വിവരം.
എഡിജിപി എംആർ അജിത് കുമാർ തന്നെ ഇക്കാര്യം മുഖ്യമന്ത്രിയുടെ ഓഫിസിനെ അറിയിച്ചതായും സൂചനയുണ്ട്. അതേസമയം ഒരു കൂടിക്കാഴ്‌ചയും മുഖ്യമന്ത്രിക്ക് വേണ്ടി നടന്നിട്ടില്ലെന്നും വാർത്ത ശുദ്ധ അസംബന്ധമാണെന്നുംമാണ് സിപിഎം സംസ്ഥാന സെക്രട്ടറി എംവി ഗോവിന്ദൻ വാർത്ത സമ്മേളനത്തിൽ പ്രതികരിച്ചത്.
