എറണാകുളം: സംസ്ഥാന സ്‌കൂള്‍ കായിക മേളയില്‍ ഇരട്ടി മധുരവുമായി മലപ്പുറത്തെ കെഎസ് അമൽ ചിത്ര. പിറന്നാള്‍ ദിനത്തില്‍ മത്സരിച്ച പോള്‍വോള്‍ട്ടില്‍ സ്വര്‍ണ മെഡലിലേക്ക് കുതിച്ച് പതിനഞ്ചുകാരി. ഇന്ന് (നവംബര്‍ 8) നടന്ന ജൂനിയര്‍ പെണ്‍കുട്ടികളുടെ പോള്‍വോള്‍ട്ടിലാണ് അമല്‍ ചിത്ര സ്വര്‍ണം നേടിയത്.
സംസ്ഥാന കായിക മേളയിലെ തന്‍റെ വ്യക്തിഗത മത്സരവും പിറന്നാൾ ദിവസവും യാദൃശ്ചികമായി ഒത്തുവന്നതിന്‍റെ ആവേശത്തിലായിരുന്നു അമൽ. പിറന്നാൾ മധുരവുമായി കളത്തിലിറങ്ങിയ ഈ കൊച്ചു മിടുക്കി സ്വർണം നേടിയാണ് തിരിച്ചു കയറിയത്. സ്വർണ തിളക്കത്തോടെ മത്സരം പൂർത്തിയാക്കിയ അമൽ ചിത്രയെ പിറന്നാൾ കേക്കുമായി കാത്തുനിന്ന പരിശീലകനും അച്ഛനും സ്വീകരിച്ചത് മൈതാനത്ത് നിന്നുള്ള വേറിട്ട കാഴ്‌ചയായി. മഹാരാജാസ് കോളജ് ഗ്രൗണ്ടിൽ വച്ച് അമൽ കേക്ക് മുറിക്കുമ്പോൾ, മൈതാനത്തിന് പുറത്ത് നിന്ന് കൂട്ടുകാരും അധ്യാപകരും ചേർന്ന് ഹാപ്പി ബർത്ത്ഡേ പാടി സന്തോഷത്തിൽ പങ്കാളിയായി.
അച്ഛൻ നൽകിയ കേക്ക് നുണഞ്ഞും പ്രിയപ്പെട്ടവർക്കെല്ലാം കേക്ക് നൽകിയും കായിക മേള വേദിയിലെ ജന്മദിനാഘോഷവും അമൽ കളറാക്കി. 2.90 മീറ്റർ ഉയരം കീഴടക്കിയാണ് മലപ്പുറം ഐഡിയൽ ഇഎച്ച്‌എസ്‌എസ് കടകാശ്ശേരിയിലെ പത്താം ക്ലാസ് വിദ്യാർഥിയായ അമൽ സുവർണ നേട്ടത്തിനർഹയായത്. തൃശൂർ താണിക്കുടം സ്വദേശിയായ കെപി സുധീഷിന്‍റെയും വിജിതയുടെയും മകളാണ് അമൽ ചിത്ര.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
കഴിഞ്ഞ വർഷം സ്‌കൂൾ കായിക മേളയിൽ അഞ്ചാമതായിരുന്നു അമൽ. എന്നാൽ കഠിന ശ്രമത്തിലൂടെയും സ്ഥിരോത്സാഹത്തിലൂടെയും ഇത്തവണ ഒന്നാമതെത്തുകയായിരുന്നു.
ഇത്തരമൊരു ആഘോഷം പ്രതീക്ഷിച്ചില്ലെന്ന് അമൽ പറഞ്ഞു. 'നേരത്തെ 800 മീറ്റർ ഓട്ടത്തിലാണ് പങ്കെടുത്തത്. രണ്ട് വർഷം മുമ്പ് അഖിൽ സാറാണ് പോൾവോൾട്ടിലേക്ക് കൊണ്ടുവന്നതെന്നും സ്വർണം നേടിയതിൽ സന്തോഷമുണ്ടെന്നും അമൽ പറഞ്ഞു.
കരാട്ടെ ഉൾപ്പെടെ പരിശീലിച്ചിട്ടുള്ള അമലിന്‍റെ കഴിവ് തിരിച്ചറിഞ്ഞാണ് താന്‍ പോൾവോൾട്ടിലേക്ക് മാറ്റിയതെന്ന് പരിശീലകന്‍ അഖിൽ പറഞ്ഞു. എറണാകുളം കോതമംഗലം മാർ ബേസിൽ സ്‌കൂളിലെ സഫാനിയ നിട്ടു വെള്ളിയും കോട്ടയം സെന്‍റ് തോമസ് എച്ച്‌എസ്‌എസിലെ ആൻഡ്രി ആലി വിൻസെന്‍റ് വെങ്കലവും നേടി.
