കായികം പ്രമേയമാക്കി നിരവധി സിനിമകള്‍ മലയാളത്തില്‍ പുറത്തിറങ്ങിയിട്ടുണ്ട്. അവയില്‍ മിക്കതും തിയേറ്ററുകളില്‍ നിന്നും മികച്ച വിജയം നേടുകയുണ്ടായി. കായിക സിനിമകള്‍ സാധാരണയായി താരങ്ങളേയൊ ടീമുകളെയോ ചുറ്റിപ്പറ്റിയാണ് ചിത്രീകരിക്കാറുള്ളത്. വെല്ലുവിളികളും പ്രതിബന്ധങ്ങളും നേരിട്ട് അവര്‍ ലക്ഷ്യം നേടിയെടുക്കുന്നതാണ് മിക്ക കായിക സിനിമകളിലും കാണുന്നത്. എല്ലാ കായിക പ്രേമികളും കണ്ടിരിക്കേണ്ട മലയാളത്തിലെ ചില ജനപ്രിയ കായിക സിനിമകളിതാ...
- 1983 : 1983-ലെ ക്രിക്കറ്റ് ലോകകപ്പിലെ ഒരു ക്രിക്കറ്റ് ആരാധകന്‍റെ അനുഭവങ്ങളിലൂടെയാണ് സിനിമ സഞ്ചരിക്കുന്നത്. നിവിൻ പോളിയും അനൂപ് മേനോനും പ്രധാന കഥാപാത്രങ്ങളെ അവതരിപ്പിച്ച "1983" എന്ന ചിത്രത്തിലൂടെയാണ് എബ്രിഡ് ഷൈൻ സംവിധായകനായി തുടക്കം കുറിച്ചത്.
- ക്യാപ്റ്റൻ : മുൻ ഇന്ത്യൻ ഫുട്ബോൾ താരം വിപി സത്യന്‍റെ ജീവിതത്തെ ആസ്‌പദമാക്കി 2018ല്‍ പുറത്തിറങ്ങിയ സിനിമയാണ് ക്യാപ്‌റ്റന്‍. ജയസൂര്യയായിരുന്നു നായകവേഷത്തിലെത്തിയത്. പ്രജേഷ് സെന്നാണ് സംവിധാനം ചെയ്‌തത്. ഇന്ത്യൻ ദേശീയ ഫുട്ബോൾ ടീമിന്‍റെ ക്യാപ്റ്റനെന്ന നിലയിലുള്ള താരത്തിന്‍റെ യാത്രകളും പോരാട്ടങ്ങളും നേട്ടങ്ങളും സിനിമയില്‍ ചിത്രീകരിച്ചു. സത്യൻ എന്ന നായക കഥാപാത്രത്തെ അവതരിപ്പിച്ച ജയസൂര്യ മികച്ച പ്രകടനത്തിന് ഏറെ ശ്രദ്ധിക്കപ്പെട്ടു. മലയാളത്തിലെ ഏറ്റവും കൂടുതൽ കളക്ഷൻ നേടിയ ചിത്രങ്ങളിൽ ഒന്നായി മാറി.
- സ്‌പീഡ് ട്രാക്ക് : യുവ കായികതാരമായ അർജുന്‍റെ കഥയാണ് സ്‌പീഡ് ട്രാക്ക് എന്ന സിനിമ പറയുന്നത്. ദിലീപ്, ഗജല, റിയാസ് ഖാൻ, മധു വാര്യർ എന്നിവർ പ്രധാന കഥാപാത്രങ്ങളെ അവതരിപ്പിക്കുന്ന ചിത്രം ഒരു സ്‌പോർട്‌സ് കോളേജിന്‍റെ പശ്ചാത്തലത്തിലാണ് നിര്‍മിച്ചത്. എസ്.എൽ പുരം ജയസൂര്യയാണ് സിനിമ സംവിധാനം ചെയ്‌തത്.
- സുഡാനി ഫ്രം നൈജീരിയ : സെവൻസ് ഫുട്ബോൾ ടൂർണമെന്‍റിനായി മലപ്പുറത്തുള്ള ഒരു ക്ലബ്ബിൽ ചേരുന്ന ഒരു നൈജീരിയൻ ഫുട്ബോൾ താരത്തിന്‍റെ കഥയാണ് സിനിമ പറയുന്നത്. അയാൾക്ക് പരിക്കേറ്റതിനാൽ, ഫുട്ബോൾ മാനേജർ മജീദ് തന്‍റെ വീട്ടിൽ താമസിക്കാൻ അനുവദിക്കുന്നു, കാലക്രമേണ, അവർ ഒരു അടുത്ത ബന്ധം വളർത്തിയെടുക്കുന്നു. പ്രധാന വേഷത്തില്‍ സൗബിൻ ഷാഹിറാണ്. സക്കരിയ സംവിധാനം ചെയ്‌ത സിനിമ മലബാർ മേഖലയിലെ ഫുട്ബോൾ പ്രേമികളുടെ ജീവിതത്തിലേക്ക് ആഴത്തിൽ വേരൂന്നിയ ഒരു ലളിതമായ വിഷയത്തെ പിന്തുടരുന്നതാണ്.
- കരിങ്കുന്നം സിക്‌സസ്: വനിതാ ബാസ്‌ക്കറ്റ്‌ബോളിനെ ചുറ്റിപ്പറ്റിയുള്ള സിനിമ ദീപു കരുണാകരനാണ് സംവിധാനം ചെയ്‌തത്. ചിത്രത്തിൽ മഞ്ജു വാര്യരും അനൂപ് മേനോനുമാണ് പ്രധാന കഥാപാത്രങ്ങളെ അവതരിപ്പിച്ചത്. 2016-ൽ ഈ ചിത്രത്തിലെ അഭിനയത്തിന് ഏഷ്യാനെറ്റ് ഫിലിം അവാർഡിൽ മികച്ച നടിക്കുള്ള അവാർഡ് മഞ്ജു വാര്യര്‍ സ്വന്തമാക്കി.
- സെവൻസ് : കുഞ്ചാക്കോ ബോബൻ, ആസിഫ് അലി, നിവിൻ പോളി തുടങ്ങിയവരാണ് സെവൻസിലെ പ്രധാന താരങ്ങള്‍. 2011ലാണ് സിനിമ പുറത്തിറങ്ങിയത്. ഒരു ഫുട്ബോൾ ടീമില്‍ ഒരുമിച്ച് കളിക്കുന്ന ഏഴ് യുവാക്കളുടെ കഥയാണ് ചിത്രീകരിച്ചത്. ജോഷിയാണ് സിനിമ സംവിധാനം ചെയ്‌തത്. സംഘം ഒരു ക്രൈം സർക്കിളിൽ വീഴുകയും അതിൽ നിന്ന് മോചിതരാകാനുള്ള പോരാട്ടമാണ് കാണിക്കുന്നത്.
- ഗോധ : 2017ൽ ബേസിൽ ജോസഫ് സംവിധാനം ചെയ്‌ത ഗോധ ഒരു പഞ്ചാബി പെൺകുട്ടിയുടെ ഗുസ്‌തി ചാമ്പ്യനാകാനുള്ള സ്വപ്നത്തിന്‍റെ കഥയാണ്. ചിത്രത്തിൽ ടോവിനോ തോമസ് ഒരു പ്രധാന കഥാപാത്രത്തെ അവതരിപ്പിച്ചു. നർമ്മവും മാന്യമായ പ്രകടനങ്ങളും നിറഞ്ഞ ഹൃദയസ്പർശിയായ കായിക സിനിമയാണ് ഗോദ.
Also Read: വിജയ പ്രതീക്ഷയില്‍ കേരള ബ്ലാസ്റ്റേഴ്‌സ് ഇന്നിറങ്ങും; മത്സരം കൊച്ചിയില്‍ - ISL Kerala Blasters
