ന്യൂഡൽഹി: ഇന്ത്യയിലും ലോകത്തും ഒരുപാട് ആരാധകരുള്ളവരാണ് ഇന്ത്യന്‍ ക്രിക്കറ്റ് താരങ്ങള്‍. ക്രിക്കറ്റുമായി ബന്ധപ്പെട്ട സിനിമകളും താരങ്ങളുടെ ബയോപിക്കുകളും ധാരാളം പുറത്തിറങ്ങിയിട്ടുണ്ടെങ്കിലും വെള്ളിത്തിരയിലേക്ക് ഇറങ്ങിയ കളിക്കാര്‍ വളരെ വിരളമാണ്. കളിക്കളത്തിലും വെളളിത്തിരയിലും തിളങ്ങിയ താരങ്ങള്‍ ആരെല്ലാമാണെന്ന് നോക്കാം..
കപിൽ ദേവ്: 1983 ലോകകപ്പിൽ ഇന്ത്യൻ ടീമിനെ വിജയത്തിലേക്ക് നയിച്ച ക്രിക്കറ്റ് ചരിത്രത്തിലെ ഏറ്റവും മികച്ച ഓൾറൗണ്ടർമാരിൽ ഒരാളായ കപിൽ ദേവ് ദില്ലഗി യേ ദില്ലഗി, ചെയിൻ കുലി കി മെയ്ൻ കുലി, ഇക്ബാൽ തുടങ്ങിയ സിനിമകളിൽ അഭിനയിച്ചിട്ടുണ്ട്.
സുനിൽ ഗവാസ്‌കർ: 1983 ലോകകപ്പിൽ കപിൽ ദേവിന്‍റെ സഹതാരമായ ഗവാസ്‌കർ രണ്ട് സിനിമകളിലാണ് പ്രത്യക്ഷപ്പെട്ടത്. 1980-ൽ "സവിൽ പ്രേമച്ചി" എന്ന മറാത്തി ചിത്രത്തിലൂടെ അഭിനയരംഗത്ത് അരങ്ങേറ്റം കുറിച്ച താരം 1988ൽ മാലമാൽ എന്ന സിനിമയിൽ അതിഥി വേഷം ചെയ്‌തു.
വിനോദ് കാംബ്ലി: ക്രിക്കറ്റിലെ അത്ഭുത ബാലൻ എന്ന് വിളിക്കപ്പെടുന്ന വിനോദ് കാംബ്ലി, ആക്രമണാത്മക ബാറ്റിങ് ശൈലിക്ക് പേരുകേട്ടയാളാണ്. ചലച്ചിത്രരംഗത്തേക്ക് കടന്നുവന്ന കാംബ്ലി രണ്ട് ബോളിവുഡ് സിനിമകളിൽ അഭിനയിച്ചു. 2002ൽ സുനിൽ ഷെട്ടിയ്‌ക്കൊപ്പം "അനർത്" എന്ന സിനിമയിൽ പ്രത്യക്ഷപ്പെട്ടു. 2009 ൽ ക്രിക്കറ്റ് താരം അജയ് ജഡേജയ്‌ക്കൊപ്പം "പാൽ പാൽ ദിൽ കേ സാത്ത്" എന്ന ചിത്രത്തിലും അദ്ദേഹം അഭിനയിച്ചു.
യുവരാജ് സിങ്: ക്രിക്കറ്റിലും അഭിനയത്തിലും ഒരുപോലെ പശ്ചാത്തലമുള്ള കുടുംബത്തിൽ നിന്നാണ് യുവരാജ് സിങ് വരുന്നത്. ബാലതാരമായി മുൻ ക്രിക്കറ്റ് താരവും പ്രശസ്‌ത നടനുമായ പിതാവിനൊപ്പം യുവരാജ് സിനിമയില്‍ പ്രത്യക്ഷപ്പെട്ടു. മെഹന്ദി ഷാഗ്‌നാ ദി' എന്ന പഞ്ചാബി ചിത്രത്തിൽ ബാല താരമായാണ് യുവിയുടെ അരങ്ങേറ്റം.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
അജയ് ജഡേജ: ഇന്ത്യൻ ക്രിക്കറ്റ് ടീമിന്‍റെ മുൻ ക്യാപ്റ്റനും മികച്ച ഫീൽഡർമാരിൽ ഒരാളായ അജയ് ജഡേജ 2003 ൽ ക്രിക്കറ്റിൽ നിന്ന് വിരമിച്ചതിന് ശേഷം ചലച്ചിത്ര രംഗത്തേക്ക് കടന്നു. ഖേൽ എന്ന സിനിമയിലൂടെ താരം സിനിമാ ജീവിതം ആരംഭിച്ചു. "പൽ പാൽ ദിൽ കേ സാത്ത്" തുടങ്ങിയ സിനിമയിലും താരം അഭിനയിച്ചു.
ഇർഫാൻ പത്താൻ: ഓൾറൗണ്ടറും അറിയപ്പെടുന്ന ഇടംകൈ സ്വിംഗ് ബൗളറുമാണ് ഇർഫാൻ പത്താൻ.2022-ൽ കോബ്ര എന്ന തമിഴ് ചിത്രത്തിലൂടെ വില്ലൻ വേഷം അവതരിപ്പിച്ച് സിനിമാരംഗത്തേക്ക് പ്രവേശിച്ചു.
എസ് ശ്രീശാന്ത്: മുൻ ഇന്ത്യൻ ക്രിക്കറ്റ് താരം എസ് ശ്രീശാന്ത് അഭിനയത്തിലും ഭാഗ്യം പരീക്ഷിച്ചു. അക്‌സർ 2, ടീം 5, കബറെത്ത്, കെമ്പ ഗൗഡ 2, കാട്ടുവാക്കുള രണ്ടു കാതൽ വരെ എന്നീ അഞ്ച് ചിത്രങ്ങളിലാണ് ശ്രീശാന്ത് അഭിനയിച്ചത്.
ഹർഭജൻ സിങ്: സൽമാൻ ഖാൻ-അക്ഷയ് കുമാർ നായകനായ മുജ്‌സെ ഷാദി കരോഗെ എന്ന ചിത്രത്തിലാണ് ഹർഭജൻ ആദ്യമായി ബിഗ് സ്‌ക്രീനിലെത്തിയത്, പിന്നീട് ഭാജി ഇൻ പ്രോബ്ലം, സെക്കൻഡ് ഹാൻഡ് ഹസ്ബൻഡ് തുടങ്ങിയ ചിത്രങ്ങളിൽ അതിഥി വേഷങ്ങളിൽ പ്രത്യക്ഷപ്പെട്ടു. തമിഴിൽ നടനായി ഫ്രണ്ട്ഷിപ്പ് എന്ന സിനിമയിലും താരം അഭിനയിച്ചു.
