ദുബായ്: ഐസിസി വനിത ടി20 ലോകകപ്പില്‍ ഇന്ത്യയ്‌ക്ക് ഇന്ന് നിലനില്‍പ്പിന്‍റെ പോരാട്ടം. ചിരവൈരികളായ പാകിസ്ഥാനാണ് ഗ്രൂപ്പിലെ രണ്ടാം മത്സരത്തില്‍ ഇന്ത്യയുടെ എതിരാളി. സെമി ഫൈനല്‍ സാധ്യത നിലനിര്‍ത്താൻ ഇന്നത്തെ മത്സരത്തില്‍ ഇന്ത്യയ്‌ക്ക് ജയം അനിവാര്യമാണ്. ദുബായ് അന്താരാഷ്‌ട്ര ക്രിക്കറ്റ് സ്റ്റേഡിയത്തില്‍ ഇന്ത്യൻ സമയം വൈകുന്നേരം മൂന്നരയ്‌ക്കാണ് മത്സരം.
ലോകകപ്പിലെ ആദ്യ മത്സരത്തില്‍ ന്യൂസിലൻഡിനോട് 58 റണ്‍സിന്‍റെ തോല്‍വി വഴങ്ങിയ ടീം ഇന്ത്യ നിലവില്‍ ഗ്രൂപ്പിലെ അവസാന സ്ഥാനക്കാരാണ്. നെറ്റ് റണ്‍റേറ്റും മോശമായതിനാല്‍ ഫാത്തിമ സന നയിക്കുന്ന പാകിസ്ഥാനെതിരെ വമ്പൻ ജയമായിരിക്കും ഹര്‍മൻപ്രീത് കൗറും സംഘവും ലക്ഷ്യമിടുന്നത്. ഇന്നത്തെ മത്സരം കഴിഞ്ഞാല്‍ ബുധനാഴ്‌ച ശ്രീലങ്കയേയും ഞായറാഴ്‌ച ഓസ്‌ട്രേലിയയേയുമാണ് ഇന്ത്യയ്‌ക്ക് നേരിടാനുള്ളത്. ഇതില്‍ ഒരുകളി തോറ്റാല്‍ പോലും മറ്റ് മത്സരഫലങ്ങളെ കൂടി ആശ്രയിച്ചാകും ഇന്ത്യയുടെ സാധ്യതകള്‍.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം
അതേസമയം, തുടര്‍ച്ചയായ രണ്ടാം ജയം തേടിയാണ് പാകിസ്ഥാൻ വനിതകള്‍ ഇന്ന് ഇന്ത്യയെ നേരിടാനിറങ്ങുന്നത്. ആദ്യ മത്സരത്തില്‍ ശ്രീലങ്കയെ 31 റണ്‍സിനായിരുന്നു പാക് പെണ്‍പട തകര്‍ത്തത്. നിലവില്‍ പോയിന്‍റ് പട്ടികയില്‍ ന്യൂസിലൻഡിനും ഓസ്‌ട്രേലിയക്കും പിന്നില്‍ മൂന്നാം സ്ഥാനക്കാരാണ് പാകിസ്ഥാൻ.
മത്സരം ലൈവായി കാണാൻ: ഐസിസി ടി20 വനിത ലോകകപ്പ് മത്സരങ്ങള്‍ സ്റ്റാര്‍സ്‌പോര്‍ട്‌സ് നെറ്റ്‌വര്‍ക്ക് ചാനലുകളിലൂടെയാണ് ഇന്ത്യയില്‍ തത്സമയം സംപ്രേഷണം ചെയ്യുന്നത്. ഡിസ്‌നി പ്ലസ് ഹോട്‌സ്റ്റാറിലൂടെയും മത്സരം ആരാധകര്‍ക്ക് കാണാൻ സാധിക്കും.
ഇന്ത്യൻ വനിത ടീം സാധ്യത ഇലവൻ: സ്‌മൃതി മന്ദാന, ഷഫാലി വര്‍മ, ഹര്‍മൻപ്രീത് കൗര്‍ (ക്യാപ്‌റ്റൻ), ജെമീമ റോഡ്രിഗസ്, റിച്ച ഘോഷ് (വിക്കറ്റ് കീപ്പര്‍), ദീപ്‌തി ശര്‍മ, അരുന്ധതി റെഡ്ഡി, പൂജ വസ്‌ത്രകാര്‍, ശ്രേയങ്ക പാട്ടീല്‍, ആശ ശോഭന, രേണുക സിങ്.
പാകിസ്ഥാൻ വനിത ടീം സാധ്യത ഇലവൻ: മുനീബ അലി (വിക്കറ്റ് കീപ്പര്‍), ഗുല്‍ ഫിറോസ, സിദ്ര ആമിൻ, നിദ ദാര്‍, ആലിയ റിയാസ്, ഒമൈമ സൊഹൈല്‍, ഫാത്തിമ സന (ക്യാപ്‌റ്റൻ), തുബ ഹസൻ, നഷ്ര സന്ദു, ഡയാന ബൈഗ്, സാദിയ ഇഖ്‌ബാല്‍.
