ലഖ്‌നൗ: ഐഎഎസ് ഉദ്യോഗസ്ഥനും ഉത്തർപ്രദേശ് കായിക യുവജനക്ഷേമ സെക്രട്ടറിയുമായ സുഹാസ് എൽവൈ പാരീസ് പാരാലിമ്പിക്‌സിൽ ബാഡ്‌മിന്‍റണില്‍ വെള്ളി മെഡൽ നേടി. സ്വർണമെഡലിനായി നടന്ന മത്സരത്തിൽ 21-10-21 13 എന്ന സ്‌കോറിന് ഫ്രാൻസിന്‍റെ ലൂക്കാസ് മസൂരിയാണ് സുഹാസിനെ പരാജയപ്പെടുത്തിയത്.ഫ്രാൻസിന്‍റെ ഒന്നാം നമ്പർ ബാഡ്‌മിന്‍റണില്‍ താരമാണ് ലൂക്കാസ് മസൂർ. പാരീസിൽ നടന്ന മത്സരമായതിനാൽ താരത്തിന് മികച്ച പിന്തുണയായിരുന്നു ലഭിച്ചത്.
ബാഡ്‌മിന്‍റണ്‍ കോര്‍ട്ട് മുഴുവൻ ലൂക്കാസിന്‍റെ അനുയായികളെക്കൊണ്ട് നിറഞ്ഞു. കളിയിലുടനീളം സുഹാസ് ലൂക്കാസിന്‍റെ മുന്നിലെത്തിയില്ല. മത്സരത്തിലെ ആദ്യ ഗെയിമിൽ 21-10ന് തോൽവി ഏറ്റുവാങ്ങേണ്ടി വന്നു. രണ്ടാം മത്സരത്തിലും മികച്ച് നില്‍ക്കാന്‍ സുഹാസിന് കഴിഞ്ഞില്ല. ഒടുവിൽ 21 13 എന്ന സ്‌കോറിന് സുഹാസിനെ തോൽപ്പിച്ച് ലൂക്കാസ് സ്വർണം നേടി. സുഹാസിന് വെള്ളി മെഡൽ കൊണ്ട് തൃപ്‌തിപ്പെടേണ്ടി വന്നു.
2021ലെ ടോക്കിയോ പാരാലിമ്പിക്‌സിൽ വെള്ളി മെഡലും ഏഷ്യൻ ഗെയിംസിൽ സുഹാസ് സ്വർണം നേടിയിരുന്നു. സുഹാസ് എൽവൈയുടെ ഭാര്യയും ഐഎഎസ് ഉദ്യോഗസ്ഥയാണ്. നഗരവികസന സ്‌പെഷ്യൽ സെക്രട്ടറി റിതു സുഹാസ് 2019-ൽ എംആർഎസ് ഇന്ത്യ കിരീടം നേടിയിരുന്നു. 'അദ്ദേഹം മികച്ച പ്രകടനം കാഴ്‌ചവച്ചു. സ്വർണമെഡൽ നേടാനുള്ള അവസരം നഷ്ടപ്പെട്ടിട്ടുണ്ടാകാം, എന്നാൽ അടുത്ത ലോസ് ആഞ്ചലസ് ഒളിമ്പിക്‌സിൽ അദ്ദേഹം തീർച്ചയായും രാജ്യത്തിന് സ്വർണമെഡൽ നൽകുമെന്ന് ഉറപ്പാണെന്ന് ഭാര്യ റിതു സുഹാസ് പറഞ്ഞു.
