വിശാഖപട്ടണം: ഇംഗ്ലണ്ടിനെതിരായ രണ്ടാം ടെസ്റ്റില്‍ ഇന്ത്യയ്‌ക്ക് ഭേദപ്പെട്ട തുടക്കം. ആദ്യ ദിനത്തില്‍ ലഞ്ചിന് പിരിയുമ്പോള്‍ രണ്ട് വിക്കറ്റ് നഷ്‌ടത്തില്‍ 103 റണ്‍സ് എന്ന നിലയിലാണ് ആതിഥേയര്‍ (India vs England 2nd Test Score Updates). അര്‍ധ സെഞ്ചുറി പിന്നിട്ട യശസ്വി ജയ്‌സ്വാളും Yashasvi Jaiswal (51*) ശ്രേയസ് അയ്യരുമാണ് (4*) ക്രീസില്‍. ക്യാപ്റ്റന്‍ രോഹിത് ശര്‍മ (14), ശുഭ്‌മാന്‍ ഗില്‍ എന്നിവരുടെ വിക്കറ്റുകളാണ് ഇന്ത്യയ്‌ക്ക് നഷ്‌ടമായത്.
ഷൊയ്ബ് ബഷീര്‍, ജെയിംസ് ആന്ഡേഴ്സണ് എന്നിവര്‍ക്കാണ് വിക്കറ്റ്. ടോസ് നേടി ആദ്യം ബാറ്റ് ചെയ്യാന്‍ ഇറങ്ങിയ ഇന്ത്യയ്‌ക്ക് സ്‌കോര്‍ ബോര്‍ഡില്‍ 40 റണ്‍സ് നില്‍ക്കെ ഇന്ത്യയ്‌ക്ക് ആദ്യ വിക്കറ്റ് നഷ്‌ടമായിരുന്നു. രോഹിത് ശര്‍മയെ ഇംഗ്ലണ്ടിന്‍റെ അരങ്ങേറ്റക്കാരന്‍ ഷൊയ്ബ് ബഷീറാണ് വീഴ്‌ത്തിയത്.
ഒല്ലി പോപ്പിന്‍റെ കയ്യിലായിരുന്നു രോഹിത് അവസാനിച്ചത്. തുടര്‍ന്നെത്തിയ ഗില്‍ നന്നായി തന്നെ തുടങ്ങിയെങ്കിലും ആന്‍ഡേഴ്‌സണിന്‍റെ പന്തില്‍ വിക്കറ്റ് കീപ്പര്‍ ബെന്‍ ഫോക്‌സിന്‍റെ കയ്യില്‍ ഒതുങ്ങി. അഞ്ച് ഫോറുകളാണ് ശുഭ്‌മാന്‍ ഗില്‍ നേടിയത്. തൊട്ടു പിന്നാലെയാണ് ജയ്‌സ്വാള്‍ അര്‍ധ സെഞ്ചുറിയിലേക്ക് എത്തിയത്. ഒരു സിക്‌സും ആറ് ബൗണ്ടറികളുമാണ് താരം ഇതേവരെ നേടിയത്.
ഹൈദരാബാദിലെ ആദ്യ ടെസ്റ്റിലെ പ്ലേയിങ് ഇലവനില്‍ മൂന്ന് മാറ്റങ്ങളുമായാണ് ഇന്ത്യ വിശാഖപട്ടണത്ത് ഇറങ്ങിയത്. കെഎല്‍ രാഹുല്‍, മുഹമ്മദ് സിറാജ്, രവീന്ദ്ര ജഡേജ എന്നിവര്‍ക്ക് പകരം രജത് പടിദാര്‍, മുകേഷ് കുമാര്‍, കുല്‍ദ്വീപ് യാദവ് എന്നിവര്‍ ടീമിലെത്തി. ആഭ്യന്തര ക്രിക്കറ്റില്‍ റണ്ണടിച്ച് കൂട്ടുന്ന സര്‍ഫ്രാസ് ഖാന് ടീമില്‍ അവസരം ലഭിക്കുമെന്ന് പ്രതീക്ഷിച്ചിരുന്നുവെങ്കിലും പരിഗണിച്ചില്ല.
ഇംഗ്ലണ്ട് നിരയില്‍ രണ്ട് മാറ്റങ്ങളുണ്ട്. മാര്‍ക്ക് വുഡിന് പകരം വെറ്ററന്‍ പേസര്‍ ജെയിംസ് ആന്ഡേഴ്സണ് ടീമിലെത്തി. ജാക്ക് ലീച്ച് പുറത്തായപ്പോള്‍ ഷൊയ്ബ് ബഷീറിനാണ് ഇടം ലഭിച്ചത്. ആദ്യ മത്സരത്തില്‍ ഇന്ത്യ 28 റണ്‍സിന്‍റെ അപ്രതീക്ഷിത തോല്‍വി വഴങ്ങിയതോടെ അഞ്ച് മത്സരങ്ങളടങ്ങിയ പരമ്പരയില്‍ നിലവില്‍ ഇംഗ്ലണ്ട് 1-0ന് മുന്നിലാണ്.
ALSO READ: 'ജീവിതം അവസാനിച്ചെന്ന് തോന്നിയ നിമിഷം' ; കാറപകടത്തെ കുറിച്ച് ആദ്യമായി പ്രതികരിച്ച് റിഷഭ് പന്ത്
ഇന്ത്യ (പ്ലേയിങ് ഇലവന്‍): യശസ്വി ജയ്‌സ്വാള്‍, രോഹിത് ശര്‍മ (ക്യാപ്റ്റന്‍), ശുഭ്‌മാന്‍ ഗില്‍, രജത് പടിദാര്‍, ശ്രേയസ് അയ്യര്‍, ശ്രീകര്‍ ഭരത്, ആര്‍ അശ്വിന്‍, അക്‌സര്‍ പട്ടേല്‍, ജസ്പ്രീത് ബുംറ, മുകേഷ് കുമാര്‍, കുല്‍ദീപ് യാദവ്.
ഇംഗ്ലണ്ട് (പ്ലേയിങ് ഇലവന്‍): സാക്ക് ക്രൗളി, ബെന്‍ ഡക്കറ്റ്, ഒല്ലി പോപ്പ്, ജോ റൂട്ട്, ജോണി ബെയര്‍സ്റ്റോ, ബെന്‍ സ്റ്റോക്സ് (ക്യാപ്റ്റന്‍), ബെന്‍ ഫോക്സ്, റെഹാന്‍ അഹമ്മദ്, ടോം ഹാര്‍ട്ട്ലി, ഷൊയ്ബ് ബഷീര്‍, ജെയിംസ് ആന്ഡേഴ്സണ്.
