റാഞ്ചി : ഇംഗ്ലണ്ടിനെതിരായ നാലാം ടെസ്റ്റില്‍ നിര്‍ണായക അര്‍ധസെഞ്ച്വറിയുമായി ഇന്ത്യൻ വിക്കറ്റ് കീപ്പര്‍ ബാറ്റര്‍ ധ്രുവ് ജുറെല്‍ (India vs England 4th Test). അന്താരാഷ്‌ട്ര ക്രിക്കറ്റില്‍ ജുറെലിന്‍റെ ആദ്യ ഫിഫ്‌റ്റിയാണ് ഇത് (Dhruv Jurel Maiden Fifty In International Cricket). റാഞ്ചി ടെസ്റ്റിന്‍റെ ഒന്നാം ഇന്നിങ്‌സില്‍ നേരിട്ട 96-ാം പന്തിലായിരുന്നു ജുറെല്‍ അര്‍ധസെഞ്ച്വറി പൂര്‍ത്തിയാക്കിയത് (Ranchi Test Day 3).
മത്സരത്തിന്‍റെ രണ്ടാം ദിനത്തില്‍ സര്‍ഫറാസ് ഖാൻ പുറത്തായതിന് പിന്നാലെയാണ് ജുറെല്‍ ക്രീസിലേക്കെത്തിയത്. മത്സരത്തിന്‍റെ രണ്ടാം ദിനമായ ഇന്നലെ ഇന്ത്യയ്‌ക്ക് ഏഴ് വിക്കറ്റായിരുന്നു നഷ്‌ടമായത്. അവസാന സെഷനില്‍ ഉള്‍പ്പടെ കുല്‍ദീപ് യാദവിനൊപ്പം ഇന്ത്യൻ സ്കോര്‍ ഉയര്‍ത്താൻ താരത്തിനായി. 58 പന്തില്‍ 30 റണ്‍സ് നേടിയായിരുന്നു രണ്ടാം ദിനം ജുറെല്‍ ക്രീസ് വിട്ടത്.
മത്സരത്തിന്‍റെ മൂന്നാം ദിനമായ ഇന്ന് ഇന്ത്യയ്‌ക്കായി ബാറ്റിങ് പുനരാരംഭിച്ച ധ്രുവ് ജുറെലിന് അനായാസം തന്നെ ഇംഗ്ലീഷ് ബൗളര്‍മാരെ നേരിടാനായി. കുല്‍ദീപ് യാദവ് പിന്തുണ നല്‍കിയപ്പോള്‍ ജുറെലാണ് ഇന്ത്യയുടെ സ്കോര്‍ ഉയര്‍ത്തിയത്. ഇന്ന്, മത്സരത്തിന്‍റെ 81-ാം ഓവറില്‍ ഒലീ റോബിൻസണിനെതിരെയായിരുന്നു താരം ആദ്യ ബൗണ്ടറി നേടിയത്.
കുല്‍ദീപ് യാദവിനെ കൂട്ടുപിടിച്ച് ഇന്ത്യൻ സ്കോര്‍ 250 കടത്താനും ജുറെലിനായി. എട്ടാം വിക്കറ്റില്‍ ഇരുവരും ചേര്‍ന്ന് 76 റണ്‍സായിരുന്നു കൂട്ടിച്ചേര്‍ത്തത്. കുല്‍ദീപ് പുറത്തായതിന് പിന്നാലെ മത്സരത്തിന്‍റെ 90-ാം ഓവറില്‍ ടോം ഹാര്‍ട്‌ലിയുടെ പന്തില്‍ സിംഗിള്‍ ഓടിയെടുത്താണ് ജുറെല്‍ ഫിഫ്റ്റി പൂര്‍ത്തിയാക്കിയത്. അര്‍ധസെഞ്ച്വറിയിലേക്ക് എത്തുമ്പോള്‍ മൂന്ന് ഫോറും ഒരു സിക്‌സറുമായിരുന്നു താരത്തിന്‍റെ അക്കൗണ്ടിലുണ്ടായിരുന്നത്.
