കോഴിക്കോട് : വടകരയുടെ അങ്കത്തട്ടിൽ 'ടീച്ചറമ്മ' ഇറങ്ങിയതോടെ കെ.മുരളീധരൻ ആകെ അങ്കലാപ്പിലായിരുന്നു. ഇതോടെ സിറ്റിംഗ് എംപിയും കൂട്ടരും പിന്നെ പലവിധ കണക്ക് കൂട്ടലിലായി. ശൈലജയുടെ തട്ടകമായ കൂത്തുപറമ്പും തൊട്ടടുത്ത തലശേരിയും മൃഗീയ ഭൂരിപക്ഷം നല്‍കിയാല്‍ അത് അവർക്ക് വലിയ മുന്നേറ്റമാകും.
കോഴിക്കോട് ജില്ലയിലുള്ള ബാക്കി നിയമസഭാമണ്ഡലങ്ങളിൽ നിന്ന് കിട്ടാന്‍ സാധ്യതയുള്ള വോട്ടുകൊണ്ട് അത് മറികടക്കാൻ കഴിയുമോയെന്ന സംശയത്തിലുമായിരുന്നു. വനിത എന്ന മുൻതൂക്കവും ആരോഗ്യ മന്ത്രിയായ സമയത്തെ പ്രകടനവും ശൈലജക്ക് അനുകൂലമാണെന്ന് മുരളി മനസിലാക്കിയിട്ടുണ്ട്. അതിനപ്പുറം മുരളീധരൻ ഭയന്നത് ബിജെപി ക്രോസ് വോട്ടിനെയാണ്.
വടകര എംപി ആയിരിക്കെ, നിയമസഭയിലേക്ക് നേമത്ത് പോയി കുമ്മനം രാജശേഖരനെതിരെ മത്സരിച്ചതിന്‍റെ 'ചൊരുക്ക്' ബിജെപി വടകരയിൽ തീർക്കുമെന്ന് ഒരു പ്രചാരണമുണ്ടായിരുന്നു. എല്ലാം കൂടി ചേരുമ്പോൾ തിരിച്ചടിക്ക് സാധ്യതയുണ്ടെന്ന് മുരളി തന്നെ അടുത്ത വൃത്തങ്ങളോട് സൂചിപ്പിച്ചിരുന്നു. എങ്കിലും രണ്ടാം പോരാട്ടത്തിനൊരുങ്ങുമ്പോഴാണ് കോണ്‍ഗ്രസ് അപ്രതീക്ഷിത നീക്കത്തിലൂടെ കെ മുരളീധരനെ തൃശൂരിലേക്കയച്ചത്.
ഇവിടെ മത്സരിക്കാന്‍ എത്തുമ്പോൾ ക്രോസ് വോട്ടിന്‍റെ പേടിയില്ല. ജനിച്ചുവളർന്ന നാട്ടിൽ പക്ഷേ, മുരളീ മന്ദിരത്തിൽ ആകെ പന്തികേടാണ്. സഹോദരി പത്മജ, സുരേഷ് ഗോപിക്കായി വോട്ട് ചോദിക്കുന്ന രംഗവും ഇത്തവണ പുതുമയുളളതാവും. അവിടെയാണ് പത്മജാവിരോധികൾ ടി എൻ പ്രതാപനടക്കം ആഞ്ഞുപിടിക്കുക. അവർക്കിത് പകരം വീട്ടാനുള്ള അവസരം കൂടിയാണ്.
അതേസമയം പാലക്കാടുനിന്ന് വടകരയിൽ എത്തുന്ന ഷാഫി പറമ്പിലിന് മുസ്ലിം വോട്ട് രക്ഷയാകുമെന്നാണ് പ്രതീക്ഷ. ഭാര്യ വീട് മാഹിയിലായതും ബന്ധമായി ഉയർത്തിക്കാട്ടും. അങ്കത്തട്ടിൽ പോരാളികളുടെ ചിത്രം തെളിഞ്ഞിരിക്കുന്നു. ഇനിയാണ് പോരാട്ടം.
