മുംബൈ: ഇന്ത്യന്‍ പ്രീമിയര്‍ ലീഗിന് പിന്നാലെ നടക്കുന്ന ടി20 ലോകകപ്പിനുള്ള ഇന്ത്യന്‍ ടീമിനെ ചുറ്റിപ്പറ്റിയുള്ള ചര്‍ച്ചകള്‍ക്ക് ചൂടേറുകയാണ്. ടീം തെരഞ്ഞെടുപ്പുമായി ബന്ധപ്പെട്ട് വിദഗ്‌ധരടക്കം നിരവധി പേര്‍ ഇതിനകം തന്നെ തങ്ങളുടെ അഭിപ്രായങ്ങളുമായി രംഗത്ത് എത്തിയിട്ടുണ്ട്. ഇപ്പോഴിതാ ടൂര്‍ണമെന്‍റിനുള്ള ഇന്ത്യന്‍ ടീമിനെക്കുറിച്ചുള്ള തന്‍റെ കാഴ്‌ചപ്പാടുകള്‍ തുറന്ന് പറഞ്ഞിരിക്കുകയാണ് മുന്‍ നായകന്‍ സൗരവ് ഗാംഗുലി.
ഭയരഹിതമായാണ് ഇന്ത്യന്‍ ടീം കളിക്കേണ്ടതെന്നാണ് ബിസിസിഐ മുന്‍ അധ്യക്ഷന്‍ കൂടിയായ ഗാംഗുലി പറയുന്നത്. പ്രായം പരിഗണിക്കാതെ കഴിവുള്ള താരങ്ങളെ ടൂര്‍ണമെന്‍റിന് അയക്കണമെന്നും അദ്ദേഹം അഭിപ്രായപ്പെട്ടു.
"ഇന്ത്യയെ സംബന്ധിച്ചിടത്തോളം ഏറ്റവും പ്രധാനപ്പെട്ട കാര്യം ഭയമില്ലാതെ കളിക്കുക എന്നതാണ്. ടി20യിൽ പ്രായം സംബന്ധിച്ച യാതൊരു നിയമവുമില്ല. ജെയിംസ് ആൻഡേഴ്‌സൺ ഇപ്പോഴും ടെസ്റ്റ് കളിക്കുകയും, 30 ഓവർ പന്തെറിയുകയും ചെയ്യുന്നു. എംഎസ് ധോണി ഇപ്പോഴും സിക്‌സറുകൾ അടിക്കുന്നു.
ഇരുവരുടേയും പ്രായം 40 വയസിന് മുകളിലാണ്. സിക്‌സടിക്കുക എന്നതാണ് പ്രധാനം. 40 പന്തുകളില്‍ സെഞ്ചുറി അടിക്കാനുള്ള കഴിവ് വിരാട് കോലിയ്‌ക്കുണ്ട്. ടി20യിൽ നിർഭയമായും സ്വതന്ത്രമായും കളിക്കുക എന്നതാണ് പ്രധാനം.
ടൂര്‍ണമെന്‍റില്‍ രോഹിത്, വിരാട് , സൂര്യകുമാര്‍ യാദവ്, ശിവം ദുബെ, ഹാര്‍ദിക് പാണ്ഡ്യ തുടങ്ങിയ താരങ്ങള്‍ ഇന്ത്യന്‍ ടീമില്‍ വേണം. അവരെല്ലാം അസാമാന്യ പ്രതിഭകളാണ്. സിക്‌സ് അടിക്കാനുള്ള അവരുടെ കഴിവ് അപാരമാണ്" സൗരവ് ഗാംഗുലി പറഞ്ഞു.
ടി20 ലോകകപ്പില്‍ ടീമിന്‍റെ താല്‍പര്യത്തിന് അനുസരിച്ചാണ് സെലക്ഷൻ കമ്മിറ്റിയും കോച്ച് രാഹുൽ ദ്രാവിഡും ക്യാപ്റ്റന്‍ രോഹിത് ശര്‍മയും തീരുമാനങ്ങള്‍ എടുക്കേണ്ടത്. എന്നാല്‍ കോലി-രോഹിത് ഓപ്പണിങ്‌ കോമ്പോ കാണാന്‍ താന്‍ ആഗ്രഹിക്കുന്നതായും ഗാംഗുലി കൂട്ടിച്ചേര്‍ത്തു.
"രോഹിത്തും കോലിയും ഓപ്പണ്‍ ചെയ്യണമെന്നത് എന്‍റെ വ്യക്തിപരമായ അഭിപ്രായം മാത്രമാണ്. സെലക്‌ടർമാർ അത് ചെയ്യണമെന്ന് ഞാൻ പറയുന്നില്ല. കാരണം അത്യന്തികമായി തീരുമാനം അവരുടേതാണ്" - സൗരവ് ഗാംഗുലി പറഞ്ഞു.
അതേസമയം ജൂണില്‍ അമേരിക്കയിലും വെസ്റ്റ് ഇന്‍ഡീസിലുമായാണ് ടി20 ലോകകപ്പ് നടക്കുന്നത്. പ്രാഥമിക സ്‌ക്വാഡ് പ്രഖ്യാപിക്കാനുള്ള മെയ്‌ ഒന്നിന് ഇന്ത്യന്‍ ടീമിന്‍റെയും പ്രഖ്യാപനമുണ്ടാവുമെന്നാണ് വിവരം. ഏറെ നീളുന്ന ഐസിസി കിരീട വരള്‍ച്ച അവസാനിപ്പിക്കാന്‍ ഇന്ത്യയ്‌ക്ക് മുന്നിലുള്ള മറ്റൊരു അവസരമാണ് ടി20 ലോകകപ്പ്.
2013-ല്‍ എംഎസ് ധോണിയുടെ നേതൃത്വത്തില്‍ നേടിയ ചാമ്പ്യന്‍സ് ട്രോഫിയ്‌ക്ക് ശേഷം മറ്റൊരു ഐസിസി കിരീടം ഇന്ത്യയ്‌ക്ക് കിട്ടാക്കനിയായി തുടരുകയാണ്.
