ഈ മാസം 26നാണ് പാരിസില്‍ ഒളിമ്പിക്‌സ് ദീപം മിഴി തുറക്കുന്നത്. എന്നാല്‍ പാരിസില്‍ നിന്ന് 8000 കിലോമീറ്റര്‍ അകലെയുള്ള തമിഴ്‌നാട്ടിലെ തിരുപ്പൂരില്‍ ഇതിനകം തന്നെ ആഘോഷങ്ങള്‍ തുടങ്ങിക്കഴിഞ്ഞു. രാജ്യാന്തര ഒളിമ്പിക് കമ്മിറ്റിയില്‍ എവിടെയങ്കിലും നിങ്ങള്‍ ഒരു മെയ്‌ഡ് ഇന്‍ ഇന്ത്യ സ്റ്റിക്കര്‍ കാണുകയാണെങ്കില്‍ മനസിലാക്കിക്കൊള്ളൂ അത് ഈ വസ്‌ത്ര നിര്‍മ്മാണ കേന്ദ്രത്തിലെ ബാക്ക് ബേ ഇന്ത്യ നിര്‍മ്മിച്ചതാകും. ഒരു അമ്മയും മകളുമാണ് ഈ വ്യവസായ ശാലയ്ക്ക് പിന്നില്‍ പ്രവര്‍ത്തിക്കുന്നത്.
ബാക്ക് ബേ ഇന്ത്യ: ഇന്ത്യയിലെ തിരുപ്പൂരിലുള്ള പ്രമുഖ വസ്‌ത്ര ഉത്പാദകരാണിത്. ഇവര്‍ വിവിധ തരത്തിലുള്ള വസ്‌ത്രങ്ങള്‍ ഇവിടെ നിന്ന് കയറ്റുമതി ചെയ്യുന്നുണ്ട്. യൂറോപ്പിലേക്കും കിഴക്കന്‍ രാജ്യങ്ങളിലേക്കും വന്‍ തോതില്‍ കയറ്റുമതി ചെയ്യുന്നുണ്ട്. രാജ്യത്തെ പരുത്തി വസ്‌ത്രങ്ങളുടെ 90 ശതമാനവും കയറ്റുമതി ചെയ്യുന്നത് തിരുപ്പൂരില്‍ നിന്നാണ്. കട്ടിങ് എഡ്‌ജ് സാങ്കേതികതയും അതീവ വൈദഗ്ധ്യമുള്ള തൊഴിലാളികളും പ്രവര്‍ത്തനങ്ങളുടെ പ്രത്യേകതകളുമാണ് തങ്ങളുടെ മുഖമുദ്രയെന്ന് ഇവര്‍ പറയുന്നു.
പാരീസ് ഒളിമ്പിക്‌സിന്‍റെ ചരിത്രത്തിലേക്ക് തിരുപ്പൂര്‍ ഇപ്പോള്‍ നുഴഞ്ഞ് കയറിയിരിക്കുകയാണ്. പാരിസ് ഒളിമ്പിക്‌സില്‍ ബാക്ക് ബേ ഇന്ത്യയുടെ ഒരു സ്റ്റോറുണ്ടാകും. പാരലിമ്പിക്‌സിലേക്കും ഇവര്‍ വസ്‌ത്രങ്ങള്‍ നല്‍കുന്നുണ്ട്. അടുത്തമാസം 28നാണ് പാരാലിമ്പിക്‌സ് തുടങ്ങുക.
വെള്ളിയാഴ്‌ച ദീപ ജയനും മകള്‍ ഐശ്വര്യയും പാരിസിലേക്കുള്ള അവരുടെ വസ്‌ത്രത്തിന്‍റെ അവസാന കെട്ടുകള്‍ അയക്കും. ഇതുവരെ പത്ത് ലക്ഷത്തോളം വസ്‌ത്രങ്ങള്‍ അയച്ച് കഴിഞ്ഞു.
പാരിസ് ഒളിമ്പിക്‌സിന്‍റെ സുരക്ഷയിലും ഇന്ത്യന്‍ കയ്യൊപ്പ്
സ്‌ക്വാഡ് കെ9: പത്ത് വ്യത്യസ്‌ത ഇനങ്ങളിലുള്ള ഇന്ത്യന്‍ നായകള്‍ ഇന്ത്യന്‍ കെ9 സംഘത്തിലുണ്ട്. ആറ് ബെല്‍ജിയന്‍ ഷെപ്പേഡുകളും മൂന്ന് ജര്‍മ്മന്‍ ഷെപ്പേഡുകളും ഒരു ലാബ്രഡോര്‍ റിട്രൈവറുമാണ് ഉള്ളത്. ഒളിമ്പിക്‌സ് വേളയില്‍ വിവിധ പരിപാടികള്‍ നടക്കുന്ന വേദികള്‍ പരിശോധിക്കുകയും പട്രോളിങ് നടത്തുകയുമാണ് ഇവയുടെ ദൗത്യം. ഇന്ത്യന്‍ സൈന്യത്തിലെ പത്ത് നായകളെയാണ് അയക്കുന്നത്. ബെംഗളുരുവില്‍ ജനിച്ച് വളര്‍ന്ന രണ്ടെണ്ണം അടക്കമുള്ളവയാണിത്. രാജ്യാന്തരതലത്തിലെ ഡ്യൂട്ടിക്കായി നിയോഗിക്കപ്പെട്ട ബെംഗളുരുക്കാര്‍ അഞ്ച് വയസുള്ള വാസ്റ്റും മൂന്ന് വയസുകാരന്‍ ഡെന്‍ബിയുമാണ്.
ഇന്ത്യ ഹൗസ്: ഇന്ത്യയെ പാരിസ് 2024 ഒളിമ്പിക്‌സിന്‍റെ ഔദ്യോഗിക പങ്കാളിയായി പ്രഖ്യാപിച്ചിട്ടുണ്ട്. ഇതിനായി അവിടെ ഇന്ത്യ ഹൗസും ഒരുക്കിയിട്ടുണ്ട്. ഇന്ത്യന്‍ ഒളിമ്പിക്‌സ് അസോസിയേഷനുമായി സഹകരിച്ച് റിലയന്‍സ് ഫൗണ്ടേഷനാണ് ഒളിമ്പിക്‌സ് ഗ്രാമത്തില്‍ ഇന്ത്യ ഹൗസ് ഒരുക്കിയിരിക്കുന്നത്.
നമ്മുടെ രാജ്യത്തിന്‍റെ സമ്പന്നമായ കായിക-സാസ്‌കാരിക പാരമ്പര്യം പ്രതിഫലിപ്പിക്കുന്നതാകും ഇന്ത്യ ഹൗസ്. നമ്മുടെ സമ്പന്നമായ ഭൂതകാലവും മാറിക്കൊണ്ടിരിക്കുന്ന വര്‍ത്തമാനകാലവും അതിശയിപ്പിക്കുന്ന ഭാവികാലവും സാങ്കേതികതയുടെ മുന്നേറ്റത്തിന്‍റെയും ഡിജിറ്റലൈസേഷന്‍റെയും സഹായത്തോടെയാകും ഇവ ഒരുക്കുക.
ലോകമെമ്പാടും നിന്നുള്ള കായികതാരങ്ങള്‍ക്കും വിശിഷ്‌ട വ്യക്തികള്‍ക്കും കായികപ്രേമികള്‍ക്കും ഇന്ത്യ ഹൗസിന്‍റെ വാതിലുകള്‍ തുറന്ന് നല്‍കും. ഐക്യം, നാനാത്വം, ഇന്ത്യന്‍ മികവ് തുടങ്ങി ഇന്ത്യയുടെ എല്ലാ സവിശേഷതകളും വിളിച്ചോതുന്ന ഒന്നാകും ബ്യൂട്ടിഫുള്‍ ഇന്ത്യ എന്ന ബ്രാന്‍ഡ്. ഇത് ആഘോഷങ്ങള്‍ക്ക് മാറ്റുകൂട്ടും. ഇന്ത്യ ഹൗസും ബ്യൂട്ടിഫുള്‍ ഇന്ത്യയും തമ്മിലുള്ള പങ്കാളിത്തം സൗന്ദര്യം, നാനാത്വം നൂതന എന്നിവയ്ക്കാകും ഊന്നല്‍ നല്‍കുക.
ഇന്ത്യന്‍ ഒളിമ്പിക് ഹൗസിലെ കലാവിരുന്നുകള്‍
രഘു ദീക്ഷിത്: രഘു ദീക്ഷിതിന്‍റെ വിവിധ ഭാഷ നാടന്‍പാട്ട് സംഘമായ രഘു ദീക്ഷിത് പ്രോജക്‌ട് പാരിസില്‍ ഒളിമ്പിക്‌സില്‍ പരിപാടി അവതരിപ്പിക്കും. ഈ മാസം 29നും മുപ്പതിനുമാണ് ഒളിമ്പിക് ഹൗസ് ഓഫ് ഇന്ത്യയിലെ പാര്‍ക് ഡി ലാ വില്ലേറ്റില്‍ പരിപാടി അവതരിപ്പിക്കുക. ഓരോ ദിവസവും ഓരോ മണിക്കൂറിലാണ് പരിപാടി. ഈ മാസം 26 മുതല്‍ അടുത്ത മാസം 11 വരെയാണ് പാരിസ് ഒളിമ്പിക്‌സ്.
ഷാന്‍ : പാരിസിലെ ആദ്യ ഇന്ത്യ ഹൗസിലെ പരിപാടിക്ക് ബോളിവുഡ് ഗായകന്‍ ഷാനും ഉണ്ടാകും. പാരിസ് ഒളിമ്പിക്‌സ് 2024ലെ ഇന്ത്യ ഹൗസിലെ ഉദ്ഘാടന ചടങ്ങില്‍ ഷാന്‍റെ പരിപാടിയുണ്ടാകും. ജൂലൈ 27നാണ് ഉദ്ഘാടന പരിപാടി. ബോളിവുഡ്, ഫ്യൂഷന്‍, സമകാലിക സംഗീതവും കാണികള്‍ക്കായി അവതരിപ്പിക്കും.
