ഹൈദരാബാദ് : ഐപിഎല്‍ പതിനേഴാം പതിപ്പില്‍ വിജയവഴിയില്‍ തിരിച്ചെത്താൻ ചെന്നൈ സൂപ്പര്‍ കിങ്‌സും സണ്‍ റൈസേഴ്‌സ് ഹൈദരാബാദും ഇന്നിറങ്ങും. ഹൈദരാബാദിന്‍റെ തട്ടകമായ രാജീവ് ഗാന്ധി അന്താരാഷ്ട്ര സ്റ്റേഡിയത്തില്‍ രാത്രി ഏഴരയ്‌ക്കാണ് മത്സരം. ഹോം ഗ്രൗണ്ടിലെ ജയം ആവര്‍ത്തിക്കാൻ സണ്‍റൈസേഴ്‌സ് ഹൈദരാബാദ് ഇറങ്ങുമ്പോള്‍ സീസണിലെ മൂന്നാം ജയം തേടിയാണ് സൂപ്പര്‍ കിങ്‌സിന്‍റെ വരവ്.
പോയിന്‍റ് പട്ടികയിലെ മൂന്നാം സ്ഥാനക്കാരാണ് ചെന്നൈ സൂപ്പര്‍ കിങ്സ്. സീസണിലെ ആദ്യ രണ്ട് മത്സരവും ജയിച്ച അവര്‍ക്ക് കഴിഞ്ഞ കളിയില്‍ ഡല്‍ഹിയോട് അടി തെറ്റുകയായിരുന്നു. ടോപ് ഓര്‍ഡര്‍ നിറം മങ്ങിയതായിരുന്നു അവസാന മത്സരത്തില്‍ ചെന്നൈയ്‌ക്ക് തിരിച്ചടിയായത്.
എന്നാല്‍, മുൻ നായകൻ എംഎസ് ധോണിയുടെ ബാറ്റിങ് ചെന്നൈ ആരാധകര്‍ക്ക് നല്‍കുന്ന ആവേശം ചെറുതൊന്നുമായിരിക്കില്ല. ഹൈദരാബാദിലും ധോണിയുടെ ബാറ്റിങ് വെടിക്കെട്ടാകും ആരാധകര്‍ പ്രതീക്ഷിക്കുന്നതും. ശിവം ദുബെ, സമീര്‍ റിസ്‌വി എന്നിവരും താളം വീണ്ടെടുത്താല്‍ ബാറ്റിങ്ങില്‍ ചെന്നൈയ്‌ക്ക് പേടിക്കേണ്ടി വരില്ല.
ഐപിഎല്‍ ചരിത്രത്തിലെ ഏറ്റവും ഉയര്‍ന്ന സ്കോര് അടിച്ചുകൂട്ടിയ സണ്‍റൈസേഴ്‌സ് ബാറ്റിങ് നിരയ്‌ക്കെതിരെ ചെന്നൈയുടെ ബൗളര്‍മാര്‍ എങ്ങനെ പന്ത് എറിയുമെന്ന് കണ്ടറിയണം. ബംഗ്ലാദേശ് പേസര്‍ മുസ്‌തഫിസുര്‍ റഹ്മാന്‍റെ അഭാവം ചെന്നൈയ്‌ക്ക് ഇന്ന് വലിയ തിരിച്ചടിയായേക്കും. ടി20 ലോകകപ്പിനുള്ള വിസ ആവശ്യങ്ങള്‍ക്കായി നാട്ടിലേക്ക് മടങ്ങിയതുകൊണ്ടാണ് താരത്തിന് ഇന്നത്തെ മത്സരം നഷ്‌ടമാകുന്നത്.
സീസണില്‍ ഏറ്റവും അപകടകാരികളായ ബാറ്റിങ് യൂണിറ്റാണ് സണ്‍ റൈസേഴ്‌സ് ഹൈദരാബാദിന്‍റേത്. കളിച്ച മൂന്ന് മത്സരങ്ങളില്‍ രണ്ടിലും 200ന് മുകളില്‍ സ്കോര് കണ്ടെത്താൻ അവര്‍ക്കായി. അതില്‍ ഒന്ന് മുംബൈ ഇന്ത്യൻസിനെതിരെ അടിച്ചുകൂട്ടിയ 277 എന്ന റെക്കോഡ് സ്കോറും ഉള്‍പ്പെടും.
തങ്ങളുടെ ഹോം ഗ്രൗണ്ടില്‍ ചെന്നൈ സൂപ്പര്‍ കിങ്‌സിനെ നേരിടാൻ ഇറങ്ങുമ്പോഴും ബാറ്റര്‍മാരിലാണ് എസ്ആര്‍എച്ചിന്‍റെ പ്രതീക്ഷ. ട്രാവിസ് ഹെഡ്, അഭിഷേക് ശര്‍മ, ഹെൻറിച്ച് ക്ലാസൻ, എയ്‌ഡൻ മാര്‍ക്രം എന്നിവരെല്ലാം ഫോമിലാണ് എന്നത് ഹൈദരാബാദിന് ആശ്വാസമാണ്. ബൗളിങ്ങില്‍ നായകൻ പാറ്റ് കമ്മിൻസ്, ഭുവനേശ്വര്‍ കുമാര്‍, ജയദേവ് ഉനദ്ഘട്ട് എന്നിവരുടെ പ്രകടനങ്ങള്‍ സണ്‍റൈസേഴ്‌സിന് നിര്‍ണായകമായേക്കും.
സണ്‍റൈസേഴ്‌സ് ഹൈദരാബാദ് സാധ്യത ടീം: മായങ്ക് അഗര്‍വാള്‍, ട്രാവിസ് ഹെഡ്, അഭിഷേക് ശര്‍മ, എയ്‌ഡൻ മാര്‍ക്രം, ഹെൻറിച്ച് ക്ലാസൻ (വിക്കറ്റ് കീപ്പര്‍), ഷഹ്ബാസ് അഹമ്മദ്, അബ്‌ദുല്‍ സമദ്, പാറ്റ് കമ്മിൻസ് (ക്യാപ്‌റ്റൻ), ഭുവനേശ്വര്‍ കുമാര്‍, മായങ്ക് മാര്‍കണ്ഡെ, ജയദേവ് ഉനദ്ഘട്ട്, ഉമ്രാൻ മാലിക്ക്.
ചെന്നൈ സൂപ്പര്‍ കിങ്സ് സാധ്യത ടീം: രചിൻ രവീന്ദ്ര, റിതുരാജ് ഗെയ്‌ക്‌വാദ് (ക്യാപ്‌റ്റൻ), അജിങ്ക്യ രഹാനെ, ഡാരില്‍ മിച്ചല്‍, ശിവം ദുബെ, സമീര്‍ റിസ്‌വി, രവീന്ദ്ര ജഡേജ, എംഎസ് ധോണി (വിക്കറ്റ് കീപ്പര്‍), ദീപക് ചാഹര്‍, തുഷാര്‍ ദേശ്‌പാണ്ഡെ, മഹീഷ് തീക്ഷണ, മതീഷ പതിരണ.
